屈機文字．厚積薄發的女科學家 By 阿暖
各位好，我係阿暖。我想喺度同大家分享一個『屈機』嘅故仔。
咁屈機有好多種。
今次呢種屈機呢，如果有睇阿暖嘅小說，應該都好熟悉⋯⋯叫『厚積薄發』。
話說有位女科學家啦，大家如果鍾意，可以幻想到佢又靚女又性感咁（邊個無後生過？）
呢條女係一個好固執嘅人。
佢好後生就決定咗一生嘅研究方向，覺得呢樣嘢，最終係對世人有用嘅。
咁『呢樣嘢』呢，當時科學界曾經認為好有前途，但後來技術無咩突破，卡住喺個瓶頸度，令好多同行都中途放棄咗⋯⋯
但呢條女一啲都唔珍惜青春，係都要研究落去。
咁佢讀完博士之後，就喺研究所全職研究啦，點知後來間嘢倒閉埋。咁佢係匈牙利人嚟，見喺國內再無研究機會啦，就變賣家產，舉家搬去美國，繼續追夢！
但去到美國之後啦，佢四圍走去申請研究基金，都唔批。
後來或者佢個領域真係太冷門，佢論文發表不足，仲俾大學降職減人工。嗰時好多同行勸佢唔好咁執著，以佢料子，轉去啲熱門題目，好容易攞到資助。
但佢唔肯。
結果連佢返工嗰間大學，都關埋佢水喉。
後來佢終於搵到人合作，研究有咗突破性成果，終於有資金可以繼續研發落去，但始終無法達成佢嘅心願：就係用呢樣嘢去廣泛造福呢個世界。因為無公司肯吼佢個成果。
幾年後，佢終於搵到三十年來第一份穩定嘅工作：入咗一間叫BioNTech嘅公司做嘢。
然後到2020年，新冠肺炎大爆發。
佢個團隊用咗幾個鐘頭，就用咗自己已有技術，研發咗而家被稱為『復必泰』嘅疫苗出來。
啊唔記得講，條女個研究題目，叫『信使核糖核酸』即mRNA技術。
當我睇到呢個故事時，我心諗：
佢肯定唔會喺30年前，就預言到會有新冠肺炎吧？
呢啲就叫做厚積薄發。唔係有30年不懈積累，點可以幾個鐘頭就研發到個疫苗出來？如果無呢條女，可能到呢一刻，都未出到第一隻mRNA疫苗呢。
最後利申：
阿暖無意喺本文建議你打或唔打疫苗，我想講嘅係關於一位坐咗30年冷板嘅科學家，最終影響世界嘅『屈機』故事。
呢下屈機，係用咗30年時間去準備。
我覺得好值得寫落嚟，對嗰啲一直堅持自己做啱，但仲未見到成果嘅人嚟講，呢個係好大嘅鼓舞。
最後呢位科學家叫Katalin Karikó，我叫佢『條女』只係想口語化啲，絕對無不敬意思。反正大家都唔會記得呢個名，佢自己都唔指望你記得，但佢會希望你記得mRNA疫苗。
就係咁。
多謝大家收睇。我係阿暖，以後有值得一講嘅『屈機』故事，再同大家分享。
#屈機文字 #暖島出版 #阿暖 #BioNTech #復必泰
令人鼓舞意思 在 看板Baseball - [討論] 王柏融神之眼智選保送！！ - 批踢踢實業坊 的推薦與評價