【我怎麼捨得你難過】估唔到月圓之夜前夕,上演咗一場大閙陰公,又係哥哥唔抵得呀妹系列,哥哥肚唔舒服要暖包暖住個肚,呀芊又走去「人做佢又做」,所以哥哥就覺得佢貪玩阻住哂,由廳一路煩到入房瞓覺前,都仲係話緊呀妹「你都冇事做咩要暖包啫!」, 大家都聽過羅家英唱OnlyU知道有幾煩,我就即刻Insideout呀爆上身。
結果同哥哥喺房說教攪到佢遲咗瞓,仲見住佢喊苦喊忽好慘咁,呻鼻抹眼淚嘅戰跡有眼你睇。我知道每次鬧得咁勁我之後都會好後悔,永遠教人點做講就天下無敵,到自己面對時就成日都KO自己。
不過我有一樣堅持,就係到最後鬧完都會同佢愛的抱抱,其實真係好難(尤其大家都唔認輸嗰陣),但係頭先好唔連戲咁格硬叫佢過嚟同我攬,真係唔知點解嗰刻就兩個人都會軟落嚟,我即刻鬧唔落原諒咗佢,佢即刻唔再硬頸仲講Sorry。當然每次都要賽後檢討,佢要改善我都要收吓火,不過呢個愛的抱抱都真係好緊要,各位熱氣爸媽共勉之。
#深宵出文有原因 #你喊我都喊 #中秋都有得開年
Search