【龔成問答信箱】(Q21741-Q21760)
Q21741:
老師,如一個新手剛入股市卻遇上跌市, 剛買的股票即買即跌可以點做?
因為新手, 心理質素不夠強大, 好容易驚唔知發生咩事, 以為股災, 請問你會有甚麼建議?
龔成老師:
第一,你要了解自己所買入企業的業務,只要清楚,就不用擔心。
第二,了解股價下跌原因,是短期因素,還是企業核心有問題。
第三,將焦點集中翻企業,而不是價格。
第四,如果你每次股價上落好大心理壓力,就不宜投資高風險股,可轉到一些股價較穩定及收息類的股。
------------------------------------------------
Q21742:
你好 ,龔Sir, 我日日睇你個 page, 多謝你教嘅理財之道! 知道好多人問你投資問題, 但都希望你可以抽空回答我, 感激不盡!
本人33歲, 有家庭(兩位小朋友), 以下係現有嘅組合, 想龔Sir幫忙睇下有咩野要改善 (太散?太亂? 有冇野唔應該keep要賣走?),
同埋有一筆定期 (10萬港元黎緊到期), 想睇下龔Sir會建議點樣運用 (可唔可以再入少少房託 / 6823作收息用? 入幾手3067? 買資源股如龍源電力, 信義能源??
定領展 / 小米??), 十分謝謝!
收息股 約佔組合51%
陽光房地產基金 5手 @4.12
越秀房产信托基金 4手 @4
置富产业信托 4手 @7.18
富豪產業信託 5手 @1.51
郵儲銀行 2手 @5.96
香港电讯 2手 @10.86
越秀交通基建 1手 @5.32
深圳高速公路股份 1手 @7.55
新創建集團 1手 @8.9
其他 約佔組合19%
長城汽車 3手 @21.85
南方A50 5手 @19.99
新經濟股 約佔組合31%
京東集團-S 1手 @292
美團-W 1手 @285.8
快手-W 1手 @257.8
舜宇光學科技 1手 @165
龔成老師︰
你現時組合數量太多,長線維持10隻左右好了,會較易管理。
當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
例如初期投資較有潛力股票,令財富增值較快,到一定金額後,可轉較平穩增值的股票。最後有相當財富時,才換成收息股去為自已創造穏定現金流。
你現時持股,質素上係有,但有2個較大問題存在。
首先,以你現時33歲去計,應先集中做好財富增值部份。策略上,你應投資「平穏增長股」和「潛力股」這類有增長力股票。
但你現時組合,郤一半是「收息股」。佢地係有質素,但增長力好弱,會拖慢你財富增長速度。除非你個承受風險能力好低,否則唔建議持有太多。
第二,任何股票、任何行業,我們都不應太過集中,因為一個行業就算更有優勢,也有機會面對行業週期及突發風險,太集中會對你整個財富組合不利。
因此,你要建立一個平衡的投資組合,當中有不同的類別、不同的行業,這是最好的平衡風險方法。相同行業不可佔組合多於30%,而單一企業不要高過15%。
你現時房地產類別,有少少集中,要注意。
現有收息股,建議你最好沽出部份,換至有增長力股票,長線會對你較有利。
至於其餘持有股票,包括你計劃投資的龍源電力(0916)、信義能源(3868)都有投資價值。
但信義能源(3868)不能投資太多,因為佢業務都有風險的,要注意股價波動,如分注長線都可以投資。現價合理區頂位,之前略貴。
將來投資,你可以集中「平穏增長股」和「潛力股」。如果你現時無太多投資經驗,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。
若你有一定投資經驗﹐潛力股比重可以相應調高,佔組合約3-5成,可視乎你當時投資經驗多寡和了解這些股票程度而定。
現時大市只在合理水平﹐唔算好平。你定期的10萬,我地就等機會,當大市出現較大回調,就加大力度掃貨,然後作長線投資。
另外,定期這類定息產品,增長力好低,同樣唔適合你年紀,暫時唔好再用。
------------------------------------------------
Q21743:
龔成老師你好,想問下
泡泡瑪特,79.35蚊入
聽日公布業績,依家係咪一個適合嘅時候去溝貨?
另外京東健康,120蚊入
幾時可以溝下貨?
龔成老師︰
首先,我想你確認自已是否理解"溝貨"與"分注"的分別。溝貨是愈跌愈入,同時不理企業質素,不理自己的設定金額,盲目去入。分注則是「一早定好買入策略,一早定好本金總數,並以有策略的模式進行」。
如果你係"分注"的話,你可因應平貴和質素,去進行。若是"溝貨",就不是再入貨,因為再平,都只會令你增加風險。
Pop Mart泡泡瑪特(9992)是一家覆蓋潮流玩具全產業鏈的一體化平台,當中包括藝術家發掘、IP運營、消費者觸達及潮流玩具文化的推廣。
根據弗若斯特沙利文報告,分別以2019年的零售價值(市場份額為8.5%)及2017年至2019年的收益增長計,集團是中國最大且增長最快的潮流玩具公司。
合作伙伴中不乏知名品牌,好似迪士尼、HELLO KITTY等等。而產品中,最為人所認識就是"盲盒",此銷售模式為集團貢獻不少。
雖然中央規管會有負面影響,但長線質素和發展前景依然係度。2019年純利為4.5億,但現時市值郤超過700億。現貨若佔組合比重唔,可持有。但在這個水平加注,風險太高。
由京東(9618)分折出來京東健康(6618)其業務主要提供線上線下的醫藥出售和健康管理服務,業務布局包括醫藥電商、互聯網醫療、智慧醫療解決方案、健康服務等4個大板塊。
京東健康旗下京東大藥房,更是內地線上線下收入規模最大的零售藥房。其互聯網醫院,日接診量超過10萬次。
質素上,京東健康是有的。但要做估值好困難,佢未有盈利之餘,不確定性都大,但市值郤去到3500億以上。
只能說,而價計依然唔平。若你只是小注,可以守。
------------------------------------------------
Q21744:
sir,又想問問你,你說現時恆指23000左右是便宜區,那麼我大概也是在這範圍開始分注入市。我打算動用50萬買下面既股票:
1. 1810 (用50%的資金)
2. 1585 (?%)
3. 136 (?%)
4. 558 (?%)
5. 3738 (?%)
6. 8606 (?%)
因為小米較穩健我有信心所以用50%的資金投入,sir其他你會建議我點樣分配資金?邊隻高比例d,邊隻細比例d?可以比個數據我參考嗎?謝謝成哥!
龔成老師︰
你好年青,只係20出頭,投資選項上可以較進取。
但你要留意,任何股票、任何行業,我們都不應太過集中,因為一個行業就算更有優勢,也有機會面對行業週期及突發風險,太集中會對你整個財富組合不利。
因此,你要建立一個平衡的投資組合,當中有不同的類別、不同的行業,這是最好的平衡風險方法。相同行業不可佔組合多於30%,而單一企業不要高過15%。
你持股中有主要係潛力股,佢地雖然有增長潛力,但同時波動風險都唔細,故不宜持有太多。以你年紀,最多佔5成好了。若你投資經驗較弱,要再調低至3成以下。
而你所講潛力股,除了小米(1810)係較優質外,其他都係風險較高類型,只宜小注(佔組合5%左右)。
倢冠控股(8606)是一間香港資訊科技服務供應商,佢規模唔大,每年營業額和盈利好細,而且股價都幾波動。
以佢2020年1000萬盈利計,現價欲去到過10億,此刻投資,風險好高,唔係咁建議。
力勁科技(0558)無研究。
如果從過往業務情況分析,這企業投資價值,質素只是中等,唔算好值得投資。不過唔知近期股價上升的原因,除非你確定佢上升背後的因素,是由於一些對企業長期利好的因素,否則,不宜投資。
除了潛力股外,餘下資金你可以集中係平穏增長股,令組合更平衡。
平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、領展(0823)、希慎(0014)、太古地產(1972)
大市現處於合理水平,那50萬資金,你可以先用一半,以"分注"形式慢慢入貨。餘下一半就等大跌市機會出現,才大力度掃貨,並長線投資。
------------------------------------------------
Q21745:
老師!你好!我一直有看老師的問答同定期勵志既post! 真心多謝你!我已經睇完你本80後百萬富翁同買左5年買樓4部曲!但我有些問題想指點迷津⋯⋯
我想問有關置業問題!我係90後但就快29+1、希望5年內甚至更早可以買第一層樓自住!因為都想結婚同組織家庭
我之前睇過兩個樓盤「2-3年樓齡既單幢樓房,係深水埗/慈雲山,均是190尺-245尺既納米單位
我睇完老師本書4部曲講到先買細屋再換dream house,就開始迷茫,因為有朋友教路不好買納米樓、無升值潛力,換不到大單位!但舊樓不是一樣沒升值能力嗎?
又要支付大廈維修費,但我目標第一層樓只能付出450萬樓下既樓價同借9成按揭攤分30年供還款,這樣說在市區好難找到、除非樓齡已經超過30年、但又引申出不會批到9成按揭。
老師,請問我應該點做法?買舊樓大單位?買新樓細單位?我想住市區、不想考慮新界區。。因為家人住所同工作地方均是市區。。
不知道去向,感謝你。耐心等待回覆
龔成老師︰
想借買細屋再換dream house,你細屋必需有一定投資價值,至少跟樓市同步,否則就沒有意義。
納米樓尺寸太細,連一個基本家庭生活所需的300尺寸都無,投資價值相對較弱,唔建議你投資。
至於過30年的樓,唔代表一定無投資價值,但就要小心選擇。而且正如你所講,較大問題係銀行未必會批出9成按揭。
所以,其實你此刻問題重點,會係你置業資金不足,令你變相找不到合適選擇。
我建議你先用優質股,去累積更多置業資金,才去考慮物業部份,咁會較理想。
你可以用「平穏增長股」 + 「潛力股」的組合,去進行增值。你每月先用5成儲蓄,其餘先儲起,用一邊月供一邊儲蓄的策略。
現時大市只是合理區,你現有資金可以先投入一半,用"分注"形式,慢慢買貨。餘下一半和每月所儲倒的資金,就等大市出現一定程度的下跌,才大力度掃貨。
------------------------------------------------
Q21746:
你好!我從來沒有接觸過任何股票,沒有任何投資,我只有五萬多元港幣積蓄,長期放在銀行做定期存款,可惜利率很低!我只是想短期(半年)賺一些。
請問,00968「信義光能」好,還是00135「崑崙能源」好呢?
龔成老師︰
首先,你要明白一個正確的財富增值方法。其實係長線去持有一些優質股,等佢地自然增值,以達至財富增長架效果。
半年只係一個好短架時間,唔係咁理想。一隻優質股,最少要持有3-5年,甚至更長,個財富增值效果才會明顯。
信義光能(0968)本質不差,業務保持有一定的增長力,股本回報率處高水平,加上現金流強勁,是有一定質素,可長線投資的股票。
現價合理區頂,如果想入,要慢慢分注,但仍不是大注投資的時候。這股股價上落都大,要注意金額。現價算合理區頂,如果想入,要慢慢分注。
昆侖能源(0135)雖然質素都算有,但不是最高質類別,佢對油價較為敏感。佢的產品自主力較弱。
石油是商品,當中沒有差異性,佢地要將石油賣出,只能跟國際油價,這令佢地處於被動狀態。沒有價格自主的能力,這令佢地的獨特性有限。
這類商品企業,都可投資,但就要明白不是最高質的企業。由於質素中等,唔建議大注投資。
整體質素而言,信義光能(0968)會較高。但波動性風險,同樣都係較高。若你投資取態係較保守,我唔建議你持有太多。
------------------------------------------------
Q21747:
擔心好快出6G。而我對6G的技術上疑問是6G是否在5G的基建基礎?即是6G要發展,在現在的鐵塔上換6G的設備?還是要推返哂所有5G的硬件?
我相信是前者,就像港鐵一樣,港鐵舊列車就是5G比喻,新列車就是6G,其他硬件(車站、電纜、路軌是不變)
另外,鐵塔會否有一帶一路商機,他們大可以去中國以外地方起鐵塔幫其他發展5G?純粹代入管理層去諗,當然,電訊涉及國家安全,又是政治層面,又另一回事。
現代學習提升思考層次,代入如何我是鐵塔高層如何思考經營鐵塔
從你的千萬富翁本書學習到的,請師傅你不要介意,純粹是向師傅你交流來提升自己層次。向師傅你學習
而且單打獨鬥永遠睇唔到自己盲點,有互動交流是最好的
龔成老師︰
未來6G發展,相信訊息傳輸速度和精準度,會比現時5G有倍,甚至更多的增長。
至於將來6G技術,對相關硬件需求,集團要作什麼樣變動,去配合這種新技術學,現時都無一個切實的定案。
但由於3大電訊商為主要客戶,內地需求得到保障。在內地極高市佔率,有壟斷優勢。加上,本身已多行內累積一定技術和經驗。
將來要發展6G業務,相信集團很大機會成為當中重要的一員。所以,集團長線發展係正面。
至於向外發展,一帶一路係一個機遇,但當中都有不少不確定性,故估值上,只宜作一個參考。
你預佢潛力度無以前咁高,算係平穏增長,至潛力股之間的股票。此股有投資價值,但不宜過份大注。
------------------------------------------------
Q21748:
龔成老師你好!自2018年跟隨你的指引月供股票,歷經數年時間,都有穩定的現金流收入,謝謝你!
現有三條問題,希望老師解答一下,謝謝!
1. 早前第一次買科技股,選了阿里巴巴(9988),$246.8入,現在很波動,捱價中,請問公司前景如何?又可在甚麼價位溝貨?
2. 海螺水泥(914),大約$46@水平入了少許,請問公司前景如何?及
3)現有資金300k,如何逐步建立一個攻守兼組合?(已有兩電、置富產業、港鐵)
謝謝
攻守兼備組合
龔成老師︰
1) 阿里(9988)佢出左最新的季度業績,經營虧損76億元,主要由於國家市場監督管理總局就中國反壟斷法處以罰款182億元。
如果扣左這資罰款因素,經營利潤105億元,同比增長48%。經調整EBITDA同比增長18%,去到近300億。
業績略比市場預期差,因此會令股價短期較波動。
現價合理區中間,長遠價值仍在,不過短期會弱。如果你現有持貨,佔組合比重唔多,現價可再加1注。之後,每回10-15%左右,再加注就可以。
但緊記,個別企業唔好佔組合15%以上,以免出現過度集中風險。
2) 安徽海螺(0914)有質素,有增長力。
佢主要從事生產和銷售熟料和水泥製品,業務地區包括中國東部、南部、西部、中部及海外。而安徽海螺是水泥行業中,全球最大的單一品牌供應商。
水泥屬於基礎原材料行業,對建築行業有很高的依賴性,同時亦會與經濟增長速度有較高的相關性,特別與固定資產投資相關。即是說,當中國基建及房產市場不景,水泥行業會比一般行業處較大的不利狀態。
另外,水泥企業在生產過程中,燃料成本佔總生產成本中約佔了超過一半。若能源價格出現較大變動,就會對企業成本造成較大影響。因此,當能源價格出現較大上升時,將引致安徽海螺的成本增加,影響其中毛利。
綜合來講,佢擁有相當規模、生產能力,有一定的質素及賺錢能力,而水泥行業長期將因中國城鎮化以及一帶一路的建設,仍然會增長,但不會像過往般快速,而是進入較平穩的時期,在本質上此企業不差,你現貨可持有。
3) 我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
你現時35歲,應以增值為主。2電(0002, 2638)、置富(0778)主要係收息,增長力較弱,故不要再加注。至於港鐵(0066),係可以。
建議你用「平穏增長股」 + 「潛力股」,去創造一個攻守兼備的組合。
若以你年紀計,2種股票比重,可各佔一半。潛力股始終有一定風險,如果你投資知識不高,或者想保守D,可較集中在平穩增長類股。而潛力股,可較小注。
現時大市只係合理水平,現金和股票最好各佔一半。若你持股佔組合不到一半,你可以多用一些資金,以分注模式入市。餘下資金,就等大跌市出現,才加大力度掃貨。
------------------------------------------------
Q21749:
老師中國平安依家值博率高嗎! 最近回到80樓下! 同埋 依家全球通脹升溫, 但係經濟又未 復甦 呢啲係咪叫惡性通脹!
係咪會有一輪大調整! 股票同現金嘅比例應該 佔幾多比較好 謝謝老師!
龔成老師︰
係全球大印銀紙下,而整體經濟未見明顯復甦,的確有機會造成滯脹。
但我地分析一隻股票時,宏觀因素係要考慮,但只係作輔助,主要都係睇翻企業自己本身。
中國平安(2318)有質素的,佢有規模,有品牌,近年的發展都不差,不過,股價有時會有少少波動,這主要受投資市場表現影響。
這股有長線投資價值,是平穩增長型。現價算係合理區中間位置,分注投資就可以。
至於會唔會大調整,我唔知。我地投資唔好去估個走勢,你應用平貴,去為自己制定投資策略。
現時大市只係合理水平,現金可以佔3-5成。
餘下資金,就等大跌市出現,才加大力度掃貨。
------------------------------------------------
Q21750:
你好老師,本人40,已婚,暫時沒有子女,我和老公收入合共大約5萬一個月,有一個已買了不用供的公屋。
現金大約有150 萬,另股票23萬,之前有月供股票,但因為升了就沒有再供款。
尤於唔識投資,想問點可以財富增值,買樓又沒有經驗,買債卷債基會隱陣嗎,謝謝你
龔成老師︰
若你係投資經驗不多,月供股票會係一個唔錯架選擇。因為佢用長線供款,去減少左買貴貨架風險。
所以,你以往月供架做法係正確。月供可以拉平均個買入成本,除非你對定平貴極有信心,否則你應長線一直供,不理平貴。因為咁樣,反而會對你更有利和安全。
以你40歲,可以選擇一些「平穩增值股」+「潛力股」作投資目標。
以現時大市合理區狀況,月供最好用一半每月儲蓄,另一半就先儲起架策略。
由於你投資知識不高,因此可較集中在平穩增長類股,至於潛力股,只宜小小注,最好是你提高投資知識,等你有一定知識,先慢慢增加翻潛力股比例。
現時大市處合理區,150萬資金,可再用多20-40萬,分注咁慢慢盈富及其他平穩增長股。到你有較多經驗,才加大投入金額和增加一些潛力股。
你可以先用股票做增值,到有一定財富,才加入物業類。如果你對買樓無乜概念,你可以睇我本<<5年買樓4步曲>>,都會講述一些買樓相關知識。
而債券,這其實只是「產品」,物業、優質股是「資產」,所以從財富本質上,我地應較集中持有「資產」,才對我地最有利(你可以睇睇《財務自由行》一書,我從財富本質上,講述了當中原理)。同時,現時息口低,但未來有機會重回加息週期,債券未必是最好的投資工具。
至於債券基金,坊間分好多種,你要小心睇,因為有d風險低,無乜問題,有d則有潛在的風險,絕對不是保本的產品,有機會出現了「賺息蝕價」的情況。
第一,有些基券基金,會投資「高收益債券」,即是「垃圾債券」,你一定要睇睇佢所佔的比率。
第二,債券基金往往不是單純地持有債券,而是可以作買賣,以及利用衍生工具作對沖等策略,即是可能有價格上的波動。
第三,不少銀行都會提供借貸,以槓杆去放大回報,以平息借貸去賺取息差。低息環境時間題不大,但進入加息週期,不止借貸成本增加,同時債券價格往往在加息期下跌,雙從打擊下,投資價值成疑。當然,若然加息步伐不快,息差利潤就可觀。
我不是說債券基金有問題,只是說明當中的風險,因為市面上的基券基金好多,你要仔細分析。
------------------------------------------------
Q21751:
你好,想問下基金風險較優質股票 及債券高
穩健為主 投資後者為上?
現在 港股,美股及人民幣又如何投資部署?以下3因素?
1)疫情控制
2)股市表現
3)政治穩定性
龔成老師:
基金有好多種的,因此好難話基金的風險較股票/債券高定低,因為有些基金是投資穩陣股票,有些是高風險股票,有些的投資策略較進取,有的則較保守。
你一定要清楚翻該基金的投資策略,投資目標等因素,先得。
至於股票,同樣有好多種,有穩健,有不穩。
債券都是一樣,有些債券好穩健,但有些則可能連本金都會虧損。
建議你增加知識先投資,不要急。
至於你上述提出的3個因素,主要都是一些中短期因素,而我地買股票就是買企業,因此,著眼點應集中在「企業的長遠發展」,佢的業務情況、前景等。
我地最重要是建立一個長期的「財富組合」,要優質,要平衡,要適合你的年齡與風險承受程度,不是著眼於短期市況及因素。同時不是買賣賺差價,而是成為你財富組合一部分。
------------------------------------------------
Q21752:
老師,想問下保險,2013年,我無啦啦在朋友講解下,用仔名義買了一份AIA保險基金,有人寿每月供hk$2000, 要供30年,期間可以提錢走,但要罰錢,或停止供款,直至30年期屆滿才提錢
現從你身上學了一點投資知識,於是計計回報,才發現每年得1%回報,現大約有hk$15萬。
我在宏利的基金回報都不止1%
我諗緊
1.停止供款, 讓它滾存,直到年期屆滿才提錢
2.停止供款,立即提取全部錢
3.停止供款,把每月的hk$2000用來買股票
老師,有何建議?
另外,講返261 。我去銀行放,銀行只幫我排隊放一星期,之後沽唔出,我繼續沽左幾星期都係沽唔出,怎麼辦?
謝謝你
龔成老師︰
我地保險,只要做好防守部份,買足夠保障,咁就可以。用來投資增值,效果未必如優質股理想。
你現時保險基金,按年只有1%回報,係好低。從長線投資角度考慮,你將佢資金提走和停止供款,將資金轉至其他優質資產,相信長線回報會較理想。
但由於當中會有提早贖回收費,你要問清楚你保險代理,這個罸款係如何計算,才決定基金內資金,如何處理,咁會較好。
GBA集團(0261)生意持續下跌,年年虧損,投資價值很低。
由於佢股價只有1仙,用一般架方法較難放。你可以直接打電話去銀行,只佢幫你人手掛一個少於1個仙的價位,出到貨的機會,會較大。
------------------------------------------------
Q21753:
老師,我最近計劃買約900萬的樓,但發覺 撇除家人的一百萬外,我倆還需要取大概一百五十萬左右(包括稅, 裝修, 律師費等),
所以如果要買樓,就要套現持有的大部分股票和銀行大部分存款。並且每個月還給父母錢和供款後,可能就只剩低二萬左右。
#1 在我的角度來看,我覺得呢個情況會變成了一個每個月收入償還貸款的死胡同,資產可能無法再增值,因為可能再無多餘錢投資股票。
但我男朋友認為收入償還房地產的貸款是增值資產的一種,前提是樓價最遠必升。老師,請問這種說法對嗎?
#2 如果三年後才買樓的話,我哋應繼續投資股票嗎?而且現金和股票持有的比例應該是多少?(我個人現時比例是 現金4 : 股票6)
#3 現時樓價暢旺,樓價長遠只升不跌,如果我們真的取得足夠的首期,而銀行又借足8成,但每月可能還款後只剩約兩萬收入的話,你認為我們應該買入嗎?
謝謝老師。
龔成老師︰
1) 正確,因為我地還款當中,係包括利息和本金部份,本金部份等同買入物業資產。
我地長線財富增值,唔係單單利用優質股,我地都要講求成個組合平衡性。所以,長遠我地都要將物業,包含埋係我地組合之內。
當然,大前題係個物業要優質,才算得上係資產。
2) 你都可以維持用股票增值,以大市水平計,你現金和股票比例,係合適。除非出現大跌市,否則你資金唔好動用。
而且,這些股票當中,應以「收息股」+「平穩增長股」為主,唔好持有太多波動性偏高的股票,以減低最終回報的波動性風險。
3) 你可以睇翻你本身置業有無迫切性,如果有,而你又"供得起",你都可以入市。因為置業後,你每月都尚有一定資金,可投入股市作增值。所以,問題不大。
若你無置業迫切性,你可以睇翻你個物業架質素,和租金回報率,去決定而一刻是否投資。
記住,就算樓價暢旺,長線港樓會升,但都唔代表你值得係而一刻,去"買貴貨"。我地都要從長線投資角度,去考慮而件事。
------------------------------------------------
Q21754:
龔成老師,想請教你,今年我43歲,堅持有十五隻股票,打算將組合改回十隻股票,你會建議我持有哪十隻令到組合會較平衡?
現在股票組合︰
潛力股
美團 300股
阿里巴巴 200股
平安好醫生100股
中國生物製藥2000股
楓葉教育12000股
平穩增長股︰
新鴻基地產 500股
領展500股
中興通訊 1600股
中國鐵塔 20000股
金沙中國800股
中國民航信息2000股
惠理集團 4000股
收息股︰
中移動1000股
中國電信 10000股
深圳高速公路 4000股
我打算賣出惠理,將資金換入金沙.尚餘約$70萬現金等機會.
如果跌10至15個percent加一注,會用第二次嘅買入價計算,還是用平均買入價計算?
Eg:第一注$30、第二注$38,平均:$34
另外想同你分享,20年前,出來創業,跌得好痛.
今年,我再次出來創業,開一個自己運動嘅studio.佢最差嘅情況去做呢件事,我反而係覺得係一個機會。
龔成老師︰
以你43歲計,這個組合比例係合適。
而當中股票,都係有質素,雖然有少少多,但唔需要刻意去沽出持股。你未來資金,較集中翻係當中較有質素的10隻,咁就可以了。
惠理集團(0806)是一家獨立的價值型資產管理集團,業務集中於大中華地區及亞太地區。集團透過惠理品牌管理多隻認可基金。
質素算是不差,但又不能稱為好好。
過往賺錢能力中等,但增長力就不強。你持有係無問題,不過就唔好對股價增長有太大期望。是平穩增長類。
整體質素上,金沙(1928)會較優勝,你可以沽少少,換去金沙,都係可以的。
另外,中興通訊(0763)、美團(3690)、平安好醫生(1833)是潛力股類,而且係不確定性較高的企業。投資係可以,但要控制注碼,不可佔組合太多。
大市現處於合理水平,你可以多用20-30萬,以"分注"形式慢慢入貨。餘下資金就等大跌市機會出現,才大力度掃貨,並長線投資。
至於加注計算方面,每跌10-15%個基數,會係用你對上一注的買入價。
其實做任何事,我地都會經歷失敗,這是在所難免。重點係,你有沒有在這個失敗當中,上了寶貴的一堂課。
創業好少一開始就好成功,成功都係透過無數失敗經驗,去慢慢累積出來。
現時大環境雖然尚是十分不穏定,此刻創業都有一定風險。但同時間,現時很多方面(如租金),都會比一般情況平,所以都有一定值博率。
最重要係你了解這門生意大方向,明白自己有什麼獨特優勢,將佢盡力發揮出來,咁就可以。
------------------------------------------------
Q21755:
成老師,多謝你一直以來的分享,呢2年鼓勵咗我哋好多好多。因為你分享對樓市的睇法,上年3月我低位買咗元朗溱柏單位自住,今日已經升左50萬,男朋友都升左做老公。
後來我有買你本《五年買樓四步曲》知道元朗南升值潛力有限,不過已經買咗自住,亦都完美解決咗我哋本金小但有自住需要的問題,真係好多謝你!
但前兩日收到個壞消息,政府收咗屋企前面塊地,係2023年起公營房屋,我哋打算努力啲賺錢買第二層,想請教一下老師意見。
目標係升值潛力大嘅天水圍濕地、白石角、馬鞍山等。元朗層樓係我名,買入價410萬,按咗8成7,老公(當時男朋友)做按揭人,當時銀行話我至少月入$30000先甩到老公名走,
我做老師嘅,目前26歲月入$24000,預計4年後先有$30000人工。
老公30歲,多謝你鼓勵年輕時要更上進,佢好努力寫文章分享、上電台直播增加知名度,成功月入4萬變6萬,亦都打算一至兩年短期內開自己店做自己品牌,預計開業成本50萬。
我計過扣除日常開支,月儲4萬唔係問題,呢家有20萬現金同投資咗6萬股票,各三萬
[email protected]
[email protected]
問題一:我唔知應唔應該繼續買股票?
問題二:3067同1798算優質股嗎?可以持有?
問題三:預計4年後買樓要點理財好?買以上三區可以嗎?
麻煩老師指點下我
龔成老師︰
恭喜你,完成左人生中2件大事。
其實,你則買的溱柏係自住樓,升值潛力唔係重點。最重要,係適合你們生活所需,而且做到"供得起",咁就可以。
而且你物業位置,都算接近港鐵站,質素會睇高少少。
1) 由於你1,2年就要動用這筆資金,去開診所。你動用這些資金增值都可以,但就要相對保守。
目標係一些「平穩增值股」+「收息股」,比例可以50:50。若你相保守些,可以「收息股」佔多D,甚至100%。再保守D,就係加入埋定期儲蓄這個選項。
到你老公要開診所前半年,就開始慢慢沽貨套現,唔好要用先一次過沽,以減低股價波動風險。
2) 安碩恒生科技(3067),有長線投資價值。若你打算將佢套現,去開診所的話。由於佢有一定波動性,暫時唔建議加注,等開完舖先再算。
大唐新能源(1798)主要在中國專注於風電項目的開發、管理及營運。
佢要從事風電等新能源的開發、投資、建設與管理,低碳技術的研發、應用與推廣,新能源相關設備的研製、銷售、檢測與維修等,與新能源業務相關的培訓、諮詢服務,以及房屋出租。
過往的業務發展不差,長遠都有投資價值,不過規模較細,唔建議投資太大注。
3) 到你老公新舖開張,一切穏定,可以再開始每月儲錢時。你就可以月供「平穏增長股」 + 「潛力股」,去做增值,累積置業資金。
你每月先用5成儲蓄月供,其餘先儲起,用一邊月供一邊儲蓄的策略。
至於餘下的現金,就等機會,當大市出現一定程度的下跌,就可以動用現金去投資,在平宜價加大力度掃貨。
3個你所講的置業地點,會以馬鞍山為最好。
白石角,是一個自成一隅的新社區,但這社區的設計,密集程度太高,同時配套不足,物業價值不算高。
天水圍始終同市區有一段距離,投資價值會較弱。
另外,我地做財富增值,除左講增值潛力外,都講組合平穏性。
由於你已經有一間物業,未來再買新物業時,會成個組合偏晒去物業類,會出現過度集中單一資產的風險。
因此,你唔需要急去買第二間屋。再投資第二個物業時,必需確保係買樓同時,都可以保有一定股票係手,作增值之用,才好考慮出手。
------------------------------------------------
Q21756:
你好,請問知唔知道比亞迪在智能汽車例如自動駕駛方面有咩進展?謝謝你
龔成老師︰
比亞迪(1211)係智能車聯網上,一直都在發展,2020年8月,比亞迪DiLink3.0系统上線,進一步為AI、語音識別、車聯網、大數據等技術升級。
2020年,集團同時入股深圳華大北斗科技,相信係為令智能駕駛部份,佈局變得更完善。
以集團規模和經驗,相信長線智能汽車發展,會係正面的。
------------------------------------------------
Q21757:
老師:唔好意思,又打攪你
請問現時持有幾隻科技股最近都跌左好多,我唔知應該跌左咁多再加注,定止蝕轉其他優質股
以下是持股資料:
9988 200股 買入價243.5
9618 100股 買入價329
981 500股 買入價27
謝謝!
龔成老師︰
你唔好將個重點,放錯左係買入價,或者帳面賺蝕上。
我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
你現時持有股票,都係有質素,可照持有。
至於是否加注,就要睇翻你成個組合配置,同股價處於什麼水平。
你上述的都是潛力股,佢地有一定風險。若你係較年青,這類股票佔你組合,可以5成。但若你較年長,或者投資經驗較淺,就要向下調整。
以股價計,現時阿里巴巴(9988)和京東(9618)都合理區中上位置,若你資金足夠,現價可以加1注。
中芯國際(0981)業務有增長力,質素係有,但未到最高質素。
加上之前熱炒過,股價大上大落,投資要注意風險,這股唔建議大注。
------------------------------------------------
Q21758:
依家上緊你既堂,真心覺得你教緊既野同坊間既炒炒賣賣好唔同,我想賺多D錢!麻煩你幫我睇睇有咩可以改善(其實我有個目標...就係好想將來係澳洲買樓!)
我今年29歲,男友33歲,打算2/3年後結婚。
我2018年開始買股票,現有大概10萬月供股票。(其實係咪keep住月供會好d?因為依家係不定期咁買...)
388~34股($253.36)
66~310股($43.45)
1928~1手($34.57)
823~134股($66.98)
1177~136股($7.33)
2800~724股($29.7)
1448~2手($7.13)
6823~2手($9.96)
2638~2手($7.49)
1. 我自覺賺既幅度較細,係咪時候要審視投資上既配置?因為太保守變左增長/潛力唔夠?如果真係潛力唔夠,請問有冇邊D股票係有機會做到3年後有30-40萬?
2. 黎緊就畢業,要還學債。我有諗過襯審視配置既同時,將66賣左還左部分學費先?
3. 我覺得係儲現金方面做得冇咁好,其實咁既年紀,儲現金比例應該大約佔資產幾多成?
4. 如果我想達成係澳洲買樓既目標,應該可以點做?
我會視老師為我理財上既榜樣...希望有一日我地都可以好似你咁做到財務自由。
感謝和辛苦老師你花時間詳細解答我地既問題,祝老師身體健康,大家一齊努力
我仲有1手 8473,$0.34買入
龔成老師:
1)潛力度的確唔算強,以你地的年齡及投資目標,其實收息股如港燈(2638)、香港電訊(6823)其實未必適合,你可以考慮轉換部分潛力股。
當然,平衡組合都好重要,你太過進取都唔得。
安碩恆生科技ETF(3067)、阿里(9988)、騰訊(0700)、港交所(0388)、舜宇光學(2382)、小米(1810)、GX中國電車基金(2845)、中生製藥(1177),其實都可考慮。
但就要明白波動性比上述會高左,同時風險大左,你要自己平衡。部分要等回少少先入。
現時你月供的,都是有質素,但可以轉多少少在潛力股類別。
2)如果利息唔高,其實唔需要太急(當然,我唔清楚你當中的條款),至於港鐵(0066)其實有質素及基本增長力,在配置上,可留,如果真的要賣股票還學費,就賣收息股。
3)我地會考慮你年齡及現時的市況平貴度,你可以留3成現金左右。
4)你現時應該著重「增值」層面,目標是利用儲蓄及股票,去追到的目標樓價的數。如果你打算在1、2年內買樓,就未必適合放太多錢去投資,但如果你3年後先會買樓,就要好好利用這段時間去進行增值。
因此,你的方向應該是投資「平穩增長股」+「潛力股」。
至於彌明生活百貨(8473)業務不過不失,發展能力中等,不是高增長的類別。
以佢現時的經營情況,算是合理價,但這股始終規模不大,加上近年的盈利有下跌情況,存有風險,因此不建議太大注。
另外,政治相關因素,都會令這股波動,要明白股價風險,政治因素是好難預測的。
這股唔建議持有太多。
------------------------------------------------
Q21759:
龔老師:本人手持以下股票,可否繼續持有?還是就算損失也要減持?
我之前買了些股票,買入大跌,但一直不捨得減持,到後來忍痛減持,它又回升,當然仍未回家鄉,但起碼損失少点,所以眼見以下股票近來股價不濟,怕又重蹈覆轍,請老師指点一下!
9988 :1500手均價$249
388 :800股均價$441
1288 : 2000股均價$3.2
1339 :1000股均價$3.48
1398 :1000股均價$5.11
003 :2000股均價$12
3690 :200股均價$266
6618:200股均價$133
1810:200股均價$31.85
1024 :200股均價$235
另外,後想問:其实買股票心態應是怎樣?我想買股票心態是:增值財富。假設快手當日我$115有一手,去到$370(或者應说去到自己心中的底線那刻)是否應 take profit 先?
還是放在床底讓它滾下去(假設我不急需那資金)?像這快手,當時我沒有放,之後見回落,我就入多一手,結果現在繼續下滑!請龔老師指導下本人心態!
盼望老師回覆!!謝謝!
龔成老師:
最重要不是睇「賺蝕」,不是睇「買入價」,而是睇質素。質素不好,增長力弱,就有可能賣出,蝕都要賣。
你要分析「之後的組合情況」,不是過去,是將來。應該持有那些優質股,比例如何,能為你帶來怎樣的長期財富。
你要分析你的投資目標,你想潛力股的比例多少?平穩股的比例多少?組合風險程度如果?
即是你想設計一個怎樣的投資組合?長期、優質、平衡、適合你。
你持有的股票,並不是無質素的,基本上都可以持有,但有兩點你要注意,第一,你要做好配置,例如你不少是銀行股,就會有行業集中風險,你要持有優質、平衡的組合。
另外,你有不少股,都是近一年熱炒的股,反映你在選股時,只懂跟市場去買,而這動作是危險的,因為當市場熱炒過後,股價一般都會大幅回落。不過,你上述持有基本上都有質素的,只是你日後要注意翻這點。
第二,你要留意平貴度,如果一隻優質股過貴買入,你都有可能出現損失,如果未有企業價值概念,就多用月供或分注投資模式進行。
至於你問快手(1024)的問題,我地會見到,有時股價上到某個價位,賣出等跌再買入,會有較高回報。而有時又會見到,一直持有會有較好回報,例如港交所(0388)、騰訊(0700)都是升值100倍。
而根據統計,後者的方法,能令投資者有較大的總回報。
當然,有時股價真的貴,都可以考慮賣少少,但點都建議有基本的貨在手,因為長線持有的贏面始終較大。
------------------------------------------------
Q21760:
龔sir您好, 上緊您既堂, 有d問題想請教下您:
我今年31,同我先生月入約40k
-有40萬股票(水桶1-3都有)
-有20萬存款同埋
-有兩份重有10年要供既儲蓄保險(每月大約供$3000)。
1.我地本身同緊屋企人住(層樓有我名), 但都想換樓, 而家住個到始終都舊, 您會建議樓換樓還是過多5-10年等有返d錢先再買多層樓再將而家呢到收租? (而家層樓值450萬, 睇過現時租金大約可以放到11k一個月)
2. 未來一兩年想試下開間餐廳(我先生係廚師),我同我先生想選址係將軍澳, 因為人口密度較高人流較多, 想請教您有咩睇法。十分感謝!
龔成老師:
1)以累積財富的角度,遲少少先換樓會較好。
首先利用這刻的資金投資股票,先將財富增值,到5年後先換樓,這樣可以有更大的總財富。因為現時股票的增長力,好過香港樓,因此先投資股票會較好。
當然,你自己要考慮自住因素,因此可以在兩個方向取平衡。
2)其實都可以的,有人的地方就有這個需要,而將軍澳是住宅區,你地的方向應較為街坊。另外,要記住做生意技巧,食物是其中一環,但生意會更重要,想想麥當勞你就明。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
中芯 南方 在 龔成 Facebook 的最佳解答
【龔成問答信箱】(Q21681-Q21700)
Q21681:
老師,上完你整個課程,雖然我仍有d唔明,但我想信每天一點一滴去溫習你既notes,我會一步一步進步
我最感恩就係,依加個市上上落落,我都可以放心。因為你教識我,只要持有優質股,不用驚短暫股價既波動
1) 其實之前教既市賬率,市盈率,現金流,折現率...要計數既部份,係咪知下就得喇?
最重要係學會第6,7課既企業評估表,對嗎?
2) 你功課590話每股盈利增長係負數,即是代表什麼?
3) 老師,恕我能力偏弱,我唔識你評估表某些指標的意思,即是搵咩資料:
-生意與盈利保障程度高
-管理層理性
-總負債÷股東權益<100%
-負債的增長不過快
4) 老師,除了590外,還做了669,1211,發覺自己做多了一點,開始知d數據去邊度搵,熟習了一點。
但係指標好多都唔識做,唔能夠理性去分析,只主觀地表示 ✅或❎,甚至唔識做
5) 老師,想問下英磅走勢,你有何意見?
6) 老師,你課堂的第7堂內容非常豐富,如果分2堂講會好d
想問功課
7) 行業市盈率,照網站所示的寫下答案,還是搵返相近市值的股票公司作比較
如六福網站show 行業市盈率是35.47。
而其中 1856依波路 的PE 是710。另外,5間市值最大的股票(周大福,六福,周生生,冠城,力世紀),
當中係無盈利的,即無shows PE,係咪只計頭3間的PE? 還是照抄網頁的數字?
龔成老師︰
1) 唔係,其實這幾個是一些較主要的分析方法。除左用企業評估表中,去判定一間企業長線質素外。
我地都需要詐透過這些方法,去幫助我地計算合理值出來。因此,你係要比時間去了解的。但現金流折現法,會係較為複雜。初學者,可以先掌握其他幾個先。
2) 這個負數,係代表每股盈利由2019年去到2020年,出現66.4%的倒退。
3) 生意與盈利保障程度高︰好似一些公用股,市民基本上經濟好與壞,都要持續消費,故保障性會視為高。(六福0590︰算係一般)
管理層理性︰這個你可以睇佢市場策略,和多年年報。例如公司已經負債累累,市道又不好,還盲發展,可視為不理性。
又或者佢數年前,有些大計。但最終無疾而終,甚至朝令夕改,當經常有咁架情況,就算是不理性。(六福0590︰開店速度理性)
總負債÷股東權益<100%︰主要睇長線償債能力,你可以係BOC網站,財務比率個頁,就可以找到。我地一般要求,少於100%為之好(第7堂SLIDE45)。
但你留意翻,近年由於國際財報標準更改左。一些有較多租舖的業務,例如零售,好似六福這這類企業,我地會將個指標,調升為<150$%都接受。(六福0590︰34%)
負債的增長不過快︰你可以用過去多年數據作比較,如果負債增長較快,而負債相關的指標又明顯變差的話,你就要留意。(六福0590︰負債不多)
4) 這些係需要經驗去慢慢磨鍊出來,你預分析頭幾間,都係會有咁架情況。當你唔明,就睇翻NOTE,自己要多溫書,推論,之後真的都唔明就INBOX問我。
開頭係會較困難,但當你累積到一定經驗,你就會知道面對不同企業時,分析應該係點做。
5) 我對英磅無研究,比唔到實質意見你。但建議你除非有實際用途,否則唔好似貨幣,作為增值渠道。
在投資的角度,外匯不是最好的投資項目,因為說到尾,這些都只是一些貨幣,即是「政府借據」,貨幣中期會以週期的模式運作,但長期來說,都是貶值收場,因為貨幣只有「交易價值」,並無真正的財富價值。
而我地進行財富增值時,應該集中將資金投放在真正的資產,如物業、車位、優質股等。
6)要研究下。
7) 行業市盈率,我建議你找同業,最好係產品、質素、規模都相近的公司。你現時分析六福(0590),你可以用周生生(0116)、謝瑞麟(0417)、周大福(1929)作參考。
依波路(1856)無論業務內容和規模,都不適合用作參考。加上過去幾年都虧損,令市盈率數據較異常,故不要將佢加入考慮之列。
你用水牛網,找到這幾間企業過去10年市盈率的4個中位數。再用這4間企業市盈率的上下限,去取出平均值,就是行業市盈率。
(即係4間企業的4個中位數,"最細"和"最大"的數字分別加起,再除以4,就是行業市盈率之上下限)
行業市盈率約為︰10 - 14倍
------------------------------------------------
Q21682:
你好,請問對退稅年金有咩評價?始終感覺上好似長時間鎖住舊錢 係唔係比較適合上左年紀而又無咩免稅額既人?
龔成老師︰
年金產品,主要係提供穏定現金流﹐較適合退休人士。
因為較年青人士,應先做好財富增值,這類產品就不太適合。
但同時,你都要睇翻佢節稅能力,同你將同一筆錢,去投資所得回報作比較。
因為投資回報始終有不確定性,而節稅金額和收取年金,係保證。若2者回報係接近,退稅年金就可以考慮。
------------------------------------------------
Q21683:
老師 你好,我手上現有1316 $13.7 有兩手, 1137 $16有1手 及圓通6123 $6.2有2手 請問可以繼續坐嗎?
龔成老師︰
持有一隻股票與否,唔好單單係睇中短期架帳面賺蝕,應從佢本質著手。就算而一刻帳面出現虧損,只要佢長線質素無變,照長線持有就可以。
你以上3隻股票,都係有質素,若你係年青至中年人士,係適合你長線持有。
耐世特(1316)本質中等,之前業績有點弱,但又唔算好差。你持貨唔算多,只係2手,照持有就可以。但因為質素始終不強,你預佢增長力之會係一般,不建議加。
香港電視(1137)業務有前景,但你要留意,佢有兩點都存有風險的。
第一,佢都會依靠人的因素,王維基成為了公司最值錢的資產,佢的想法好多,有生意頭腦。
第二,這企業現時搞網購,有增長力的,但同時存有一定的未知數。疫情過後的增長力會否減慢?故此股可投資,但不建議大注。
圓通速遞(6123)本身係一家以香港作為總部的國際貨運代理服務供應商,業務已擴展至多個國家,並在亞洲、荷蘭及北美設立了幾十個辦事處。
佢主要經營以下四項業務:空運及海運貨運代理服務、總銷售代理、配套及合約物流服務。
早前阿里巴巴(9988)入股增持,令股價大上大落,這的確會令企業有更多發展,前景正面,不過,估值方面已難。
因為這刻根本無法計算佢,之能賺多少錢,企業發展情況如果,只可以話好多不確定性,但股價就反映大部分利好因素。
因此,這股雖然有發展,但同樣股價上是有風險,相信之後的股價仍會波動。你現時只投資小注,係無問題,但要明白風險因素。
------------------------------------------------
Q21684:
Hello Sir, 我上年喺股市最旺盛嘅時間下入市, 本金80萬, 今年2月由賺20萬到今日我已經蝕咗本金30萬.
升唔識食糊, 倒跌至一個位係我覺得不能承受要止血我唯有放。而家我倉位得返50萬⋯⋯
9618 $330
1810 $25
992 $10
2269 $108
388 $515
1833 $135
請問以上股票係咪都係好股?我唔等呢筆錢用, 我其實可以長期持有, 但係長線持有係咪都要止蝕?
我知你比亞迪由$80跌落去你都冇放棄過...但係我冇這份信心
Sir, 我應唔應該放一些新經濟股轉買舊經濟股?例如1299, 5..etc
先謝謝你的解答
龔成老師︰
你同好多散戶一樣,都犯左個錯誤,就係覺得「買入價」﹐係一個神聖的指標。
記住,不要用自己的買入價作為何時沽出的指標,也不要以回本後沽貨作為策略,同時,更加不要抱著「賺了多少就沽貨」這心態去投資。
沽出是基於這股已偏貴,又或沒有前景,質素有問題,而絕非由買入價決定。
相反,若你分析該企業的係有前景,就算中短期股價波動,令你有賬面虧損,我地都唔應該沽。
你以上持股,都係有質素。但有個問題是,你太集中係潛力股類(除了聯想0992,其餘都係潛力股)。
佢雖然有增長潛力,同時風險都較高,不宜持有過多。
若你係較年青,潛力股可佔約5成,餘下應用以下平穏增長股。但若你投資經驗較淺,潛力股比重,要再調至3成以下。到你學到一定投資知識,才慢慢調高。
未來時間,你就要加大翻平穏增長股部份,令組合更平衡。
平穏增長股:盈富(2800)、金沙(1928)、恆基(0012)、港鐵(0066)、友邦(1299)、平安(2318)、粵海(0270)、領展(0823)、希慎(0014)、太古地產(1972)、長建(1038)
匯控(0005)只係收息股,無乜增長力,如果你係較年長或者好保守,都可以加入佢。
現貨要否沽出部份,去換碼至平穏增長股,要睇翻你組合大小。如果金額較多,你可以沽出部份換碼。
但若金額較細,可能每隻只有1,2手,咁你照持有就可以,用新資金去令組合慢慢回復平衡,就可以了。
------------------------------------------------
Q21685:
龔成老師你好,本人女性今年32歲, 穩定月入6萬3. 戶口僅保持10萬儲蓄應付不時之需.
以往旅遊購物月月清, 最近終想通生活目標, 學習緊斷捨離多儲錢增值自己
經朋友介紹認識你, 希望學習投資重新出發
背景:
資產:3年前8成按購入5M新樓
固定支出28k(供樓,家用,租金,保險)
日常支出希望維持7k
長遠目標:
希望可以5年內換樓
現在目標:
想學習穩定增加資本, 等待時機買dream house (10M)
本人BB班, 過往無投資經驗或概念, 完全唔識股票; 希望得到老師指點初部方向, 建立action plan 一步一步增加財富, 謝謝你。
龔成老師︰
首先,你要改變以往不好的理財習慣,你試下每日記低自己每項支出,再睇翻有無邊D係無必要,盡量空出多一點資金,去做投資增值。
你現時有明確目標,就係細屋換大屋。由於你已有一間物業,我地現在要做的,就是透過優質股,去幫你累積一筆資金,達成你換大屋目標。
你可以選擇一些「平穩增值股」+「潛力股」作投資目標。
以現時大市合理區狀況,你可以考慮用部份儲蓄,進行月供股票。你可以每月先用一半儲蓄,另一半就先儲起架策略。
由於你投資知識不高,因此可較集中在平穩增長類股,至於潛力股,只宜小小注。此期間,你最好是努力提高投資知識,才慢慢增加翻潛力股比例。
餘下現金就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
到5年後,你可以慢慢套現股票,去實行換屋大計。
但緊記,我地財富組合,唔好偏重係個別資產類別,要平衡,樓和股票都要有。因此你換樓時,唔好股票盡沽,要留有一定數量,可以用來持續增值,才算理想。
------------------------------------------------
Q21686:
老師好,我而家最主要係糾結好唔好買樓,如果買嘅話幾時買,買咩價位嘅單位好。
今年30歲,月入9萬,和父母住。每月支出1萬至2萬。
現金儲蓄 210萬左右,強積金27萬
投資方面︰
大部分2800,有82萬左右
最近加多咗啲水桶一,加埋大概50萬左右(不過好似有啲心急咗應該分細注啲注入)
2800 - 平均價 23.2, 29000股
3188 - 平均價 60.1, 1000股
1810 - 平均價 24.9, 5200 股
1177 - 平均價 8.31 , 13000 股
788 - 平均價 1.12 , 80000 股
0027 - 平均價 65.2, 1000股
388 - 平均價 451, 100 股
遲啲諗住加埋美股 台積電。
而家亦都開始做緊月供:銀河,港交所,小米,中生 每隻5000蚊
買樓方面,唔急住自住,可能都係當投資+- 收租
自己一兩年後亦都有機會想搬出嚟租屋住或者住返買咗嘅appartment, 不過我就係度諗,買樓咁麻煩又要交差餉管理費,可能仲要比錢裝修。
到底對我嚟講呢個係唔係一個合適嘅投資呢? 如果係嘅話我咁嘅情況應該買咩類型嘅單位好呢? 定係留返啲錢遲啲買股票好?
龔成老師︰
我地投資,除左要選擇一些適合自己的優質資產外,組合的平衡性,同樣都係好重要。
若你無實際需要,我建議你先同家人同住,節省更多資金用作投資。若你無自住急切性,可先從投資角度去考慮,現時股市值博率相對樓市較高,加上你己有一間appartment,我地應先從股市這裡入手。
以你30歲計,投資應以增長為主。你現時持有股票,和月供計劃,大致上係可以。
但月供上,有少少偏重係潛力股(1810, 0388, 1177),風險會稍高。未來可以加入一些好似盈富(2800)的平穏增長股,令組合更平衡。
另外,我建議你每月儲蓄最好可以做到,係收入一半,即係$45000。其中$25000作月供(加多一隻$5000平穏增長股),$20000儲起。
平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、長建(1038)、領展(0823)、希慎(0014)、太古地產(1972)
現時大市只在合理區,現金和股票,最好各一半。你現有資金可以用多少少入市(美股、台積電、港股都可以。)。餘下的資金,就等大跌市才動用。
至於物業,現時香港樓市係合理區頂部,投資價值未算好高。但若你此期間,發現一些有質素,又平宜的旬盤,你都可以考慮用現有資金入貨,之後放租。
因為,我地長線財富組合,唔可以偏晒係股票類,都要加入物業類,令組合更平衡健康。
但由於現時物業值博率不高,你可以集中股票先。而買邊類物業,我會建議初階投資者,先從住宅開始。
若資金較少,可以先入手較細單位(但最好都有300呎以上),但必需要有質素和投資價值。你可以睇我本<5年買樓4步曲>,會對物業投資,有較完整解釋。
------------------------------------------------
Q21687:
龔老師你好,我30歲,剛在美股損失了很多,差不多70%身家!現持有︰
941*47蚊入
6618*160入
939*6蚊入
現打算月供2800 和6818
現金只餘下數萬元!
你覺得可以嗎?還有機會番身嗎
龔成老師︰
係而個時候,你唔好先諗翻身問題。你要先想清楚,美股出現重大損失的原因。
美股雖然近期係較波動,但不至於7成上落,所以你投資技巧和方法,一定係出左核心性的問題。
記住,我地買入一隻股票,就等同買入一間企業,一定要知道佢質素、行業前景、財務狀況等,才去考慮否投資。
當我地確認係值優質股後,我地會用平貴定入貨策略,並長線持有。而唔係做短炒,去賺差價。
更加唔好用衍生工具,或者槓桿,因為好難玩,個風險會好高。
你現時持有股票,都係質素。但中移動(0941)和建行(0939)只係收息股,增長力唔會太高,以你30歲計,有點保守,建議不要再加注。
至於月供方面,你可以投資「平穏增長股」和「潛力股」。你每月5成儲蓄,其餘先儲起,用一邊月供一邊儲蓄的策略。
你所選盈富(2800)係可以,但中國光大銀行(6818)都係收息股,唔係咁適合。
選股上,你可以投資在平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、粵海(0270)、領展(0823)。
潛力股可選安碩恒生科技(3067)、比亞迪(1211)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)、GX中國電車基金(2845)。但佢地波動性和風險會較高,你要自己平衡。
你現時無太多投資經驗,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。
到你有一定投資經驗﹐潛力股比重可以相應調高,佔組合約3-5成。
餘下的另一半現金,我地就等機會,當大市出現較大回調,就加大力度掃貨,然後作長線投資。
最重要係,你要努力學習正確投資知識。只要你能運用正確投資知識和技巧,長線回報一定會唔錯。
而一刻你可以先做月供,但你再加大投資前,要先了解過往失利原因所在,才好再投入更多資金入市。
------------------------------------------------
Q21688:
龔sir你好,我是一個新手,想試吓買少少投票賺少少外快。我聽別人介紹買"美團"但不知從何入手,求指引
龔成老師︰
首先,你要清晰一個好重要的投資概念。我地投資股票,其實等同投資一間企業。希望透過其自然增長,以達至財富增值的目的。
所以,我地投資一定係長線(3-5年,甚至更長),而唔係短期炒賣,去賺差價。
美團點評(3690)有潛力的,過往一直虧損,到近一年,開始有正現金流,這是一個實質的利好因素,因為之前一直在燒銀紙,現時初步見到成效,不過,估值的方法好虛無,因為現時的市盈率仍過百倍。
如果有利好消息,佢可以上好多,但如果估值修正,股價可太跌。
只可以話,潛力是有的,現價唔算平,之前明顯貴,之後回翻好少少,大約合理區頂,不過,一定不能大注。小小注,是較好的做法。
------------------------------------------------
Q21689:
龔成老師,你好,最近在facebook發現到你的專頁, 發現你回答讀者問題 提供的意見務實而有用, 非常欣賞 。希望你也可為我提供一些意見
本人32歲,未婚,與家人同住,沒有租樓壓力
月入22000, 擁有積蓄70萬。
一路以來都沒有意識到投資嘅重要,只係識儲錢擺銀行。 直至最近意識到錢擺銀行,遠追不到通脹。
直至上月開始學投資,由於好多嘢都唔識 同唔了解,所以暫時都係偏向保守 型投資。
1.)我放咗三十萬在銀行做咗個守約儲蓄保險計劃,年期8年
8年後可拎到38萬x,平均年利率3.6厘
請問老師你認為呢類型產品做得過嗎?定還是 只年期長回報少?
2.) 想放十萬 在股票市場,暫時手持:
中國移動一手
香港電訊一手
盈富基金一手
中國銀行3988一手
二南方納指500股
(啱啱投資就遇著跌市😅)
請問以上嘅組合可以嗎 或有冇更好的建議可供參考?
3.) 另外想投資15萬 到保險公司購買基金或 月供 盈富基金/voo
請問老師你會比較推薦哪一樣?
我希望呢15萬嘅投資係比作一個中長線嘅儲蓄
非常感激, 期待你回覆
龔成老師︰
1) 這類保險產品,係穏陣,但增長力好弱。持有太多,會拖慢左你財富增長力度。
你若真係想保守點,持有係可以,但金額上要作出平衡。
2) 當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
例如初期投資較有潛力股票,令財富增值較快,到一定金額後,可轉較平穩增值的股票。最後有相當財富時,才換成收息股去為自已創造穏定現金流。
以你現時32歲去計,應以增值為主。中國移動(0941)、香港電訊(6823)、中行(3988)主要係收息,增長力唔高,不宜持有太多。現貨可持有,就不要再加注。
二南方納指(7266)係追蹤納指表現,納指升1%,佢會升2%。但相反,當納指回調,你架損失會係雙倍。這類槓桿ETF,我唔建你用,風險太高。
若你想投資納指,可以投資美股Invesco QQQ Trust(QQQ) ,是追蹤納斯達克100指數,會較適合你。
將來時間,你可以投資「平穏增長股」和「潛力股」。
如果你現時無太多投資經驗,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。
若你有一定投資經驗﹐潛力股比重可以相應調高,佔組合約3-5成,視乎你投資經驗多寡和了解這些股票程度而定。
3) 3者都可以,但由於基金一般都有一定收費,長線拖低你回報。除非你肯定佢長線回報,會明顯優於大市,否則你投資盈富(2800)或VOO,會較為理想。
但留意,現時大市只係合理區,未到好平。資金一定唔可以盡用,而且係要分注咁,慢慢入貨。餘下資金,就等大跌市,才出手入平貨。
------------------------------------------------
Q21690:
Hello龔sir,我睇咗你本“股票勝經”,都成日睇你Facebook page嘅video同解答網友投資問題,穫益良多,多謝你!
我呢排都買咗少少“安碩恒生科技”3067嚟長線投資。想請教吓,你點睇“華夏恒生生科”3069,同3067相唔相似?係唔係長線投資嘅好選擇呢?
龔成老師︰
華夏恒生生科(3069)主要係追蹤恒生香港上市生物科技指數之表現,係一隻不錯的ETF,值得長線投資。
指數包含51隻成份股,當中有「藥品」、「⽣物技術」等公司。較為人熟識的,有藥明生物(2269)、京東健康(6618)、中生(1177)等等。
隨著人口老化和人均收入增加,對優質醫藥的需求只會有增無減。此股都有質素,可作長線投資。但你預佢會較波動,最好用月供模式儲貨,並長線。
但留意,華夏恒生生科(3069)和安碩恒生科技(3067)都係潛力股類,風險會較高。
假設你算係年青,佔5成左右好了。若你投資經驗較一般,比重就要再下調少少。如果你係接近退休之年,這類股票風險太高,就不太適合你了。
------------------------------------------------
Q21691:
龔成老師,我有個問題請教一下,我是澳門的,我打算一年半後結婚,現在和家人一起住,結婚後大機會和老婆家人住,
我比較偏向買鋪位,但可能要結婚後才夠錢,我是否應該在結婚前先用了青年首次置業先買個唐樓,到之後再用唐樓換鋪位?
結婚費用我工作一年半是完全足夠的,買唐樓首期現在是足夠,但鋪位就不足夠。
龔成老師︰
你都可以用這個方法,以資產追資產模式,去先買唐樓,再增值後轉買舖位。
至於澳門的青年首次置業計劃,其實我唔太清楚具體情況,細節位未必好清楚。
但首先,你要睇翻這唐樓是否有質素和投資價值,唔好純粹因為個價你可以承擔,就盲目出手,最緊要睇佢升值潛力和租金回報率,是否合理。
同時間,你要考慮你用左這個首置機會,你將來要自置自住居所時,就不能享受高成數優惠。
另外,投資舖位,對投資物業技巧要求較高。若你這方面經驗唔係太多,你就可能要提升這方面知識,才出手會較好。
若不買唐樓,你都可以考慮用優質股,去為置業資金增值,都係一個可行方法。
至於結婚資金,你就不要用來投資。因為只有1年半時間,用來投資增值,風險會太高,最多只宜作定期存款。
------------------------------------------------
Q21692:
龔成老師您好,今日想主要問問好多人心目中既股王 騰訊 (700HK)。
我有睇過有人問過700而龔成老師覺得依家係係合理區頂部。騰訊現時PE為29到,以historical 10年PE average 35到,我用個PE range 24.5-52.1黎睇,
依家已經俾過往既十年黎講相當較平而股價區會由500-1050所以覺得580已經相對比較便宜,所以想問問龔成老師咩睇法?
同埋龔成老師每次都基本上會叫人留有現金,係大跌市既市時候買入優質既股票。騰訊由高位770跌到依家580差唔多已經跌左25%。
想問下依家係唔係到龔成老師成日講既大跌市,而呢個係買入良機長線持有?
同時都想問下之前都係百度220蚊,姐係由高位跌左差唔多4成個陣買入打算長線持有。
因為百度仲下跌緊到依家差唔多175蚊,上次220蚊買入又合乎龔成老師” 大跌市”的睇法嗎?
謝謝回覆!
龔成老師︰
騰訊(0700)本身已經好大好大隻,要再高速增長並不容易,雖然手遊的長遠發展仍會不錯。
但要帶動這股倍升,相信並不容易。所以,我地唔可以完全參考過往數據,要因應現有情況,作出合理調節。
當你運用過往的市盈率作估值時,要留意翻環境與企業的情況有無改變,當一間企業有較高增長時,市場會比佢一個較高的市盈率,而騰訊5-10年前,仍處於好高增長狀態,到了今天,是中高增長狀態,估值當然會有調整。
此股相信依然有唔錯增長力,但唔會去到以前咁高。而價算係合理區頂,如果你去到平,你預跌多3-4成,才算平宜﹐故現時未稱得上係明顯買入良機。
百度(9888)有質素,有獨特性,長遠發展不差。
佢係全球最大的中文搜索引擎「百度」的營運商,係內地用家搜尋資訊主要對口,用戶規模突破10億,百度App日活潑用戶超過2億,多個指標都處中國第一。
百度在規模和質素上,一定係有。
但我地唔好單純用比較現價和上次高位距離,因為早前科網股被熱炒,不少相關股票,都因而被大幅推高。
我地應用翻企業本身價值,去衡量佢現時價格水平,是否合理。
佢雖然已跌到$18X,但唔算係平,只是合理區頂至略貴水平。但長線有增長力,若無貨,現價小注投資係可以。
------------------------------------------------
Q21693:
龔成老師,一直睇開你嘅理財資訊,本人34歲,持有現金50萬左右,偏向增長組合。因為最近股市比較波動,所以想問吓老師意見。現持有以下股票:
1810 200×23
6618 350×130
700 600×100
883 6000×9.3
1928 1200×32.9
請問咁嘅組合係唔係有啲雜亂無章?想再增持1810同700,亦想加入823、981同2382,但未知合理價位同時好似業務有重疊。多謝老師嘅時間
龔成老師︰
你組合唔算好亂,整體上都有質素,係合你長線持有。
中國海洋石油(0883),質素都算有,但不是最高質類別,佢對油價較為敏感,所以,如果長遠油價向上,佢都會增值的。
雖然佢都有一定的規模及質素,但卻不是最高質素的企業,這是由於佢地的產品自主力較弱。
石油是商品,當中沒有差異性,佢地要將石油賣出,只能跟國際油價,這令佢地處於被動狀態,沒有價格自主的能力,這令佢地的獨特性有限。
這類商品企業,都可投資,但就要明白不是最高質的企業,不宜持有太多。建議你沽少少,換至其他優質股。
中芯國際(0981)、舜宇光學科技(2382)、騰訊(0700)現價算係合理區頂部,小米(1810)則是合理區頂至略貴,領展(0823)算合理區中上部。
這些股票,若你無貨,而價可以首注。但有貨者,建議再等佢有明顯回調,才出手。
小米(1810)、舜宇光學科技(2382)和中芯國際(0981),行業性質上有重疊,加埋不要高於組合3成。
另外,你持股和目標股票,不少都係潛力股,佢雖然有增長潛力,同時風險都較高,不宜持有過多。
以你34歲計,潛力股可佔約5成,餘下應用以下平穏增長股。若你投資經驗較淺,潛力股比重,要再調至3成以下。到你學到一定投資知識,才慢慢調高。
未來時間,你就要加大翻平穏增長股部份,令組合更平衡。
現時大市在合理區,你50萬現金,可以用多10-20萬,以分注形式入市。餘下現金,我地就等大跌市機會,才出手掃平貨。
------------------------------------------------
Q21694:
龔成老師你好,我最近經常睇你fb專頁同書本,裡面學到唔少,宜家想付諸實行!
我宜家22.5歲,工作左兩年半,現時人工26k,每年大概會加1.5k,開支方面: 每月家用10k, 儲蓄保險每月供款2.5k (為期五年,已供了兩年),
還有每月日常消費大概3k,剩下用作儲蓄/投資,我目標係二十五歲時有一個穩建成長及帶來現金流的投資組合,
而帶來嘅現金流則可用作再投資、儲蓄或支付日常開支, 例如每月交通費。
我本身對股票幾有興趣,炒左股一年半,雖然會自己研究下圖表、聽下財經節目,但係暫時都係輸錢,加上工作關係唔可以經常睇實個市,而且有時心理壓力都大,
因為有時啲股票好波動,可能幾日已經輸一兩成,所以我想改變下我現有嘅投資方法,以下係我嘅方案:
1. 自行睇位分注吸納科技ETF 3067, 剛在16.5入了第一注,每跌10%加注
2. 月供股票,每月供款金額約$10000
從以下每個板塊挑選一至兩隻月供,每隻供款金額約$1000-2000
- 穩定增長+收息為主 (第二個水桶)
消費板塊:1044 上月已開始供, 想加914可以嗎?
內房板塊 : 813 or 2007 (二選一)
金融板塊:需要包含嗎?如需要,心儀2628 or 659
- 高增長 (第一個水桶)
生物醫藥板塊 :1833 + (醫藥ETF?)
可再生能源、環保板塊: 未有特別心水(916?6865? 586?可以嗎?)
物管板塊: 823 or 3319 or 1821 (三選一至二)
科技板塊:981,1810,2382,9988,9618 (五選二至三)
每隻股嘅供款金額應該會一樣(e.g大概每隻$1000)但係有些板塊會供多於一隻(例如科技、消費、醫療,因為我較睇好這些板塊或者裡頭潛力股較多)
所以7個板塊投資嘅金額唔會係平均14%(100÷7),反而有啲佔比會重啲,有啲則輕啲
想問這個投資方案可以嗎?
還有我現持有以下股票,打算將部分分批賣掉,套現出來的現金打算儲下來留在跌市時分注吸納或用在月供
6186 2000股 買入價 24
2318 1000股 買入價 50
6865 1000股 買入價 34.5
285 500股 買入價 43.85
7226 1000股 買入價 9.96
189 2000股 買入價 7.5
6601 1500股 買入價 9.2
6049 200股 買入價 69
6110 1000股 買入價 12.6
2333 500股 買入價 23
3319 250股 買入價 35.2
9888 50股 買入價210
想請教下你,謝謝
龔成老師︰
你過去的投資方法和理念,都唔係咁正確。
我地投資股票,其實等同投資一間企業。希望透過其自然增長,以達至財富增值的目的。
所以,我地投資一定係長線,而唔係短期炒賣,去賺差價。因此,我地唔會係用睇圖表,這類技術分析方法,更加唔需要成日睇住個市。
另外,當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
例如初期投資較有潛力股票,令財富增值較快,到一定金額後,可轉較平穩增值的股票。最後有相當財富時,才換成收息股去為自已創造穏定現金流。
以你現時22.5歲去計,是財富增值的黃金時期。
你重點唔係要現金流去再投資,而係直接集中係一些較有增長力股票,去累積一筆財富。
"保險"只係理財中防守部份,買足夠保障就可以,增值可以留比優質資產(如優質股、物業等)去做。買太多,只會拖慢你財富增長力。
現時,你自行睇位分注吸納安碩恒生科技(3067) ,這方法可以。
月供策略上,你可以投資「平穏增長股」和「潛力股」。現時大市只在合理水平,除了月供外,每月都要留有一定資金,等大跌市才掃貨。
選股上,你上述板塊都可以。但內房負債較較高,不宜持有太多。而且一些不確定性較高的股票,都唔建議用來月供。
以下是一些較有質素的月供組合,你可以從中參考。
你可以投資在平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、粵海(0270)、領展(0823)。
潛力股可選安碩恒生科技(3067)、比亞迪(1211)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)、GX中國電車基金(2845)。但佢地波動性和風險會較高,你要自己平衡。
如果你現時無太多投資經驗,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。
若你有一定投資經驗﹐潛力股比重可以相應調高,佔組合約3-5成,視乎你投資經驗多寡和了解這些股票程度而定。
至於持股方面,如果有質素,我建議你長線持有。若你想留一些資金,捕捉大跌市機會,可以新資金來做。
怛留意,XL二南方恒科(7226)產品之投資目標為追踪恒生科技指數每日表現兩倍(2x)的投資業績。
雖然我長遠認為,恆生科技指數正面,但中短期可以較波動,由於這基金有槓杆,就會令價格更加波動,其實有風險。
我會較建議投資無槓杆的恆生科指ETF(3067),始終較好。
東岳集團(0189)、滔搏(6110)質素中等,唔建議持有太多。
朝雲集團(6601)不確定較高,不宜持有太多。若現時只佔你組合一小部份,可以持有。
------------------------------------------------
Q21695:
老師,我這次的置業目標,計畫的使用的方法會較為特別,我想和你分享一下。
我即將39歲,月入$29000, 已婚,有1小孩(即將6歲)。
我有1個物業(屯門兆康苑,已補地價),管理費$700, 做按揭時是自住的,現時已出租(月租$10500),按揭利率為H+1.23%, 2019年轉按了,轉按時銀行估價540萬,我借了6成,供款期為30年。此物業我在2010年買入,當時樓價115萬,做7成H按揭,一直收租至2015年結婚後自住。
我太太即將36歲,月入$36000, 2019年購入屯門新樓御半山自住,樓價666萬,做6成按揭,按揭利率為H+1.23%, 30年供款,管理費$1900.
現在我打算購置第3個物業作投資(名義上是我外父自住用途)。
我外父和外母現聯名持有1個私樓物業(深井碧堤半島)作自住(已完成供款),並持有1個該屋苑的私家車位(已完成供款)。
他們本身是舊制已退休的公務員,有長俸,外父(即將61歲)的長俸較多,有$30000, 我跟他們談過我的想法,但要他們將現聯名持有的物業改為獨名持有(外母持有),然後當我看中物業時,我外父便可用首置名義(投資)入市
若他能通過壓測的話便可做到9成按揭(樓價800萬或以下),30年供款,供樓戶口要用他名下的,直至按揭總額還款至低於6成方可改為我名義的戶口供樓,當然,所有相關費用,包括供樓會由我承擔。又假設我外父的長俸過不到壓測,也可加我做擔保人,但便只能做8成揭揭。
這樣,我便能合法地做到我想做的。這個物業會由我打理一切,雖然名義上不是我的,但我太太是獨女,就算當我外父、外母百年歸老後,物業仍會被視為遺產留給我太太。
這第3個的物業(嘉輝花園)我會出租,實行以租養樓。
龔sir, 對於我的計畫,不知你會有何評價。
而我和我太太預計會60歲退休
龔成老師:
方向不是不可,但有幾點要講翻。
第一,你地(我以整個大家庭作單位),將會持有4個物業(連同你外父外母聯名那物業的計),在整個財富配置中,其實出現了集中風險。因為我地投資,其中「平衡」都是好重要的,加上香港物業增長力最高的年代過往,我預期往後10年、20年,將會是平穩增長年代。
因此,如果從財富配置的角度,投資其他項目的回報,以及對整體財富的平衡度,將會是最好的。
第二,當涉及的人物愈多,就愈容易出現問題,始終大家都會有不同意見,每個人都是獨立個體,因此,如果日後有甚麼問題出現,會對你地的關係有所影響。
第三,壓力測試,我都唔能夠講得好清楚,佢是否能過關,你最好問清楚先好進行。
第四,買樓有一個好關鍵因素,就是「供得起」原則,如果樓市及租金下跌,你地的防守力如何,如果有一段時期租不出,你地的資金是否頂得住?
至於大方向,其實可以,但你地要明白上述的風險,大家都有共識後,先可以進行。
至於嘉輝花園,可以的,有質素。
------------------------------------------------
Q21696:
老師。其實968呢隻股似唔似資源股,價格比市場影響。因為記得上堂老師不太建議投資呢啲股。
龔成老師:
有少少影響,因此在價格自主能力方面,未能去到好強。不過,我地要睇翻佢本身有無技術,如果擁有技術的話,其實佢能否以較低成本生產到產品。
同時,能生產到較高質的產品,這就會產生了產品價格的差異性,反映企業有質素。就能跳出課堂所課,無法加價的問題。
因此,你在分析時,要小心分析佢的技術,是否行得較前,以及往後的技術發展如何,這是決定企業有無質素的關鍵位。
------------------------------------------------
Q21697:
老師,多謝你回覆。其實我由細接觸好多活動都揾唔到自己真正興趣,直到大學期間睇左富爸爸本書改寫左我人生同觀念,就瘋狂睇其他理財投資書,開始決定長遠目標和寫成功日記,我可以樂此不疲連續睇書,就諗呢個係未我興趣但又害怕(當時中係由窮人思維變緊富人思維中)。
直到網上遇到你,你完完全全教我地點樣實行,開始接觸股票,睇你著作,呢個時侯我已經好肯定咁揾到自己興趣(想成為專業投資家)同人生價值,生活習慣,思維幾年內睇到自己變化好大,亦同身邊人分享理財重要性同推薦你網站。
見到佢地有改變 自己好滿足同開心。我想激動分享既係你地好偉大!啟蒙左我,來來回回咁多年我終於揾到自己目標,好開心!
我亦知自己揾唔到全職一時既低落,調整心態,唔會花時間諗(曬時間),自己能力范圍亦會幫助其他人,相信你同其他作家都希望會見到呢個乘的效應!好啦!
知道阿SIR貴人時忙,我知我多野講,但太激動所以想同你分享,感謝你同其他作家,感恩遇到你地!
龔成老師:
其實你自己都好明白方向,只是一些短期問題。
你知唔知,決定一個人是否成功,不是睇佢順境,是睇佢逆境,如果一個人要對逆境,都能夠保持正確方向行,做出一些對自己長遠利好的決定,這類人成功,只是遲早的問題。
加油啦!
------------------------------------------------
Q21698:
呀sir 我現家重整左股票組合
9988@242 2手
285@47 3手
1810@26 5手
1211@178 1手
我草緊錢準備跌市加倉,但如果到時資金有限,我加倉次序應該點排好,比亞迪其實好想加先,因為得一手,唔該晒呀sir幫我解答
龔成老師:
你所持有的,都是有質素的股票,可以長線投資,無問題,最緊要唔好太著重短期股價上落。
另外,你出現了集中風險情況,同一系的公司,不能太多。
同埋,你整個組合都是潛力股,你應該加入平穩增長股,去平衡整個組合。
所以,你加倉時,應該加入其他。如果想加入上述的股,要跌更明顯下跌才出手。
------------------------------------------------
Q21699:
你好龔SIR,小弟剛睇完《股票勝經》,而家睇緊《50優質潛力股》,暫時只買了幾隻你比較常推薦的潛力股(2800, 0823, 0012, 1928, 3319, 3918)每隻目前都係入唔1-2手
部份都有輕微升幅,部份好似因為之前美國提及是否加息而出現跌市,所以有下跌,想請教一下點解只係討論美國加息與否,都會對股市咁大影響,小弟只了解過對樓宇按揭利息有影響,如果美國真係加息,是否會做成大跌市?
另外想問一隻股票,虎都(2399)早前見阿里巴巴同虎都旗下公司合作,這隻股票是否有潛力?但見最近股價一直大跌,這股值得投資嗎?
希望龔SIR可以提供意見,謝謝
龔成老師:
你上述持有的股票,都有質素的。
可能你會見到股價之前升,之後跌翻,但其實唔需要太過理會。
至於投資市場,一向是以一個「預期」的模式運作,即是說,不是發生了才反映,而是預期之後點發生。
美國加息,理論上會對樓價有影響,會下跌,因為供樓的成本增加左,但要睇到時加多少,如果加幅不大,根本無乜特別影響。
加上香港樓的供應不足,需求大,因此樓價下跌根本有限。
至於虎都(2399),擔心佢炒作多過實際,唔好比一D表面因素影響,要睇企業的實際發展。暫時唔太建議投資,風險高。
------------------------------------------------
Q21700:
龔sir, 你好,想請教一下我有2百萬想放入股市買入一些收息股來做被動收入,請問有什麼股票現在可買入/介紹?
而我會分開十期,每月買入二十萬元股票,這個方法好嗎,還是分開五期,每期四十萬較好?
我現年46歲,打銀行工,有供緊樓。想將這些被動收入補償供樓利息的支出和增值。
下列是而家月供股票
$2000 - 66 (平均價 42.77)
$4000 - 2800 (平均價 26.12)
$2000 - 1928 (平均價 32.59)
我仲想問吓,呢$2,000,000嘅投資應該買入幾多隻股票呢,五隻會唔會太多?我大概希望有 5% - 7% 嘅收入。謝謝
龔成老師:
你46歲,可投資平穩增長股,加收息股,你不用100%投資收息股,因為你這年齡仍有財富增長力。
我會建議你分10期,每次20萬,分12-18個月進行,慢慢分注投資,能將買入價平均,你可以投資5-10隻股票。
你可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)、高息基金(3110)都可以。
如果你能承受到風險,有些更有超過8%、10%的高息股,但股價就略有風險,要自己衡量,佐丹奴國際(0709)、中石化(0386)、互太紡織(1382)等(記住,股價略波動,只能小注)。
現時月供的,可以保持,長期進行就得。
要留意,你不能用盡所有現金,要同時留有部分資金,等機會投資。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
中芯 南方 在 龔成 Facebook 的最讚貼文
【龔成問答信箱】(Q21201-Q21220)
Q21201:
你好龔Sir , 上完你堂就計一計吉利(175)既估值,麻煩睇下我做成點呀
因汽車界近來有著革命性的改變, 所以只用近5年的數據
主要競爭公司 2016-2020年PE raio
(因比亞迪完全是一間電動車公司而且市盈率太極端所以不用來比較)
以下數據按大小排
吉利(175)8.551 12.58 13.87 14.41 26.97
長城(2333)6.676 7.178 8.777 8.812 11.11
廣汽(2238) 4.22 6.802 8.584 9.454 10.19
北京汽車(1958) 6.236 7.766 8.495 9.402 12.14
(因2018年一次性PE大升,其後回復正常, 所以不用2018年改用2015年)
用你課堂教的調整,再綜合分析,推算行業平均市盈率 : 8.5815 - 10.5195
吉利(175)市值大, 業務規模比其他同業大, 值得調整,大約調整50%。經調整後吉利合理市盈率 : 12.87 - 15.78
吉利5年平均每股盈利 : (0.64 + 1.4 + 1.58 + 1 + 0.61)/5 = 1.046
大行預期2021年每股盈利為 : 0.94
因吉利積極發展電動車品牌及推出新車, 但同樣銷量亦受疫情及芯片短缺帶來一點拖累
所以先假設每股代表盈利是5年的平均數1.046
所以吉利的合理估值為 : 13.46 - 16.51
請問咁計同你計出黎既差得遠嗎? 你計出黎又係幾多呢? 謝謝
龔成老師︰
首先,北京汽車(1958)2018年市盈率大升,並唔係一些會計因素,純粹係當年不少汽車股被炒起。
因為價格大升,所以市盈率就被大幅抽高。將來都有機會出現這種情況,故你都應把這年,計算在內。
吉利(0175)本身的質素不差,擁有一定的銷售網絡及品牌,不錯的市場策略及定位。
佢早前杭州灣新工廠正式發布純電動新品牌新車「極氪(ZEEKR)001」,宣布吉利進軍高端電動車。
這些因素,都值得給予吉利較高評價。加上佢近年加大新能車部份發展,預期會令增長力增加,故市盈率可以比以往,再調升少少,大約17-22倍。
合理估計,你可再上調多D,會較為合理。
其實,你已掌握了估值的方向,你最重要在計算後,明白這計算背後的基礎,當中是考慮了那些環境情況。
有時我在估值時,會同時計幾個情境,例如好景時的EPS會怎樣,如果差的情況估值又會怎樣,去得到更立體的答案。
另外,你要多做練習,為不同企業進行估值,這樣才會更掌握當中的技巧。
------------------------------------------------
Q21202:
龔老師您好,想問下中國鐵建,長遠和短期投資可以嗎,現時pe2-3,點解佢賺到錢,又有股息,但係格價咁低?
龔成老師:
中國鐵建(1186)業務以鐵路及交通相關工程為主,包括高原鐵路、高速鐵路、高速公路、橋樑、隧道和城市軌道交通工程設計及建設。
業務地區包括中國,以及中國以外地區,工程承包業務是這企業的核心業務,例如基礎設施建設,鐵路、公路等。
這企業的發展不過不失,但增長力及賺錢能力都比過往有所減少,從一些財務數據,例如資產回報率、股本回報率、EBITDA利潤率等,都見到這企業的長期財務數據有轉弱情況,反映企業現時每個項目的賺錢能力,不及過往年代,企業質素因而下跌,而市場估值都會因此而減少。
這股的整體質素算是中等,發展力比過往有所減弱,這類股不是不可投資,但就不值得投資太多資金。
至於市盈率較低,並不一定代表吸引的。
第一,每一間企業,每一個行業,都會有其合理的市盈率,雖然數字愈低一般代表愈便宜,但在實質操作時,先要了解每個行業及企業自身的情況。
第二,當一個行業、一間企業的發展前景不及過往年代,賺錢能力減弱,市場就有可能將其合理市盈率的估值調低,投資者要小心解讀數字背後的意思。
第三,近年一帶一路的發展力,並不及之前所預期,部分國家的工程都減少了,這企業的長遠生意都會因此受影響,同時每項工程的賺錢能力都有可能因此而受壓。
第四,當投資者分析企業時,要了解生意的持續性,例如一些從事零售行業、飲食行業,只要大環境無太大變化,生意往往會持續。但若然企業從事工程,投資者就要了解生意持續性的因素,若果一個國家該類建議最大規模發展的時期已過,企業生意可持續發展能力就會轉弱。
在中國鐵路最大規模建設時期已過,以及一帶一路國家對中國興建鐵路的需求,未必及預期的情況下,這企業自然受影響。
若投資者見到這企業長期的市盈率,經常都處於很低的水平,反映市場認為這企業面對上述因素,只是值這個市盈率,因此,並不代表特別便宜(情況與內銀股一樣,長期低市盈率背後是有原因的)。
------------------------------------------------
Q21203:
你好,想問下你有冇長線投資邊隻美股或者ETF?知道你長線投資1211,覺得你好有毅力,
想問下如果我長線投資arkk / arkf好吾好呢?另外你還睇好邊隻港股可以長期持有呢?thanks
龔成老師︰
其實你只要明白,真正最好架財富增值方法,就係長線持有優質股這個道理,你都可以做得到。
美股和ETF,我自已無投資,我都係自行選股,好似比亞迪(1211)、小米(1810)等。
美股我自已無特別研究,所以這些股票比唔倒太多具體建議比你。
但初步睇佢地都有質素和潛力,但你預佢地波動性會較大,緊記投資持要控制注碼。
而港股方面,都有不少優質股,值得長線持有。若你係年青至中年人士,以下股票都適合。
平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、領展(0823)
潛力股︰安碩恒生科技(3067)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)、GX中國電車基金(2845)。
但你要留意翻,部份潛力股已有輕微過熱情況。只有安碩恒生科技(3067)、GX中國電車基金(2845)、 阿里(9988)、中生製藥(1177)、福壽園(1448)勉強算在合理區頂部,可分注入貨,其餘要等等。
------------------------------------------------
Q21204:
龔sir,你好👋🏻本人30歲,是全職媽咪,現持有以下組合嘅股票:
1. 01093石藥 (平均價$9.56)持有12800股
2. 2342京信通信 (平均價$2.612),持有16000股,現價跌到兩蚊,請問應唔應該再購入?
3. 941中移動(平均價:44.85 ) ,持有1500股
4. 939建行(平均價$6.41 )持有4253股
請問這些股票是否都是有質素?除了建行外,其他另外三隻都打算長渣,是
否可行?謝謝你抽空解答
龔成老師︰
你以上持股,都係有質素,全部都係可以長線持有。
但選股組合上,京信通信(2342)質素未算好高,唔建議再加注。
現時你除左石藥(1093)外,其餘幾隻增長力都唔高。若果你個人投資取態係較保守,咁都可以。否則,你就你加入多少少有增長力股票,去提升財富增長速度。
另外,有一個較大問題,係你好偏重左係石藥(1093)身上,佔組合比重很高。任何股票、任何行業,我們都不應太過集中,因為一個行業就算更有優勢,也有機會面對行業週期及突發風險,太集中會對你整個財富組合不利。
因此,你要建立一個平衡的投資組合,當中有不同的類別、不同的行業,這是最好的平衡風險方法。相同行業不可佔組合多於3成,而單一企業不要高過15%。
長期你需要建立一個更平衡架組合,唔好太集中係幾隻股票。
------------------------------------------------
Q21205:
你好,龔sir 小妹今年28歲,月儲一萬左右,想係30歲前有100-130萬,有可能嗎?現時持股如下
(坐艇中)!!!
匯豐2000股@70元
騰訊100股@662元
美團300股@330元
小米400股@32.7元
安碩恒生科技600股@20.58元
21世紀教育33000股@1.38元
易鑫集團500股(新股上市抽中的)
另外有大約價值6萬港幣的美股(哈,終於系正數😅唔洗負數負到懷疑人生)和30萬左右現金!
龔sir,請問有機會達成目標嗎?有無邊d股票應增加或減持?希望你比小小意見我,多謝解答。
btw報左你股票班,因為你太神秘關係,好想揭開你的面紗!
龔成老師︰
其實你唔好太著重係股價上,帳面賺定蝕,從來都不是持有一隻股票與否的因素。
關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
假設回報10%計(連股息再投資),你每月投資$10000 + 現有資產約值65萬,2年內增值至100萬,計算上係可以。
但由於2年唔係一個長的時間,就算優質股也有機會出現波動,影響到你最終回報,你要明白有這個風險。
先講你現有持股,都有質素。
但匯控(0005)只係收息股,唔會有太高增長力,唔適合你。
易鑫集團(2858)、21世紀教育(1598)質素中等,而美團(3690)有質素,但不確定性較高,都不宜持有太多。
你現時28歲,較適合用"平穏增長股" + "潛力股"的組合。每月用5成儲蓄,去做月供,其餘先儲起,用一邊月供一邊儲蓄的策略。
現時大市只係合理水平,現金和股票最好各佔一半。餘下30萬和每月儲蓄,就等大跌市出現,才加大力度掃貨。
股票班見!
------------------------------------------------
Q21206:
Hello!請問龔sir你覺得比亞迪電子285 現價可以入嗎?其實我都有啲睇好佢,但知道佢,依家呢個價唔平,要落返去20-30蚊都幾難下!謝謝
同埋阿sir 我想問你依家手上有咩股票同平均咩價位入?
龔成老師︰
比亞迪電子(0285)質素不差的,有潛力。睇佢過往發展都正面,有技術,而前景都唔錯。
考慮到近期的增長,$40左右算係佢合理區頂部,現價略貴。要等回翻才好分注,或者可用月供去儲貨。
至於我的持貨,講其中幾隻啦,比亞迪(1211)、小米(1810)、中生(1177)。
現時比亞迪較貴,唔好考慮住,而小米同中生,算是合理區頂至略貴。相信這3隻股,都會好長線持有。
------------------------------------------------
Q21207:
龔sir,你好!本人45歲,已婚有2個子女讀中學,夫妻有穩定工作及收入共6萬元。
我上年12月在FB follow 你,除了睇完百萬富翁系列書籍,也買齊你的聖經及50系列的書,
真是獲益良多。
今年1月開始月供1萬股票,包括2800$3000, 1810$1500, 9988$1500, 66$1500, 823$1500
及1928$1000。
現手持有股票:
1手2382$175入, 1手9988$222入, 6手3067$17.15入, 1手981$24.5入, 1手2018$43入
1)有10萬資金想在跌市時再買入上述持有的股票,還是買入月供的股票,哪個會比較好?
2)以上股票分布會否太散太多?有否集中某類型?
3)2018及981仍可持有,還是賣出轉換1928或其他會比較好?
懇請龔sir指教分析,謝謝。
龔成老師︰
先多謝你支持,你可以先睇"80後百萬富翁"、"財務自由行"和"股票勝經",由淺入深,咁會較好。
1) 其實2者都可以,除了中芯(0981)較一般,唔建議加注之外。
同時間,你入市架時候,唔好太偏重新經濟股,都要加入部份舊經濟股,令組合更平衡。
2) 不算太散,但有少少偏重天係新經濟類別,會令組合波動性偏高。
3) 瑞聲科技(2018)不差的,本身有一定的規模與技術,長遠發展正面,不過,佢增長力不是好強,只能視為平穩增長類別,你可以長線持有。
中芯國際(0981)業務有增長力,但未必能稱為好優質的股。
睇翻佢過往的業務情況,雖然仍每年的生意都有增長,但盈利就有波動,反映雖然大環境的市場在增長中,但佢的成本與售價,就未必在佢掌握的範圍,最後造成盈利波動的結果。
雖然這股都有前景,但以佢面對的情況,但好難將佢定義為最優質的股票。加上之前熱炒過,股價大上大落,投資要注意風險。現貨1手可持有,但唔建議你再加注了。
------------------------------------------------
Q21208:
龔成老師你好,我今年32歲,其實我已經接觸股票超過十年,在最近開始留意你的fb才發現原來我一直都買錯哂/亂咁買,有一種一言驚醒夢中人的感覺
我已經買了股票勝經,希望重新開始真正學習如何買股票,非常感謝你無私的分享
我現時持有以下股票:
267 - 1000股 @15.48
388 - 100股 @297
745 - 12500股 @2
1733 - 60000股 @0.5
1776 - 1000股 @24.65
1816 - 5000股 @3.71
2382 - 100股 @176
6886 - 200股 @24.8
我知道大部分蟹貨應該賣出,其實我深知積存蟹貨的原因是我買股票後就好少留意股價,到想起來時先發現原來跌咗好多
加上我不知道應該幾時賣出才好,感覺過去十年的時間及金錢都浪費了。
看了老師你的分享後,我才知道月供股票,覺得頗適合我這種很少留意股價,但又想獲得合理投資回報的人,希望老師有時間的話可以對我的投資組合給予寶貴意見。
萬分感激龔成老師,謝謝!
龔成老師︰
你想先更正你一個投資想法,蟹貨與否,唔係一個重點。我地投資最重要不是睇「賺蝕」,不是睇「買入價」,而是睇質素。質素不好,增長力弱,就有可能賣出,賺緊定蝕緊,都要賣。
我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
你今年32歲,建議你先集中做好增值部份。現有持股中,舜宇光學(2382)和港交所(0388)係合適的。
中國國家文化產業(0745)見佢過往有20合一,而且多年出現虧損,好大機會係財技股,建議你盡快沽出。
易大宗(1733),如果有睇佢的企業年報,就會見到核數師,多年來都有「保留意見」或「不表示意見」,這已經賬目「有古怪」。這類股基本上無投資價值,賣出較好。
中信股份(0267)、廣發証券(1776)、中廣核電力(1816)、HTSC華泰證券(6886)質素一般,唔建議你持有太多。
至於月供適合較初學者原因,唔係因為唔洗成日睇住個價。而係佢可以透過拉平均左個買入成本,令你減少買貴貨架風險,從而長線得到較佳回報。
月供策略上,現在你每月用5成儲蓄,去做月供,其餘先儲起,用一邊月供一邊儲蓄的策略。
至於餘下的現金,就等機會,當大市出現一定程度的下跌,就可以動用現金去投資,在平宜價加大力度掃貨,然後長線投資。
而何時賣出,基本上企業質素一直無變差,你係唔洗賣。除非個市去到好狂熱,如果你現階段無信心判斷大市平貴,你可以用"升一倍、沽一半"架策略。
先收回成本,餘下一半讓佢自行慢慢增值,咁就可以。
書本上,我建議你先睇埋我寫架"80後百萬富翁"、"財務自由行",咁會較理想。
------------------------------------------------
Q21209:
我爸爸岩岩過身
原本供緊層樓諗住比佢養老
我租左新樓 $12500
但依家舊樓就空左市值300萬左右
我諗緊賣唔賣好
層樓倍升左幾倍
岩岩我公司燉我冬菇
減左20%人工
股票我仲有
比亞迪
盈富
領展
小米
3033
全部小量
想睇下你會點睇
龔成老師︰
每個人都有自住需要,除非間屋已經明顯無乜增值潛力,咁你才考慮沽出。
否則,你可以考慮自已住,可利節省新樓租金,用來投資增值。又或者,放租比人,自己另租地方。大前題係,如果物業依然係有質素,就應留住這個物業。
你現時持有的股票,都係有增長力和質素,適合年青至中年人士。這些股票,你長線持有就可以。
若你將來會再投資恆生科技股ETF,建議你用安碩恒生科技(3067)。
相對南方恒生科技(3033),佢每年收費和追蹤誤差都較低。但由於幾隻恒生科技ETF都係初上市,追蹤誤差只能作參考。實際誤差未必一樣,你要知道這個風險。
------------------------------------------------
Q21210:
龔sir,你好,又要你幫手解答問題了,想問萬國數據值得持有嗎?我知道都有新意網,2隻長遠黎講邊個好?
新意網又持續上升,萬國數據就蝕錢,但又因為覺得中國發展潛力大
另外亦知道美股亦有呢隻股,那麼大家有什麼分別?見佢低過招股價 想入手,那麼我買美股定港股?唔清楚呢d範疇,謝謝。
龔成老師︰
我地持有邊一隻,唔好太著眼係中短期股價走勢,要用翻佢長線質素去做考量。
新意網集團(1686)主要提供數據中心、設施管理、網上應用及增值服務,系統之安裝及保養服務。
行業長遠發展正面,佢已經做到全港最大,加上行業的需求不斷增長,對佢長遠都有正面影響。佢過往生意與盈利保持增長,財務數據正面。
這股有投資價值,不過現價就唔算平,大約在合理區頂。如投資,小注分注都可。
萬國數據(9698)有質素的。
佢的業務為開發及營運數據中心,根據佢公司提供的資料,佢係全中國最大的運營商網絡中立數據中心服務提供商,市場份額約2成。
現時主要通過GDS上海、GDS北京及其子公司進行該等業務。GDS北京及GDS上海各自持有經營業務所需的互聯網 數據中心牌照。
佢提供託管和管理服務,包括創新和獨特的託管雲價值主張,機房面積為266,260平方米,有一定的規模。
見佢生意有一定的增長,行業前景正面,只是現價唔算平,投資價值都有,但就唔建議太大注。跌翻10%較合理。
2者都有長線投資價值,規模上,萬國數據(9698)會佔優。但此刻值博率,會係新意網集團(1686)較高。
至於,買港股定美股,其實分別唔大。
------------------------------------------------
Q21211:
龔SIR,我想講你知,我上過你股票班,跟咗你兩年之後,認同你套方法係得!
我今年28歲,成功說服家人賣了住了20年的兩房自住物業,目的一部分資金幫老人家做收息作生活費,還了另一物業的樓貸(因自住物業作抵押)
剩下部分讓我倆兄弟(弟弟22歲)投資增長股,目標是5~10年再運用借貸買兩個物業,一個值300多萬的細價樓,一個過千萬的三房物業。
目標投入潛力股的資金約340萬港元,目標組合:舊經濟股1177, 3319, 1830, 新經濟股 2382, 0636, 2845, 9988
340萬本金的組合,若選擇投資以上的股票,應選幾多隻好呢?建議比例如何?我會留意股價睇值博率
龔成老師︰
你所講的組合,都適合用來做財富增值。
但這個組合中有主要係潛力股,佢地雖然有增長潛力,但同時波動風險都唔細,唔建議全部資金盡用在這些股票身上。
我建議你加入一些平穏增長股,同你上述架潛力股,比例上各佔一半,咁會令到個組合更平衡。
大市現處於合理水平,那340萬資金,你可以先用一半,以"分注"形式慢慢入貨。餘下一半就等大跌市機會出現,才大力度掃貨。
由於你現處於"沽空樓市"狀態,股票增長和樓市增幅未必同步。所以,假若股票升幅跑輸樓市,反而會令你日後買樓成本上升。
你可以在投資組合中,加入多少少房產類股票,去盡量平衡翻這個風險。
至於老人家收息部份,就唔好用以上股票,應以一些優質收息股為主。策略上,都係先用一半資金,分注入市,餘下就等機會。
目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)或收息基金(3110)都可以。
如果你能承受到風險,有些更有超過8%、10%的高息股,但股價就略有風險,要自己衡量,佐丹奴國際(0709)、中石化(0386)、互太紡織(1382)等(記住,股價略波動,只能小注)。
(你可睇下我本《50穩健收息股》當中仲有好多)
------------------------------------------------
Q21212:
老師我想請教,其實我等緊2020居屋結果,搞珠號碼好後,本身以為冇機,但又收到信補料,之後仲收到二次急件要我補料,好似比咗個希望我。
現在有現金100 万,覺得而家係買樓時機,唔買冇機會,目標500万樓下,做9 成,其實冇咩實力。
聽講居屋5、6 月𢵧樓,如果到嗰時先知自己原來冇机先再睇返私樓巿場,會唔會太遲,我已經41,買舊樓驚做唔到長年期,500 樓下變得冇乜選擇,好心急,求意見
龔成老師:
你可以等埋居屋果邊先,我相信私樓未必會一下子上得太快,估計1年內上落都唔會太過多。
如果居屋果邊唔成功,到時就睇私樓(當然,現時你久不久睇下私樓先,都無壞的)。
要留意,你的「供款能力」是最重要的考慮因素,唔好太過勉強,如果這方面不足,就寧願調低目標樓價金額。
------------------------------------------------
Q21213:
你好龔老師 關於上次你既解答 我風險過高,除左買3067,如何可以提升組合平衡性? 現持有小米及雅迪,但不是月供
小米有1800股,雅迪4000股; 是否建議買短期股?想每個月都增加$4000以上收入,有可能嗎?
龔成老師:
恆生科指(3067)是一個組合,會比單一股票的風險度較低,當然,由於佢持股都是潛力類股票,因此本身都有一定的波動性,你要留意。
小米(1810)絕對有質素,可長線。
至於雅迪控股(1585),都有潛力,不過要留意股價升左好多。
佢主要係中國以「雅迪」品牌從事電動兩輪車(包括電動踏板車及電動自行車)的開發及銷售,亦銷售電動兩輪車用的電池、充電器及其他零部件(包括電機、車架等)。
睇翻過往財務數據,唔差的,生意的確有增長力,潛力度有。不過現價唔算平,因此唔建議持有太多。
另外,不建議你短炒,全部都要長線投資,不要著重每月賺多少,要睇長線。
------------------------------------------------
Q21214:
龔成老師本人30中,有一自住物業育有一子,供樓等家庭開支全一力負擔,每月可尚餘2-3千元。。。
而儲蓄則由老婆負責,現有100手a50,2手電能,2手中國建築,3-4萬現金。應該如何重新分配令財富有長遠的增長保障退休後的生活?
而5-6年後除去支出本人每月可有8-10k的餘額,50%作月供股票50%用作儲蓄流動資金合適嗎?而40歲才由零開始理財會否太遲?
本人明白財富增值非一朝一夕的事,但人總有貪婪的一面,會引發一些錯誤的想法,所以唔知醜咁希望龔成老師指教一下以滅絕那錯誤的想法!
另外想問問老師的投資初階班學費是多少
龔成老師,我媽媽遲下會退休,強積金大約有50萬左右,我應該以咩比例分配係收息股同平穩增長股,而到左退休年齡可以投資少少係潛力股嗎?
龔成老師:
你現時現金其實不足,以一個家庭來說,加上要供樓,如果只有$4萬現金並不足夠,最好去到$7萬-$10萬作備用現金,餘下的才投資,這會較好。
另外,A50中國可長線的,但要留意,雖然這是組合,但都不能過度集中,宜同時投資其他股,如果不懂選股,就考慮其他ETF。至於電能(0006)及中國建築(3311),質素是有的,但增長力不強,收息為主,以3X歲來說,算是較保守,因此,日後可增持一些有基本增長力的股票。
至於你自己要5-6年後除去支出本人每月可有8-10k的餘額,50%作月供股票50%用作儲蓄,最好當然盡快啟動這計劃,但如果無計,就等5年後啟動,40歲,有心都唔怕遲。
現時你每月可儲$2-3000,都可以盡力投資,月供股票都得。
當然,希望你在收入上更進一步,想想長遠增加收入方法,對你會更有用。
至於你媽,潛力股就唔太建議,如果佢真的好想,就1、2成好了。
佢你可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)、高息基金(3110)都可以。
股票班共8堂,暫時優惠價:$8800。
------------------------------------------------
Q21215:
龔成老師你好,我40歲,睇左你FB 一段時間,另外都購買左你先前的網上課程,有得益。希望你能指導下。麻煩曬,長文
因為以前父母系股票輸左好多錢,多年前讀 U 就開始兼職賺錢供父母層樓,也一直都抗拒進入股票投資。
但幾年前開始有剩餘錢就學人抽下新股或短炒賺餐晏仔。
現時還繼續持有幾個蝕本股
3883,1916, 8511, 8313, 6886, 1932, 1227(呢個是父親的)
想問下應該蝕住放甘點?
另外上月開始月供3067, 暫時每月7000
還有1833, 6060, 386, 1786, 1299(都是2至3手)
成40歲最近我被裁,有筆20萬長期服務金。請問應該投資股票定放系供樓的高息戶口等跌市?
我同先生目前有2層樓,一層租萬5(月供5千到2016完), 一層自住(月供2萬8). 另外有150萬現金,股票40萬。我同先生月入8萬(我被裁前人工4萬), 但要供養4大長老同個女,經常性使費都大。
龔成老師:
首先你要明白一個概念,我地持有一隻股票與否,關鍵位是企業質素、前景,不要被買入價影響。買為我地買股票就是買企業。
買入價,你的賺蝕,只是一個心理因素,該企業長遠的發展,才是我地是否值得持有的重點。
如果企業有質素,但股價短期下跌,就不用擔心。
如果企業無質素,但你現時蝕錢中,繼續持有只會令你財富繼續貶值,因此要賣出。
如果企業質素轉差,就有可能要減持,因為這股佔你組合的比例,未必值得太多。
中國奧園(3883)有質素可持有。
江西銀行(1916)質素一般,增長力不強,宜減持。
ZC TECH GP(8511)無乜質素,賣出較好。
杰地集團(8313)無乜質素,賣出較好。
HTSC(質素中等),可守住先,但增長力不強。
中漆集團(1932)質素一般,增長力不強,宜減持。
國盛投資(1227)無乜質素,賣出較好。
至於你「上月開始月供3067, 暫時每月7000
還有1833, 6060, 386, 1786, 1299」
基本上無問題,只是鐵建裝備(1786)質素不太好,宜賣出。
由於你現時有一定的物業資產,反而股票部分很少,因此應增加股票比例。
你$20萬應投資股市,但你投資知識與經驗不多,暫時只建議你月供股票,以及投資平穩增長股。盈富(2800)、港鐵(0066)、領展(0823)都可以。
你可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q21216:
龔sir,有啲野想請教下你
月供基金,我應該要留意啲咩
龔成老師:
首先,要睇翻該基金的投資範疇,投資策略,因為基金有好多種的,你要了解該基金投資的資產類別,是否你睇好的,長遠向好的。
另外,過往回報是否理想,比起大市時否較好或較差。
當確認有質素後,就可以投資,月供是一個方法。如果該基金不是在交易所上市,你就要睇翻有那些條款,會否要求你最少持有幾多年。
------------------------------------------------
Q21217:
老師好!本人50歲持有股票。
公用股:0003 6823 6.51%
REITS:0823 10.96%
醫藥:1177 4.23%
潛力金融:0388 15.54%
石油:0386 1.24%
家電:6690 2%
保險:2318 7.13%
電動車:0175 1211 21.38%
內銀:0939 1398 3988 21.38%
新資訊科技:9888 1.98%
另外以下基金:已供占10.81%
2800 月供$6000
3188 月供$4000
計劃每月買一手3033
已買了一手2845
1. 以上組合是否太亂?有什麼需要加減?
2. 想每月買入一手3069 3109?有咩意見?
3. 手上還有60萬現金,等機會?
多謝
龔成老師︰
1) 都有少少,最好組合數量維持係8-10隻,咁會較理想。
持股方面,都有質素,可長線持有。但你比重上,太偏係潛力股類(1177, 0388, 0175, 1211, 9888)。
佢地雖然有增長潛力,同時風險都較高,不宜持有過多。以你50歲計,潛力股佔組合20%左右好了。
現貨可持有,但未來時間,你要加大翻平穏增長股部份,慢慢令個組合平衡翻。
平穏增長股:金沙(1928)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)、長建(1038)
月供方面,同樣要作出調節。而你想投資恆生科技股ETF,我建議用安碩恒生科技(3067),佢費用成本會較低。
2) 華夏恒生生科(3069)主要係追蹤恒生香港上市生物科技指數之表現。
指數包含51隻成份股,當中有「藥品」、「⽣物技術」等公司。較為人熟識的,有藥明生物(2269)、京東健康(6618)、中生(1177)等等。
隨著人口老化和人均收入增加,對優質醫藥的需求只會有增無減。此股都有質素,可作長線投資。但你預佢會較波動,最好用月供模式儲貨,並長線持有會較好。
南方科創板50(3109)都有投資價值,但成交比較少,會有機會買賣差價偏高。
但你要留意,這2隻都算係潛力型股票,以你年紀,不宜持有太多。
3) 現時大市只係合理水平,現金和股票最好各佔一半。若你持股總值已超過60萬,有手現金就最好等大跌市出現,才加大力度掃貨。
------------------------------------------------
Q21218:
你好,老師
35歲,家庭月入約6萬
每月儲到2萬
2小朋友讀緊幼稚園
持有以下,希望可以盡快儲到200萬作首期,買多層樓收租。不過,我都唔係好清楚當有200萬時,應該購樓收租,還是繼續投資股票?
農行:10萬股$3.38
建行:17000股$6.58
交行:10000股$4.9
9988 阿里:300股$463
快手:200股$402
中移動:1000股$53.8
總成本:70萬
另外可動用多50萬投資股票,請問投資方案應該係點?謝謝你
龔成老師︰
我地做財富增值,係要建立一個有不同優質資產的組合,除了股票,物業都係其中之一。
以你現時情況,由於現時資金較少,應先利用優質股去增值一筆財富,再買入物業。但同時間,必需留有一定數量的股票,作增值之用。
而這物業可以放租,用「以租養樓」架模式去運作。較詳細方法,你可以睇我本<5年買樓4步曲>。
你現時持股,主要有2大問題。首先,農行(1288)、建行(0939)、交行(3288)和中移動(0941)只係收息股,增長力好一般,不宜用來增值之用。
另外,你組合好集中係銀行股。記住,個別行業唔好佔組合3成以上,否則會有過度集中風險。
我建議你用「平穏增長股」 + 「潛力股」作組合,你可以慢慢將部份收息股,換至以下股票。
現在你每月5成儲蓄,去做月供,其餘先儲起,用一邊月供一邊儲蓄的策略。
大市現處於合理水平,那50萬資金和每月儲蓄,就等大跌市機會出現,才大力度掃貨,並長線投資。
------------------------------------------------
Q21219:
Hi 龔sir你好
我今年35歲 穩定職業
想每月供$5000落金沙、阿里、小米或比亞迪
是但兩隻可以嗎?
邊隻會前景好d?
龔成老師︰
4隻股票都係有質素,但我地做配置時候,都要考慮平貴、年紀等因素,去決定成個組合。
以你35歲計,建議你用「平穏增長股」 + 「潛力股」的組合,比例大約各一半。
現時比亞迪(1211)略貴,回到$120才可以月供。
金沙(1928)係「平穏增長股」,而另外阿里(9988)和小米(1810)係「潛力股」,你可以在當中2選1,去創建你月供組合。
現時大市只在合理區,每月儲蓄不要盡用。你要留有部份,等大跌市機會出現時,用來掃貨。
------------------------------------------------
Q21220:
龔sir,你好,我今年大約35歲,現有股票如下:
788@6000股 買入$1.16
1810@1400股 買入$24.59
1922@8000股 買入$5.1
2031@2000股 買入$16.63
3067@400股 買入$17.11
3718@12000股 買入$1.28
1)想問現有股票會唔會太多?同埋有無長遠投資價值?
2)1922,2031,3718可以長遠持有嗎?
3)想問下京東健康,阿里健康同平安好醫生嘅分別?邊個比較有投資價值?同埋長遠發展
邊個比較理想?有月供價值嗎?
謝謝
龔成老師︰
1) + 2) 數量上,唔算太多,長線維持8-10隻就可以。
持股方面,銀城生活服務(1922)上市時間唔算長,不確定性較大。而澳至尊(2031)質素只係好一般,2隻都不宜持有太多。
其餘都有質素,可長線持有。
3) 京東健康(6618)、平安好醫生(1833)和阿里健康(0241)都係有質素和潛力,業務上都非常相近。
但問題係佢地是有危有機的類別,雖然業務增長好快,但這刻仍處於燒銀紙的狀態中。估值上好困難,因為無實質的盈利數據作為基礎,市場只是估估下。
質素和值博率計,平安好醫生(1833)會較為佔優。但始終有一定不確定性,因此,低風險者未必適合投資,若投資者考慮這股,亦不能大注投資,買入後就耐心長線持有,等待這企業改變整個行業的情況。
現價算合理區頂,但好波動。你可以用月供儲貨,如直接買入,就只能小注。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。