//支持本Page請Click入內文比Clap，已為Medium收費會員請直接Click入內文閱讀，謝謝！//
自從11月17日全面封鎖包圍理大開始，去到11月28日包圍第十一日，警方終於宣佈，最快將於11月29日全面撤走理大包圍網，將校園管理權全權交還予校方。響宣佈之時，記者仲特別反覆問及係咪即係代表理大全面解封，警方唔會再逗留響理大進入口範圍，警方發言人表示：「全對」。換言之，呢一場慘烈嘅「香港史太林格勒之戰」，終於踏入尾聲。
響度我地重新整理番呢一個星期嘅時間線：
11月25日，亦即係區議會大勝後翌日，約有150名區議員立刻前往理工大學集會施壓；
11月26日理大校方發出聲明指，於兩度於校園作「地毯式」搜查後，只於第一次找到一個留守者，並表明其他人仍留守於校園的「機會極低」，要求警方立刻撤防；
11月27日，有留守者召開記者會指仍有約20人留守於理大校園，並指警方曾喬裝救護員摸黑進入校園騷擾留守者，並強烈要求警方撤圍，讓他們光明正大從校園正門離開；
11月28日晚上，警方表示於一連兩日連同消防署進入理大清除危險品、進行搜證及風險評估後：
a. 在現場搜查不到留守者，認為校園仍有留守者機會極低；
b. 進入校園的警方隊伍只以搜查與清理危險物為唯一任務，從未有作出搜捕打算；
c. 雖然警方仍堅持若校園內仍有留守者，將會記錄其個人資料及拍照作日後跟進，然而無論留守者身體狀況如何，皆強烈建議其前往醫院進行身體檢查，故此不會作任何拘捕；
d. 在確認校園再無即時危險後，最快於11月29日理大校園管理權交回校方，而封鎖理大嘅防暴亦將撤離，進出校園人士將不再被截查。
雖然仲未確認究竟11月29日嘅局勢發展會變成點，但明顯林鄭政府同警方係發現，佢地今次呢次包圍行動係陷入進退維谷嘅境地：
1. 包圍大學校園，令留守者環境日益艱難呢個情況經已成為國際焦點，令佢地根本唔敢再攻入校園強行清場，以免蘊釀成另一場足以令香港受制裁嘅人道災難，所以甚至可能林鄭已受到來自北京方面嘅禁止清場令；
2. 理大校園雖然比中大校園細，但大學始終就擁有一個非常龐大而密集嘅建築群，要躲藏於其中實在太過容易，要確保理大校園0留守者呢個目標根本係Mission Impossible；
3. 包圍時間愈長，校園環境就愈惡劣，來自各方嘅道德批判壓力亦愈大：
究竟有咩外來壓力，會令林鄭政府由企硬封鎖理大唔放人，突然間放軟手腳撤圍呢？當然150位區議員前去施壓係其中一個原因──所以果啲叫區議員「唔好去現場救人以免被DQ」嘅垃圾黃屍係應該收皮，D乜撚嘢Q？仲有究竟有邊二百幾個區議員缺席咗今次理大營救行動，其實亦好應該記低，因為佢地明明就係靠「抗爭票」當選，但最後響緊要關頭龜縮，經已係有出賣抗爭者嫌疑。
此外，《香港民主及人權法案》響11月29日簽署，當然亦係對特區政府同警察指揮造成一定壓力──無人知道究竟呢條法案最尾會唔會針對理大圍捕呢件事秋後算帳，但對呢班潛在被制裁人士黎講，多一事自然不如少一事。
第三，加上區選完結之後，勇武派唔再需要遷就和理非而留守，響星期六、日可能又會藉此號召大規模衝擊，之前借住區選期「止暴制亂」嘅錯覺又會毀一旦：之前都有講，區選大勝其實係令和理非某程度上搶番個抗爭話語權，政府響理大撤圍，其實都算係一種順水推舟。
基於現實，警方再繼續響理大進行封鎖已係弊大於利，甚至乎響回應記者質詢，甚至暗示曾經響理大被登記資料人士，都唔一定會於日後受到檢控──事實上除非你係即場逮捕，否則都真係好難單憑市民逗留於校園，就可以暴動罪入罪。不過警察反口事例經已多不勝數，所謂「全面撤圍」亦不足採信，呢啲都係聽住先就算。
但另一方面，相比起對警方最新部署嘅懷疑同批評、甚至佢地守唔守信用亦唔再係關注點，關鍵從來係，點樣響警方撤守一刻，立刻湧入校園保護留守者。由於而家唔知警方響撤圍後，理大校方會唔會實施出入管制，但至少理大教職員、學生、以至區議員，都有合理理由或權力進入理大「了解情況」，記住，只要人一多，掩護就足夠，再加群眾響外圍聲援，剩番嘅留守者可以安然「消失」嘅機會就大──所以大家聽日一定要隨時Ready，因應身份嘅唔同，隨時參與聲援或者掩護行動。
當然，響度亦要懇求各方媒體，唔好為收視響呢個時刻節外生枝勒……比你拍倒留守者蹤影可以為你增加多少View？但你卻可能害咗人地一生！
