《 李懂媽周日漫談 》之 「 那日清晨，我參加了DSE考試…… 」
【 序言 : 十個舊同學，每人預先夾500蚊食飯，埋單連貼士4500蚊，唔使問阿貴，收多咗嘅五百蚊分返畀啲人，簡單直接，不過，有啲 seven head 唔係咁諗，佢有不可告人嘅陰謀……】
2019年
DSE考試……
全港報名人數(包括自修生) 係188萬8千8百，比過去平均每年7萬人報名高出25倍，直逼東華三院籌款數字。
香港區試場，選址香港大球場，(九龍區試場係紅磡體育館)，朝頭早七點半，我出咗銅鑼灣地鐵，已經見到人山人海，人潮沿住禮頓道一路迫去加路連山道……
係我前面，有大約二三百人大聲叫「 自我增值！」……「 持續進修！」……「 自我增值！」…… 就好似香港足球隊對北韓，全部啲人聲如洪鐘，好整齊咁大叫。
响我後面，另一班人大聲疾呼:「 茂波不下台，我們天天來！」……「 茂波不下台，我們天天來！」……
加路連山道，由南華會一直去到保良局，兩旁都係警方快速應變部隊，荷槍實彈監視群眾，一架駐港部隊Z8直升機，响銅鑼灣至灣仔一帶上空盤旋。
我嘅准考證號碼係#689444， 坐係東看台下面，坐喺我前面係修哥胡楓同埋羅蘭姐，佢哋話後生嗰陣時，掛住拍戲冇時間讀書……
考試中途，坐喺我隔離嘅八兩金，直頭係《喜劇之王》嗰個造型，頭髮蓬鬆耳仔有隻蟲走出嚟，大聲叫「 我要初戀…… 我要初戀呀……DQ 我吖笨……」
話口未完，谷德超照足《食神》唐牛嗰個造型，走去監考官面前，攞住卷厠紙踎響度痾屎……
我係一心一意真心嚟考試，響應陳茂波號召，但係咁嘅環境，我都忍唔住，要爆喇……
忽然間扎醒，原來發緊夢……
真正報考DSE嘅人數係，700萬人！
李懂媽
