//支持本Page請Click入內文比Clap，已成為Medium收費會員請直接Click入內文閱讀，謝謝！//
11月12日，又係實在有太多嘢講，原先已打算寫一篇關於早一日中大之戰嘅文章，點知第二日打得仲勁；又，其實想寫好多題目，包括：
1. 論中大防守戰略之利弊：只守不攻係咪代表永遠都贏唔倒？
2. 港式「非辦工時間抗爭系列」：原來香港人係願意罷工嘅：大前提係要佢番唔倒工
3. 愈夜愈精彩的旺角抗爭，各區開花「圍魏救趙」戰果結算
4. 段王爺究竟抵唔抵屌？沈祖堯已被學生當透明／中大現場媒體點解成日報錯新聞？
甚至乎最有迫切性立刻要寫嘅，當然係一連兩日我個人響中大嘅經歷見聞。但去到最尾，唔知點解落筆一刻，我腦裡面只係不停諗番起呢個小故事：
話說中大抗爭最令人振奮嘅其中一件事，就係有班學生花咗半日時間，先後響無車匙嘅情況下撻著咗一架柴油校巴、一架電動校巴，然後仲唔知點解會有學生上埋去揸。原先響戰況最危急嘅時候，佢地原先係打算採用「泊大巴」戰術，亦即將巴士直接駛上二橋前線作路障；但後來由於11點後戰況稍緩，然後兩個「校巴司機」愈揸愈「純熟」，竟然真係做埋校巴接送服務。
然後當日我由本部打算往崇基方向撤退時，就上咗呢間校巴。入面班學生乘客笑得好開心，一邊係叫模仿警察大叫馬路上嘅同學「上番行人路」避免比校巴車親，一邊又不停取笑「校巴司機」揸得咁渣，唔知個牌點考番黎，個「校巴司機」一邊堅持自己有考大巴牌「不過第一日揸」，一邊苦惱於點樣響九曲十三灣嘅中大不停掉頭同U Turn。
之後仲有同學仔嫌校巴實在太慢，索性提早落車，又比車上同學笑罵「又話齊想齊落，一睇唔對路就想割席？」，然後響校巴沿途係不斷有行人以各種形式向「校巴司機」致敬。
如果你係一個藍絲，睇到呢個位你可能會好嬲：學校係比你亂黎嘅地方黎架咩？你班廢青用暴力佔據咗校園，然後連公有校巴都夠膽拎黎玩，仲要hehe哈哈添？
我響校巴上面睇住呢個情景，其實都真係笑唔出：但唔係因為我係藍絲，而係因為響幾個鐘頭前，呢班學生先經歷咗一場隨時送命、又或者喪失所有美好前途嘅衝突，剩係我親眼所見，都至少有兩位同學眼部中彈隨時失望，仲要有骨折、昏迷等嚴重傷勢──佢地企響前線面對超過兩千發各式各樣嘅子彈，而保護佢地嘅唔係政客、唔係校方，而係一個好大嘅燃燒路障、臨時盾牌同埋傘。佢地之前啱啱先響鬼門關走過一轉番黎，而仲要隨時戒備
我見倒佢地響校巴入面好開心，我眼淚卻係響眼框中打轉。你以為位「校巴司機」揸校巴貪玩？咁點解中大建校以黎，從來未試過有學生「貪玩揸校巴」嘅紀錄？一班同學花幾個鐘撻著架校巴，呢位同學臨急抱佛腳上咗做「校巴司機」，其實都只係為咗救兄弟、救手足；用佢地嘅血同汗守護中大，粉碎警方一次又一次想蹂躪中大嘅企圖──呢一幕難得嘅歡顏，其實只係成場血淚抗爭入面一個好少好少嘅片段，中間加插嘅血腥、恐怖同驚慄片情節，卻實在係太多了。
響水炮車攻勢過後警方暫時撤退，同學紛紛前往夏鼎基運動場作休息，成個場境就好似舉行緊陸運會咁。諗諗下，其實11月12日發生嘅事的確幾似陸運會：我地有各式各樣嘅田賽（拋擲火魔法）、徑賽（前進突擊、後退逃避警暴）；有各式各樣嘅運動器具包括弓箭、手球龍門、看台、跨欄、標槍、鉛球被運哂去現場，準備響必然時發揮佢地嘅作用。
我地有First Aid救護站、有好多「校工」駕駛拖拉機、校巴甚至你想像唔倒嘅工作車輛周圍轉；我地甚至有大型「Camp Fire」、同學如果有需要係可以隨時沖身──聽落好似好有趣，但其實每一件事都足以令人掉眼淚。
呢一晚印象最深刻係當水炮車向學生噴射藍色胡椒水時，幾個學生好似癲咗咁衝去後方，然後除哂衫不停慘叫話「好痛」，有啲仲要喊埋出聲。響慌亂之間我都唔知有咩做倒，只係不停叫人淋水，同埋幫手響佢地身上面抹皂液。
我自己都曾經被淋過藍色水，所以我係充份明白，今次呢隻水係同以前完全唔同，「辣度」係超過以前10倍：我只係用皂液抹響同學身上時，隻手已好似火燒咁灼痛，試諗下全身淋哂藍色水嘅同學有幾痛？
企響佢地身邊，我都忍唔住喊出黎。
大學生活，唔應該係咁。
