Search
【#Patreon國際運動場🇨🇳🏐️】想不到對電影最有意見的一群人，卻是郎平當年的隊友們。導演表示，本來郎平隊友在電影都是「有名有姓」的，但被她們本人抗議，結果在公演版本必須刪掉所有人名，只能在試映版本看見誰是誰。背後的原因，很值得探討...... 和香港關係最大的還是陳亞瓊大姐：她退役後就被派到香港新華社工作，過渡到現在的中聯辦，成為宣傳文體部副部長，長期負責統戰香港體育界。把這些人當臨記放進電影，確實「為難」......
⏺全文見Patreon
https://www.patreon.com/posts/54215839
▶️奧運對中國隊落敗有情緒反應，會否違反《港區國安法》？
https://www.youtube.com/watch?v=XtrA1mM-n4g
漫長嘅一日：元朗七二七
(Medium Link: https://t.co/J6XSZvRZw8?amp=1)
//
執筆之時，元朗嘅示威者已經大致散去，有啲留守到最後嘅可能仍在途中，有啲義載嘅車手可能仍然面臨被警察查牌嘅風險。有至少 17 個人受傷，其中幾個嚴重。仲未計速龍小隊殺上元朗站大堂開啟無雙亂舞模式見人就揮動警棍亂打同埋噴胡椒噴霧，因而浴血或跌倒嘅市民。
係，你冇睇錯，埋單計數，又係香港警隊出手，喺示威人士和平散去嘅時候，出手施暴。
實不相暪，星期六早上，我一直憂心忡忡。遊行係點都會舉行嘅，警察嘅「反對通知書」根本就冇意思。成 28 萬市民入元朗買老婆餅、探朋友，使差人教？問題係，元朗嘅白衫社團人士幾時出動？警隊又會唔會好巧合地失蹤？示威者入面，又會唔會有人煽動其他人入圍村搞事？
一千個問號，令呢一個晴朗嘅週末，添上一層厚厚嘅陰霾。
事實係，喺環境狹窄嘅元朗大馬路，警隊選擇用包圍嘅方式，由各個方向重重包圍人群。我整個下晝到晚上都專注做各區交通及天氣消息，聽得最多嘅係「周圍都係防暴警察，啲人唔知點樣走」。然後聽到有啲熟路嘅朋友話，「由鳳攸北路經鳳琴路去教會再轉落教育路」，聽到頸都側埋。乜疏散人群，唔係應該留一條活路，畀大家有秩序咁離開嘅咩？點解又好似沙田新城市廣場嗰次咁，重重圍困，「沸水戰術」係咩玩法？
元朗嘅另一個獨特環境，就係大馬路兩邊滿佈民居。而警察為咗「維持秩序」，又好老奉咁出黑旗施放催淚彈，結果唔知射咗去邊，有啲去咗老人院簷篷，有啲上咗西鐵路軌。附近嘅民居男女老嫩乜都有，九唔搭八咁聞呢啲有毒氣體，對健康嘅影響係乜？我唔知有冇人評估過呢啲風險先至行動，或者評估完之後覺得 screw you all 就可以放題任出？
除咗黑旗，橙旗都係 7.27 嘅常客：警隊近期發射橡膠子彈、海綿彈以至散包彈都已經係常態。常態唔代表唔變態的，瞄住示威者甚至記者個頭嚟射，動機係乜嘢呢？一幅幅記者中彈、攬住個肚倒地嗌痛嘅相，我係保險公司見到就拿拿臨加報館保費。至於其他示威者手持木板做盾都可以被子彈打穿，就更加不在話下。
隨住日落西山，示威者嘅人身安全所受嘅威脅亦逐步提升。警方要求地鐵開特別列車去朗屏站接載離開嘅示威人士，其他列車就唔停朗屏，其實令人感到奇怪：要將離開嘅人一網成擒嗎？或者透過車上嘅閉路電視影低呢班人，日後用嚟秋後算帳？如果真係要加快市民離開，點解唔要限制其他列車不停朗屏？我諗唔通。但只係知道，警民關係已經毫無互信可言。
喺驅散示威者嘅過程中，有社工被㩒住嚟打，記者被警察嘅大光燈阻礙採訪，甚至有警員出口辱罵記者。呢啲鏡頭，香港市民可能都已經唔陌生。換句話講，前線警務人員唔使出示委任證、可以隨意使用武力 (我鄧朱經緯唔抵了) 、敵視記者、到示威者散水之際，就情緒失控出手攞尾彩，都已經成為常態。以後每一次嘅遊行，警員嘅言行操守，就只會每下愈況。而作為納稅人，我係為自己供養緊呢班渣滓而感到慚愧嘅。
政治問題，政治解決。但點樣解決呢班已經黐晒線嘅警務人員？解甲歸田的話，香港市面就多成千上萬嘅古惑仔或者僱傭兵。留喺警隊，日後對於市民嘅清算、拘捕、騷擾肯定無日無之。唔使講得遠，淨係留意返警隊喺西鐵市區各站佈防截人查袋，就已經知道，能夠平安離開元朗，唔代表平安返到屋企。
白衣人今日嘅鋒頭就畀喺元朗站大堂動武嘅速龍小隊搶晒。但係當警員出動，沿途白衫嘅「街坊」或「村民」鼓掌致意，都明確顯示原居民同警隊同氣連枝。至於疑似中聯辦新界工作部副部長葉虎嘅電費單，喺一架可疑私家車入面，連同鐵通、藤條等攻擊性武器被起獲 (聞說仲有本數簿) ，係咪意味住中聯辦同鄉黑合謀，名為維穩、實質搞亂香港？我討厭政治，我唔識。
漫長嘅一日，有受傷，冇死人，情況可能已經比我想像中好少少。但係，更漫長嘅日子，往後仲有大把。香港人，前世到底做錯啲咩？
