【龔成問答信箱】（Q14221-Q14240）
Q14221：
老師，我係股票班學生，首先多謝你，你教得好清楚，就算我初學都跟得到！我剛開始睇2018年金沙份年報，發現有幾點想請教老師：
一）毛利同純利率維持於高位，但係睇返會唔會係因為佢新一年客房小左，經營營業額小左，而加上小左房成本控制得好令佢好似多左錢賺咁？
二）今年資金回籠快左，多左錢，而且自由現金流又多，唔係好明點解今年派息政策變左，只係得50幾％Payout Ratio，佢留咁多錢係準備發展倫敦人既開支？但睇返今年既資本開支都係得5億幾美金左右，有冇需要留咁多？
龔成老師：
1）睇翻金沙（1928）的毛利率，基本上都保持在穩定水平，唔能夠反映企業有好大的變化。同埋自從2016年佢的巴黎人開左後，都無太大變化，所以客房的數目無特別改變到，因此，我地可以初步分析到，佢大致保持原在的賺錢水平。
而佢的財務比率處高水平，反映行業賺錢，同時經濟過了過往的較差時期，當然往後仍有變數，但2018年所反映的情況不差。
2）其實佢仍然每年保持著約$2的派息，這個與之前一樣，無改變，我地睇翻佢宣佈的日期，2019/01/18、2019/03/15，都同樣列為「2018年」的財政年度，除淨日為2019年的1月及5月。所以，股息同之前一樣的。
佢現金流強之前一樣強勁，反映企業保持相當優質度，預期倫敦人要一定的開支，但佢絕對能夠應付到。
------------------------------------------------
Q14222：
想問吓你點睇內地同本港經濟前景？有指：內地經濟外強中乾，根本無實力同美國打貿易戰。
香港過份依賴內地只會被拖累，而明日大嶼工程勢將透支所有外匯儲備。你嘅睇法係點？
盈富基金有大部份都係內地股，會唔會分散唔到風險？北美市場會唔會相對可取？如我想了解當地市場，可透過咩途徑？
龔成老師：
中國經濟的確會轉弱，但又唔需要睇得太差，因為中國人民在過往多年，已經漸漸累積到財富，只要有效利用，可以幫到經濟的。
另外，中美慢慢會達成更多的協議，競爭過後，就會好好想合作，這會帶動到中國的經濟由低位走向上。
加上，我地投資股票，是一種長線的投資，中國長遠的發展力仍在，因此後有投資價值。
至於香港，大嶼工程能否進行，仍未知，就算到時開始，具體情況會點，都是未知，所以唔需要太早擔心。
整體來說，我相信盈富（2800）仍是好有長線投資價值的。如果你想分散風險，同時投資美股ETF，是可以的，例如領航標普五百（3140）。
------------------------------------------------
Q14223：
老師你好。最近苦惱兩老退休打算問題。家中兩老持有一層已供完聯名嘉湖山莊三房單位（市值估約550萬）。
因為幾兄妹都結咗婚搬出，兩老唔需要咁大地方，考慮係咪應該賣樓，轉買更細既單位或三百幾萬既居屋，差價買入收息股。
退休生活用錢唔多，7/8千一個月都夠洗，唔知應唔應該行呢一步。定係有其他方法可產出被動收入呢。唔知有無idea, 感謝！
龔成老師︰
大屋轉細屋，去套現一筆資金來買收息股，這個方法是可行的。但為免因買賣時差造成價格損失，這個一買一賣動作緊記要同時間進行。
收息股方面，你可以考慮港燈（2638）、香港電訊（6823）、工行（1398）、匯豐（0005）、置富（0778）、陽光（0435），這些都有質素和5%以上股息率。
假設你轉細屋能套現200萬資金，以5%股息率計，每月可以創造逾$8,300現金流。
但要留意現時大市只在合理區，買收息股時要分注，唔好一次過全部資金同時間入市，去減少價格波動造成之風險。
------------------------------------------------
Q14224：
龔sir, 你好！本人39歲，女性！剛看畢財務自由行書藉！當中提及市盈率，如有5-10倍，是處於抵買狀態。
現有以下問題：本人一直月供股票$4000達一年時間（包括2800-50％，2388-20％，00003-20％，1928-10％）現在00003同1928市盈率27.53倍同21.81倍。
這是否表示兩隻股已處於偏貴情形？是否需要重新調配百份比還是繼續保持？現在應怎辦，請指教，謝謝！
龔成老師︰
簡單來說，市盈率是衡量企業平貴的"其中一個"指標，能助投資者理解到當前股價處於平或貴，以便作出投資決定。
在估算市盈率時，我們會先以大市及行業的市盈率作基礎，以此基礎再作出上下調節，有優勢的、有增長力、行業較好的，就會給予較好的市盈率，從而將範圍調高。相反，企業較弱的，則調低。
由於我地估算市盈率時，除了企業本身質素外，還要看行業本身平均值。有些行業會較高（如高科技行業），有些會較低（如內銀股）。將這些因素考量後，才會得出一個合理市盈率估值。
煤氣（0003）和金沙（1928）都是優質股，以佢地質素而言，分別只係少少偏貴和合理區較高部份。
而我地投資會運用「先增值，後現金流」作方法，初期應投資較多增值類資產，較後期則應投資較多保守類項目。以你年紀，應以增長為主，所以你組合中股票合適。
但有一個問題是你供款額太少，除了盈富之外，其他股票灴足$1000。分得太散，導致個股供款金額少，變相令每隻月供股票的手續費佔比過高，長遠會侵蝕了你不少投資回報。（**最理想手續費不高於本金1%）
建議你最好加大每隻股票供款額，如想保持總月供金額$4000，我會建議你組合轉為盈富$2000 + 中銀/金沙/煤氣其中1或2隻，這樣會較好。
------------------------------------------------
Q14225：
龔成老師你好，本人今年30歲，剛開始接觸投資理財這範疇，現買了幾本你的書在閱讀，希望能吸收多點相關知識。
請問現在本人薪金16k左右，因我每年都有薪金調整，我計算過若果每月儲薪金一半，一年後就可有10萬。
若我已設立目標5年內儲100萬，即尚有10萬才達標，因我才剛接觸投資，如現先每月用3000元分別月供股票2800，0003，1052各1000元，是否也算不錯選擇？
謝謝指點！
龔成老師︰
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
以你年紀計，應以增值為主。你月供煤氣（0003）和盈富（2800）都合適﹐但越秀交通基建（1052）只是收息類型，增長力欠奉，所以唔係咁適合你。
我建議你月供組合更改煤氣（0003）和盈富（2800）各$2000至$2500，因為分得太散，金額少，每隻月供股票的手續費會過高。（最理想手續費不高於本金1%）
將你人工增加，可加入1隻潛力股如比亞迪（1211），中生（1177）或福壽園（1448），去增升組合增長力。
至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。
------------------------------------------------
Q14226：
你好，想問一下你的意見。
現在36歲，以下是為退休準備的投資，到目前為止。
月供2800，$5000 （現值約20萬）
月供66、1038，$5000（現值約6萬）
每月派息基金，每月派$2000，現值40萬
中國基金$40萬
另外每月儲$5000現金，現時已有20萬，如果想趁此時用此筆錢入市買收息型股票，有午麼好選擇？本身想一筆過20萬買入，還是應該每月加大供款較好？
謝謝你的解答
龔成老師︰
我地投資會運用「先增值，後現金流」作方法，初期應投資較多增值類資產，較後期則應投資較多保守類項目。以你年紀，應該以增值為主。
你現時月供的3隻股票都是有質素的平穏增長類企業，可以繼續。儲下的資金也應投放在較有長力股票，而非收息股。
另外，你每月派息基金，以年息計只有6%，這些收息類基金，增長力欠奉唔係咁適合你年紀，長遠考慮轉為平穏增長股或潛力股較好。
現時大市在合理區，你持有之20萬，可先將10萬以分注形式，投資在平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（823）、港交所（388）、深高速（0548）
潛力股︰比亞迪（1211）、中生（1177）或福壽園（1448）。
餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。
------------------------------------------------
Q14227：
請問1787山東黃金可以持有嗎？
龔成老師：
山東黃金（1787）佢主要於中國從事黃金採礦及加工，以及銷售黃金產品。
佢係中國合共控制及經營12座礦山，其中9座位於山東省，並於中國擁有18個選礦設施及2個冶煉及精煉設施，本身持有一定的資產。
但由於會受黃金價格影響，因此股價會比較波動，這股雖有投資價值，但唔建議持有太多。
------------------------------------------------
Q14228：
龔成老師，我想問下我喺四年前買入嘅00861神州數碼同00992聯想集團一直走下坡，仲有上升嘅機會嗎？
龔成老師︰
聯想（0992）算是有質素的股票，但過往的品牌定位等較弱，近年開如好翻D，相信之後有平穩增長的能力。
但較大問題是你買入價比較貴，要返回買入價可能要較長時間。
神州數碼（0861）問題比較大，佢近年生意十分波動，甚至出現虧損，加上近2年核數師的意見「保留意見」，反映賬目，「有古怪」。
整體而言，此投資價值不高，建議你賣出比較好。
------------------------------------------------
Q14229：
之前上過你的投資班，學會各種你教的估值方法令我投資決定時也有一個分析的基礎。
不過我今年三月投資資金回報也只是跟大是差不多錯過了很多升幅很大的股票。
令我覺得要投資會較大同時亦需要對分析前景有一個比較好的掌握而且部份是最難的。你過嚟我們如何才能準確預測幾隻燃氣股未來幾年的盈利增幅？
我們如何才能預計到內房股未來的收入會如何？請問一下老師你平時要分析一隻股票的前景是會怎樣做呢？
龔成老師︰
你這些情況，其實好正常。你剛上完課程，雖然已掌握到一些估值技巧，但我地必需要用這些技巧去不斷磨鍊，多看年報、多作估值，才會令你將這套技術掌握得更好，從而提升你回報。
同時，我所講的是長線投資，中短期回報根本無法反映。
一間企業未來前景，除左可以從佢過去數年盈利變動作參考之外。你也要睇翻佢過往令佢賺錢架優勢，能否在未來時間持續下去。
我簡單點以煤氣（0003）當中"香港部份的業務"為例，企業早已壟斷了全港的煤氣行業，我地預期未來一段時間佢而個優勢都唔會改變。而香港煤氣市場已成熟，需求量唔會有太大變動。
咁我地大致可以估計倒佢未來盈利增長走勢，應該會跟過去差不多。
當然不同企業，會有不同情況，很難三言兩語説清所有情況。但只要你多練習，有了一定經驗，你就會較易去解讀企業分析的要點。
------------------------------------------------
Q14230：
龔成老師你好，最近睇緊你的著作財務自由行，啟發我為未來打算。首先要多謝你先!
我而家持有的股票如下：
0017新世界發展4000股@10.78
0659新創建集團7000股@12.75平均價
0005匯豐1600股@65平均價
2388中銀香港3000股@32.1
新創建最近重組業務，賣左首都機場股份，以及與母公司新世界收購完富通保險，但新創建股價回落不斷有點擔心。老師覺得前景如何?
小小背景資料本人30歲，月儲6-7000左右，現金10萬左右。股票組合未來需要加強增值嗎?謝謝老師分享意見。
龔成老師︰
新創建集團（0659）有質素的，佢係是新世界發展（0017）的基建及服務旗艦，業務遍及中國內地、香港、澳門。新創建係一間綜合企業，可分為7大業務：道路、環境、物流、航空、設施管理、建築及交通、策略性投資。當中可分為兩大類，即是基建及服務
整體的質素，算是不差，但又未到最高級別，業務分散於多個範疇，部分與公共事業有關，過往的生意雖然穩定上升，但盈利卻停滯不前。企業本身不是沒有優勢，長遠仍有增長能力，但由於賺錢能力略有下降，加上企業本身已很龐大，增長期望不會太多，過往過價大致穩定，此股偏向收息類多於增長類。
其實我地投資增值，係應該運用「先增值，後現金流」策略，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
所以以你年紀計，應以增值為主。你以上股票雖有質素，但除了中銀香港（2388）為平穏增長類之外，其他都收息類，欠缺增長力。長遠計，建議你將部份換碼至平穏增值股或潛力股上。
策略上，你每月儲到的錢可以動用6成去做月供，其餘先儲起，用一邊月供一邊儲蓄的策略。月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）或潛力股︰比亞迪（1211），中生（1177）或福壽園（1448）等。
現時大市在合理區，你新儲和現有的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資，這樣去增值會較適合你。
------------------------------------------------
Q14231：
龔成老師你好！我睇左老師的書，有幾個問題想請教一下！因為本人有個10年計劃，每月我可以存3至6萬元，其中8成會存股票，希望可以係10年後每月有3至4萬被動收入！
現在月供5000 元2800，2000比亞迪，5000 元12！還有每月預留15000至20000購入12！因為我覺得佢10送1股幾好！
問題係老師你講過10送1其實係冇分別，但如果佢每年10送1後，再下一年會升返去10送1前的價位，這樣想是不是即係我已經賺了佢10%？
因為我會存10年以上，這樣每年複息會很好！
龔成老師︰
10送1其實只是數字遊戲，單純這個動作，投資者係唔會有任何得著。而你所講"但如果佢每年10送1後，再下一年會升返去10送1前的價位。
這樣想是不是即係我已經賺了佢10%"，這個想法其實同好多人一樣。但你要知道重點是你所賺的10%，係來自"本身企業增值"，而非"10送1"所致，這10%升值就算無10送1，也會在你股價中反映出來。
如果你希望10年後每月有3萬現金流，以股息率5%計，你就需要本金720萬。由今天起你每月將4萬元投資在優質股上，以恆指年回報10%計，10年後大約有760萬，基本上以達到你目標。
策略上，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）或潛力股︰比亞迪（1211），中生（1177）或福壽園（1448）。
但你要留意翻恆基（0012）是優質，但也不要過度集中在此股。因為當這股或行業出現問題，就會嚴重影響到你組合的回報，緊記留意這個行業過度集中的風險。
------------------------------------------------
Q14232：
龔sir，剛剛睇完股票勝經和80後3，大致上了解你想帶出的訊息，估值企業核心價值才是關鍵，股價只是表面短暫市場氣氛情緒的數字。
所以懂得估值才是最值錢的地方，股票勝經內裏的例子用了現金流折現法，但當中計算和預估數點有點複雜，仲未太明白，現金流折現法仲要唔要再深入研究?
因為阿sir你話股票班會教市盈率估值法，係80後3有個例子都睇到有你的學生計算左，大概都明白個計法，但市盈增長率。
行業合理市盈率大概要上堂阿sir才會詳細教授
很想增值自己的理財知識，如果時間和金錢預算到，有興趣報讀股票班。
龔成老師：
首先，企業價值是一個重要概念，因為「價格」同「價值」並不相同，一般散戶只會集中價格，而真正的投資者一定會考慮企業價值。
但要正確計算企業價值，並不易，因為有好多不同的方法，而現金流折現模式，只是其中一個估值方法，在我的股票基礎班，會教3個基本的估值法，這都是最常用的，現金流折現模式是其中之一。
由於估值不是易學，所以在我的股票基礎班，都要用近2堂時間，先講得明。我相信你上完股票班後，會有更具體的概念，同時能自己計算。
------------------------------------------------
Q14233：
想問下3836點睇
目標位幾多
龔成老師︰
其實，我從來都不會為優質股訂下明確的目標價。
我賣出一隻股票只會基於下列幾個原因： 我買入優質股後發現自己犯錯、這股核心的質素轉差，變成非優質股、又或是市況過熱。如果一隻優質股質素不變，我地係唔需要賣出，反而長線持有才最有增值效果。
和諧汽車（3836），當中國經濟近年增長較弱，這類檔次的車企會受影響，由於預期中國經濟接下來不會太強，而車市競爭加大，相信對佢仍有影響。
睇翻佢近年的財務數據，生意近年都無增長，同時盈利較為波動，相信以中國的經濟情況，中短期仍會較弱，股價會比較波動。
這股不是完全無質素，只要佔你組合唔係太多，可以持有。
------------------------------------------------
Q14234：
老師你好。因本次時間不合關係，未能報上你的堂
希望2月有能上堂的機会
未知可否請教一下
我約有20萬存款
有5000股煤氣
每月閒錢大約20000
希望每月能投放在投資上有10000左右
最近睇了你書的分析也有留意供股
我的目標是2到3年内可到100萬
希望有得到你提點的機會，謝謝你
龔成老師︰
課堂你可以留意翻我FB資訊，其實我的課程係有得補堂的，到時你可以盡量就，睇下時間上配唔配合倒。
我地投資股票就同投資在一間企業上，一定要長期先會見到回報。而2-3年是一個短的年期，中短期會較受外圍因素影響，因此回報不確定性也相對較高。如果你打算月供的話，最少5年，甚至10以上會較好。
策略上，你可以將每月儲到的錢，可以6成去做月供，其餘先儲起，用一邊月供一邊儲蓄的策略。月供方面，你可以選擇投資在平穏增長股︰
盈富（2800）、金沙（1928）、恆基（0012）、中銀（2388）、港鐵（0066）、港交所（388）、長建（1038）、粵海（0270）、領展（823）、深高速（0548）
現時大市只在合理區，你餘下的現金就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。
由於你本身組合中已有不少煤氣（0003）持貨，為避免過份集中在某一行業，所以暫時唔建議你月供佢住。
------------------------------------------------
Q14235：
我想問823遲下拆細對股價有咩影響？
一直月供緊
龔成老師︰
我地投資一隻股票，其實就等同投資一門生意。我地會基於生意的盈利、前景、市場環境等基本因素而決定買入，只要企業的質素好，買入後就會長期持有，若這些因素有根本性的改變，就可能要賣出。
"拆細"這個動作，會令計算每一手的股票單位減少，變相你會快左儲到一手貨。這舉動短期可能會影響價格，但這都只是一個心理上因素，與企業本質無關。
這個變動基本上對你月供唔會有影響，你照樣維持月供，並長線持有就無問題。
------------------------------------------------
Q14236：
成哥，想入少少長和（1號）值得長渣嗎？
什麼價位可以入？
龔成老師︰
長和（0001）有質素的，但這是綜合企業，增長力不會好強，所以只能視為收息，以及有平穩增長的股票。
同時，佢旗下公司有唔少業務在歐洲，而近年歐洲較弱，因此近年的股價表現一般。
以估值計，現時算是處合理價，有投資價值，但不要預期增長好勁。同埋，歐洲仍會令佢中短期較弱，要長期先有收成。
------------------------------------------------
Q14237：
成哥, 之前請教過1177, 也在$10.12入了貨.....想過現教對1789及3319有冇特別意見及建議購入, 謝謝!
龔成老師︰
愛康醫療（1789）算是不差，這股有潛力，但規模細，風險會較高，雖然從財務數據睇，佢的賺錢能力不錯，生意有理想增長，盈利增長快速，股本回報率高，但上市年期不算久，這點令過往的數據，未知能否反映佢的真實情況。
因為好多公司都係，上左市2年後，才慢慢見真章。如你投資這股，建議你不要太大注。
雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。加上這企業的背景因素，以及行業的發展，相信這企業的前景不差，有長線投資的價值。
這企業的發展快速，可說是有危有機，雖然可帶動業務快速增長，同時會令企業造成風險，你要明白這點。但這刻都不能叫平，如投資，最好分注投入。
------------------------------------------------
Q14238：
龔Sir,想問下1728 正通汽車前景如何？ 下年加大補貼，會不會繼續帶動股價呢？
2.8 有貨，比起3669有點弱
龔成老師︰
正通汽車（1728）係汽車經銷商，亦提供汽車相關物流業務、潤滑油貿易業務，以及金融服務。佢銷售之汽車品牌包括寶馬、ＭＩＮＩ及奧迪等豪華品牌，此外，還包括日產、現代、本田及雪佛蘭等中檔市場汽車品牌。
近年生意都有增長，但見盈利增長有減慢情況。股本回報率處較低水平，同埋佢較受經濟週期影響，對貿易相關都會有影響，所以股價會較為波動。近期中國車市放緩、外來競爭、行業競爭加劇等不利的因素，都對整個汽車行業造成影響，相信中短期仍會對佢不利。
此股雖然有質素，但只算中等。而且你買入價算是合理，此股佔你投資組合比重不高，可以持有，但長遠轉到其他優質股會較好。
永達汽車（3669）都算有質素的，佢係中國的乘用車零售商，較專注於豪華及超豪華品牌，集團主要透過「永達」品牌。
在定位上，都有一定的價值，但負債高企是較大的問題，這會對企業造成較大風險，這類股亦不建議投資太多。
現時企業估值合理，能反映當中的風險，而中國車市中短期仍會較為波動。
------------------------------------------------
Q14239：
請問，你成日話港鐵賺錢能力好強,但我睇你本股票勝經裏解釋，ROE股東權益回報率，你話ROE越大，賺錢能力越強，大家可以用12%作為一隻優質股要求的回報率，但港鐵前五年既年報，都冇1年係過10%，咁點解你話佢賺錢能力強
龔成老師︰
我一直推薦港鐵（0066），是因為此股的獨特性好強，本身已經壟斷了全港的鐵路，同時政府表明香港之後的發展，只會更依重鐵路，因此往後佢只會更強。
無錯佢ROE過去大致都10%水平，而非我所講12%以上的標準。
這是由於港鐵本身資產已經十分龐大，例如鐵路系統，當中所能創造的回報率不高，鐵路的客運業務賺錢能力有限，而由於當中資產龐大，故令ROE受拖累，此部分的再投資回報率必然不高。
不過，鐵路系統是重要的一環，因這是創造高利潤的地產項目的先決條件。由於以鐵路加物業綜合發展模式運作，故將來的ROE亦只會是相約水平。
綜合而言，由於港鐵有獨有優勢，而且在長遠仍有發展空間，雖不會有太快的增長，但平穩發展絕對沒有問題，故港鐵絕對是優質的企業。
更重要的是，香港的長遠發展必然是向著新市鎮，鐵路系統必不可少，故將來對鐵路的依賴必愈來愈多，政府亦表示這會是發展的重點，故無論是鐵路以及相關的物業，都會保持增長，長遠計必然向好。
ROE只係一個分析企業的指標，有時優質企業未必附合個別指標。所以，我地分析企業時候必需要睇好多野，要好立體咁理解成件事，最後才會得出港鐵的優質股的結果。
------------------------------------------------
Q14240：
岩岩75蚊入左兩手0303 vtech 諗住長揸收息。請問你對依隻股票有咩睇法
另外都想入手6889
請問有冇咩意見
龔成老師︰
偉易達（0303）雖然近年的股價較一般，但本質都算不錯的，但就唔叫好強。
佢過往派息比率高達9成，成立於70年代，業務是電子產品，這麼高的派息，反映管理層明白這公司已過了最高增長的年代，之後只會是平穩增長。
公司已不需要每年投資發展，反而管理層、大股東，偏向想收息，因此這是重派息多過重發展的公司。
雖然佢係某些業務做得不錯，但發展心不強，同時大環境並不是高速增長，故相信佢之後都會平穩。近年這公司的生意，都是平穩增長，如果比較幾年前的盈利，都是差不多。
因此，作為收息股是可以的。由於佢之前公布的中期業績，生意同盈利都出現了下跌，因此股價受壓。我相信佢唔會太差。如投資是可以，但不能太過大注。
至於DYNAM JAPAN（6889），其核心業務為經營日式彈珠機遊戲館，提供體驗日式彈珠機及日式角子機兩種遊戲的場所，並以連鎖店模式經營，分店遍布日本各地。
佢係是行業內最大型的日式彈珠機遊戲館。雖然整體來說，這企業都算穩健的，但再仔細睇佢的業務數據，營業額數年都無增長，反映市場已經飽和。投資價值只屬中等，如你想找收息股，這股可以，但不要對股價增長有太大期望。
----------------------------------------------
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
