電話響起～
我：「你好，乜乜診所」
對方係一位女士：「我晏啲會send個醫生過嚟」
我聽到頭都側埋：「你係咪晏啲嚟睇醫生呀？我哋收今晚八點，你八點前嚟到登記就得啦」
佢：「我都要啲時間send個醫生嚟喎，我記得佢係收七點，我唔sure佢八點前嚟唔嚟到」
究竟邊個睇呀？我好亂呀，醫生嚟睇醫生呀？
我：「唔係你嚟睇咩？」
佢：「係呀，我嚟睇呀，但係我要send咗個醫生過嚟先呀嘛，佢喺中環好遠呀，，呢啲時候我唔搭車出去啦，咪send佢過嚟囉」
…你點send㗎？
我：「你意思係中環嘅醫生過嚟我哋嘅診所同你睇症？」
佢：「係呀，好難明咩」
點解你會有呢個諗法嘅？
我：「我哋診所唔借俾其他醫生㗎喎，你有冇問過中環位醫生先㗎？」
佢：「唔駛問都知得啦，我主診醫生嚟㗎嘛，佢梗係要就我㗎啦」
咁點解你以前要自己出中環睇咁笨實？你直接叫佢上去你度咪得囉。
我：「我哋診所唔借俾其他醫生用嘅，或者你打去問返中環醫生可以點安排啦」
佢：「點解呀？唔係send去邊都得㗎咩？」
你有隨意門嘅話，咪可以去邊都得囉，大夫我進來了！
我：「你要自己問返你嘅醫生啦，我唔知道你位醫生會點安排」
佢：「乜都唔知你唔駛做啦，幫個手做個好人唔得㗎咩」
嘟。
佢cut咗我線。其他醫生嘅嘢又要我做埋嘅話…一份糧唔夠喎！
