法治作為美好回憶
法治係英治嘅重要遺產，冇迷信過法治，其實就稱唔上香港人。相信法治，意識唔到中國之醜惡，係香港民族嘅共同經歷，而法律界精英嘅Hongkongness greatly originates from this。渴求公義，係因為香港人曾經感受過法治社會之美好，而曾經迷信，更加係香港人希望建立一個長久和平社會嘅重要動力。故此，我無意discredit仍然相信法治嘅人，亦唔會discredit法治，因為法治對香港民族而言，係一種近乎集體回憶嘅共同體體驗，大家都應該要永遠記得。
香港曾經係英國殖民地，而英國呢個宗主國講自由講民主講多元，故此法律之於香港人而言，就係一個社會所共同尊重而約定共用嘅語言。法律係文明人解決問題嘅工具，所以佢喺國與國之間都可以行之有效，因為各國都對法律原則有相同理解，而呢個就係所謂法治係普世價值一說出現嘅過程。香港人每次下意識覺得法律可以解決社會問題嘅時候，都係再次確認緊香港人真係受過西方主張嘅普世價值影響，同時證明緊香港人身上係出現咗一種中國人所缺乏嘅優秀社會基因。
社會基因唔可以同生物學意義之基因相提並論，但討論社會文化以至民族建構之時，講種族講血統，亦一早過時。香港人口之中，有好多都係中國移民後代，佢地之所以逃難，就係因為無法接受中國統治。因此，佢地選擇加入香港社會，而人亦逐漸變得與社會相容，然後習得新嘅適生模式。香港人社會基因同香港社會環境相契合，再透過言行身教去遺傳畀下一代，最終就育成出而家嘅香港人。抗爭至今，大家仍然知法守法，好多人都尚未接受法治一早失效之事實，所反映嘅正係香港人社會基因之活躍。呢個現象，不但唔會令我諗到法治膠呢類用字，反而更令我感受到香港人之與別不同，演化有成。
中國接收香港，連帶接收埋英治制度，新宗主國因而獲得對於香港嘅法律詮釋權。呢個法律漏洞，法律界一早就應該要認真看待，但換個角度睇，法律界嘅無知，其實又何嘗唔係香港人嘅共業？得過且過，奢望民主中國會突然成真，唔願意流血犧牲，的而且確係接受主權移交之時，普遍香港人嘅天真心態，呢啲都係香港民族歷史一部分。唔經歷壓迫，唔會成長，唔共同生活，唔會生出民族情感，只有接受過去，接受失敗，大家至會有成長成熟嘅一日。
香港民族孕育需時，九十年代嘅香港人根本唔會支撐得起今時今日嘅大規模抗爭，呢點大家都要理解，因此亦毋須苛責前人如李柱銘之流。李柱銘可能係膠，但佢嘅視野受成長經歷局限，唔代表佢唔係香港人，因為香港人嘅基因同能力係一直係演化緊。既然改寫歷史嘅責任真係降落喺我地肩上，我地就應該調整心態，精進自身，而唔係一直批評其他人，甚至標籤法律界精英為法治膠。假定命運為盲眼之駱駝，肆意踐踏自身，自我放棄，只會令自己距離出路更遠。
回望歷史，以美國為首嘅西方各國同日本都一度以為中國有意加入世界秩序，將會自然踏上所謂衣食足而知榮辱嘅進步路徑，然而，三十年過去，事實並非如此。各國睇到中國充當世界工廠嘅潛力，畀機會中國加入國際體系，另一方面又以為蘇聯解體就算係打敗共產主義，倦勤疏懶，唔再繼續清除餘毒，結果就係放生咗中國呢個計時炸彈。原來，中國從來無意安分守己，對普世價值嗤之以鼻，而且終極目標係意圖獨力挑戰拒絕古老帝國模式再起嘅現代世界，即使要發動戰爭都在所不惜——全世界後知後覺，如夢初醒，忽然就開始話中國賤視法治，唔尊重知識產權，開始制裁，其實惡果都係美國自己造成。
中國之世界觀，與現代文明國家差天共地，文化之極端相異，導致彼此之果然無法溝通，份屬必然。中國唔係以主權之國（state）自我定位，而係自視為歷史之國（country），因此主權概念同契約概念，都係佢地唔會跟隨嘅夷人玩意。西方國家本來係打算當中國係稀有物種咁養住，保持高人一等嘅姿態，賺取文明落差嘅紅利，無奈中國自身存在已經係寄生於世界秩序，以解構既有文化傳統同奪取市場生產成果為生存之道，美國迫不得已，就要收拾殘局（或協助東亞國家收拾殘局），而香港抗暴起事，爭取獨立，只係中國覆亡奇幻小說嘅開卷引子。無論如何，中國對於世界形勢同埋歷史進程嘅錯判，最終必然會令中國不得不接受已經拖延咗足足一個世紀嘅殘酷現實，就係真正而徹底嘅國體崩解，夢想幻滅。之後，由中國分裂而成嘅各國，將會重建社會共同體，然後建立國體，擁抱法治，學習告別中國，不過呢啲都係後話，唔係香港人目前最需要諗嘅嘢。
講返香港。進入亂世之前，大家應該把握時機，一齊檢視過去，趁機思考法治為何物。因循守舊，就會淘汰，努力求存，至會有得留低，從來都係大自然法則。法治之所以係香港社會之基石，在於香港人具備相信法律之信念，呢點係香港人可貴之處。中國人之所以事事訴諸暴力，中共之所以要以閱兵控制人心，就係因為佢地無法如同香港人一樣，以非暴力方式解決紛爭。如今，香港社會全盤赤化，永無寧日，已經失去非暴力嘅安逸空間，而星火戶口資金凍結之事發生，正係直接揭示出中共治下之法治根本無法如同西方模式正常運作，而且中共完全無意同香港人講和，還原所謂一國兩制。凍結戶口，下一步就係順藤摸瓜式大搜捕，企圖嚇退打算喺各位崗位支援抗爭嘅香港人，連捐錢都要嚴打，連做家長都要以洗黑錢之罪名趕盡殺絕。
以上狀況其實正係中共一貫打壓手段，中國人其實一直都活於呢種恐懼之中。香港人有別於中國人之處，就係中國人已經綁手綁腳，而香港人係會傾力反抗，而如此意志，所導向嘅就只有獨立戰爭。戰爭狀態前夕，大家趁早開始培養新習慣，保留現金糧食備用，都係及時。經銀行過數，資金流動盡在中共掌握，短期內會影響日常，但好快大家就會理解到對方權勢之無處不在，然後更加睇得清楚將來香港嘅情況係可以變得有幾嚴峻。概而言之，接受法治只會喺建國之後至會重臨香港，就係大家要建立嘅正確認知，而意識到既有秩序將會瓦解，大家更要團結一致，互點提點，守望相助。
香港人最突出嘅民族性，就係適應力強，而讀得法律嘅人，自然亦唔例外。因此，我希望大家可以思考清楚，香港獨立戰爭爆發在即，大家腦中所擁有嘅法律知識，到底可以點樣運用於盡量保留香港人經濟實力，以及減少香港同胞傷亡。大家已經唔會再有機會，為中國治下嘅香港建構任何新事，保障任何權利，因為中國從來都係以人治高於法治，而香港亦唔會再成為極權國家轄下嘅特區。繼續相信一國兩制有得修復，迴避中國解體在即嘅局面，只會白白浪費大家嘅才智，拖慢香港民族進入未來生態位嘅速度，甚至連累香港錯過難得一見嘅機會窗口。
學習，理應係為咗回饋社會共同體。追逐普世價值而忘記民族苦難，繼續喺現有制度之下漫無目的咁埋頭苦幹，必然係本末倒置。法律界精英最終只配飾演舊時代精英，同中國香港一齊埋葬，定係識得及時跳船，為日後香港民族建國準備，成為創建國家司法制度嘅真正精英，全繫於人嘅一念之間。學識淵博，但心中空洞無物，眼中只有利益者，註定係次一等嘅人，而我地香港人之所以有資格自外於中國，就係因為我地眼光遠大，心中有愛，知道自己努力精進嘅目標何在。當我地去到一個境界，係每做一件事，每睇一本書，都係思考緊自身對民族之歸屬承擔，咁一切知識都會發揮作用，加乘變大，最後令到香港民族資本持續增進，達到堅不可摧。
舊有法治已死，但香港民族尚未枯死。安葬之後，如此養分充沛嘅土壤，未來必然會開出更加茁壯嘅法治之花。香港人可以連繫過去與未來，再次以東方之珠美名立足於東亞，而要見證開花結果，靠嘅就係未來十年嘅播種灌溉，耕作不息。
失去法治，唔等於會失去香港。但有香港，就一定有法治。只要心中記得法治，中國解體之後，法治就會跟隨主權，重新回歸香港。
https://gnimmm.com/2019/12/19/the_essence_of_law/
credit: 文宣手足
亂 葬 崗 工廠 在 看板Gossiping - [問卦] 亂葬崗有沒有比較好聽的說法？ 的推薦與評價