［Facebook今次幾頭痕。但，應該冇事掛？］因為實在客戶實在太廣了
TL：DR—大品牌齊齊杯葛Facebook（雖然可能只係一陣），影響當然緊要過你啲網友杯葛。但，Facebook 最大嘅100個客加埋，都只係佔佢6%收入。你唔落，大把對手爭住落。
1. 本人一向係Facebook （隻股票）忠粉，2018年3月Facebook爆鑊，劍橋「泄密」風波，甚至「賣用家私隱賺錢」。當時唔少人聲稱Delete Facebook，甚至有人話「霸權崩潰第一步」。當時股價亦急插15%。本人同意係公司面世以嚟最大危機，但當時仲幾老定，覺得根本唔會有事，亦寫過文（https://bit.ly/2Af0776）。睇死你班友，好似小學雞離家出走咁，過兩日就返返嚟啦。結果估中，好快就冇事，股價早排先創新高。
2. 但真係好似羅樂林咁，法治可以死完又死，香港最黑暗的一天一年都幾十次，今次Facebook，就真係更加大危機，一鑊畀一鑊勁。當然正如我一路講，成功嘅企業有邊日唔係面對挑戰？係你啲窮撚網友先以為大公司坐定定收錢（收租可能係嘅）。美資公司，邊間唔係關關難過關關過？你投資，就係相信嗰一萬蚊，公司會用得好過你—咁人地梗係勁過你啦。
3. 不過，今次真係相當大鑊。股價兩日就跌12%。
4. 好啦，今次咩危機？又係有人杯葛，但今次係廣告客戶杯葛，咁就大鑊好多啦！仲要唔止一間，係好多間，仲要係大公司—即係，你啲仙都唔仙嘅濕鳩網友話杯葛，少返一萬幾千個，小朱不知幾開心。但落廣告嘅大客，另一樣嘢。
5. 故事都有啲長，但某程度上，都係由Black Lives Matter（BLM）引起，遠因就係美國（甚至全世界）相當極化。好簡約地講，因為某啲友（主要係侵侵）寫啲嘢好具爭議，唔少人認為係hate speech，煽動仇恨，有其他平台就封鎖呢啲友，或者屏蔽，或者標記係有問題 – 但Facebook堅持唔制。Facebook理據係，大佬，我唔係真理仲裁者。咁，任由呢啲hate speech出現，就令某啲企業唔高興，話有違佢地核心價值云云，加上亦都有人發現呢個運動，於是企業唔再在Facebook落廣告住，咁話。有啲就其實係完全唔再在社交平台落廣告。
6. 慎防有人唔知Facebook 點賺錢，你玩Facebook好似係冇畀錢的，啲KOL經Facebook賺錢一樣一個仙都冇分畀小朱。咁公司點賺錢？Senator，we run ads（https://bit.ly/3idb1ew）．Facebook同好多科企一樣，好靠Network Effect，越多人用就越值錢，所以佢唔收用家錢—但聚到人，自然可以向落廣告嘅商家收錢，原理同免費電視差不多。
7. 事情可以好多角度拆解。但首先，唔少牌子本身在BLM都有其立場，你可以當係行銷嘅一種，咩都好。咁如果照樣在容許hate speech嘅Facebook 出廣告，難免會畀顧客話 — 咁不如反客為主，先將一軍。
8. 呢度帶到第二點，我自己估嘅。但，相信好多牌子，甚至其他傳媒，對Facebook早已恨之入骨，只係因為誰大誰惡誰正確，唯有一路鬧一路用一路落。有人第一個企出嚟杯葛，一呼百應啦。
9. 當今參加嘅，實在有好多公司。最初係North Face，Patagonia．但之後仲有電訊龍頭Verizon，FMCG（＊）龍頭聯合利華（Unilever，P&G死敵，Lipton同 Dove嘅主人），可口可樂，星巴克。驚未？部份唔係只杯葛Facebook，係停晒所有社交平台，有啲就post照出但唔畀錢推廣告（幾咁仆街！）。有啲只係停到七月底（好有誠意！），不一一盡錄。
10. 我？都仲係樂觀嘅。
11. 首先，Quartz 有文寫過（https://bit.ly/2NETcqV），對收入影響唔係太大。固然Quartz篇文寫時未有可口可樂同星巴克加入，但入面講嘅大約都啱。因為Facebook真係太無敵。
12. 你以為大牌子惡？Facebook 仲惡。就算100大企業加埋，都只係佔廣告金額6%，你睇呢間公司嘅customer concentration risk幾咁低！廣告貢獻最多嘅，係啲中小企—諗下都合理，我大牌子冇廣告其實都有人識，但，中小企想上位，梗係勁落廣告—你大企業唔落呀？多謝晒，我借機會搶你份額添（雖則未必得）。Facebook 800萬個廣告客戶，全世界不同地方，大陸都有（是的！大陸理論上上唔到Facebook，但大陸公司一樣進貢唔少），點齊上齊落？我估唔少公司唔介意借呢個機會搶廣告時間。
13. 另外，你見到有啲公司（開名啦，星巴克），十分搞笑，Post照出，只係唔再畀錢落ad．個感覺就唔係割席，就似係一路唔妥Facebook多啲，照用，但唔畀錢你賺。正。又，好撚心啦，聯合利華出嚟扮正義企業。我真係醉了。
14. 同時，你見我寫咗兩次，有啲公司，係停晒所有社交平台—呢個緊要。證明，唔少公司唔係只係針對Facebook—而係唔想捲入呢啲政治爭拗。固然支持BLM好似係王道，但唔好忘記侵侵都一大班粉絲，亦都唔少人（包括香港人）覺得BLM係左膠嘢，只係唔多敢出聲。即係，企業好可能點都會得失人，咁不如唔搞好過—反正仲可以慳錢，而呢排公司啲筆直又緊，生意又未必好。
15. 雖然見到越嚟越多公司加入，但我覺得，要好多公司齊上齊落聯手杯葛，都實太難了。總有人唔怕呢啲嘢，你唔落就我落。你諗下，其實現代人而家最寶貴嘅，就係時間。無數咁多公司就係爭你嘅時間睇廣告，但你一日就係得咁多時間，你再有錢都係咁多。你聯合利華唔玩？咁我P&G多謝晒先。就當P&G都唔玩，咁我大陸牌子就落咯。
16. 事實見到，Facebook嘅廣告收入，非常之resilient —例如之前因為肺炎跌咗，即時就有班原本歐筆嘅人補上。
17. 個關鍵係，今次同2018年3月相反，企業杯葛，但啲客一路上緊Facebook，唔見得短期走人。咁，對手落，你唔落？你頂得幾耐？定考慮去返TVB或CNN落廣告？不如諗下登報紙？或者賣紅隧廣告？
18. 本人相信，收市後先爆咩可口樂同星巴克都唔落，Facebook股價就再會插，加埋之前都升唔少，近排市況亦差。照計會繼續跌。但你話廢都好，我都係嗰句，屌，貴嗰時又話升咗好多唔敢買，但跌落嚟又話唔敢買唔知見底未。好呀，你叫見底嗰時小朱發個私訊畀你丫。原來好多人係幻想，間公司係會無啦啦平五折畀你去買的。
19. 下篇我會再講下，點解twitter好似咁勇猛，夠膽死搞侵侵（明明侵侵就係twitter代言人，未有佢之前應該一半香港人都唔知係乜）。但Facebook就唔敢搞佢？呢個未必同咩老細立場有關，而係兩間公司business model唔同。下篇講。
20. 小朱做嘅，其實亦只係將嗰啲文label返，但你依然可以睇到。可以算係中間落墨，好過冇，但好過乜都唔做。最後，可能都係企業施下壓，Facebook又做下嘢，大家繼續打牌 — 畢竟你諗下呢啲咩種族呀貧富不均呀，嘈咗幾十年。
21. 講金融嘅去到呢度完，想聽我講多兩句政治之類可以睇埋。當然我唔係好想啲討論集中在呢部份。最好就睇完自己諗下算。
22. 又，真係覺得Facebook會死嘅，咁就買Google啦。是但一間，實中一間。唔通真係返去TVB賣廣告咩。
23. ————————————————————————————————
24. 如果叫我估呢，固然呢啲咁嘅種族呀，不公呀，社會兩極呀都存在。但，侵侵的確係一大助燃劑。正路地（睇賠率睇其他model啦下），侵侵應該就冇得連任。到時拜登做場戲又好乜都好，點都玩大和解大團結。即係，呢波咁嘅嘢，照計去到十一月，點都收皮。我咁估。
25. 另外，我係傾向支持Facebook做法的—你地貼乜，關我鬼事？如果係犯法嘢當然要下架，但唔犯法嘅，點去執行？正如之前都有好多人話，假資訊偽科學要ban—咁請問咩係假資訊？香港地N咁多人信咩動物傳心，嗰啲係偽科學啦掛。咩自然療法呢？周兆祥呢？中藥呢？鍾嘉欣老公呢？你問我全部都偽科學。我當然唔信，亦恥笑，但人地有冇言論自由？人有冇戇鳩嘅自由？好似應該係有的。我係Facebook，我點去仲裁？有人話中移動數據證明大陸死撚咗幾千萬人，你證點明冇？同樣地，咩叫hate speech？叫人蝗蟲係咪？黑警死全家呢？打曱甴呢？耶撚正仆街呢？KOL呃鳩錢呢？係咪hate speech？點解冇hate speech嘅自由？
26. 然後又要講，「言論自由」。話你知，好多人拗到老母都出埋，根本大家唔係講同一樣嘢。你講最狹義嘅，「言論自由」只適用於公權力—即係，你唔會講完句嘢畀人收監。但唔包你唔會講完句嘢失業，唔包人地唔會屌你老母杯葛你唔去你間舖。
27. 咁理論上，你可以話，Facebook只係等於一個私人平台，我可以有自己規則，我個平台就係唔畀人鬧黑人，得唔得？好似得。問題係，當你某啲私人平台大到一個點，就變咗有公共性了。Let’s say，我係互聯網渣fit人，我可以隨時令到一個人上唔到網，我就係唔畀人鬧白人嘅，得唔得？就唔多得了。因為現代社會，上網係人權，你上唔到網，近乎你嘅聲音就消失。相反，如果你只係某個群組，就另一樣嘢。
28. 大約係咁，Facebook搞到大，就自然會有呢啲問題。再唔係以為成班哈佛仔物化女性畀分嘅小手作了（所以其實，根本Facebook本身就係厭女企業，做乜唔杯葛？）。「原來做億萬富豪都咁辛苦嘅」「聽朝準時返工啦」（埃汾唔使，放假中）
（＊）FMCG，Fast Moving Consumer Goods是也，零食化妝品洗頭水等等，唔同你買部洗衣機用幾年（定一年？）咁。呢啲字唔識，就畀人拋到了。當然用得太多個人就會膠。所以學會佢，但唔好成日用。
————————————
多謝你睇到呢度，而家到你救我全家了。新搞作。同Homeblogger新合作，以往得文字，而家玩短片。第一炮當然係你最關心嘅，下半年個市點睇。港股，美股，樓市。暫時斷次買。80蚊，講足半個鐘。你請我食一次飯一定唔止，我好大食的，食你七八舊水都得。
入面有埋圖，有埋恒指標普目標價，教埋資產配置，有埋6隻心水股。有港股有美股有大有細。
請去呢度睇：https://bit.ly/37S4iC5
課程編號：CC002
客服whatsapp: 63832145
中藥一錢等於幾克 在 中藥度量單位之換算一般中藥行以"錢、兩、斤"為中藥材單位計算 的推薦與評價
目前台灣一斤是600g~~大陸是一斤500g 大陸從1979年，中藥計量單位改用美制，用克、毫克、升、毫升，不用「兩、錢、分」舊制。所以大陸的十六進制與公克換算率如下： ... <看更多>