【英國不只有陰天】
最熱嘅日子，去最多人嘅地方
英國天氣响好多人心目中，一定係陰天同落雨。其實都唔係錯晒嘅，多得全地球嘅天氣反常，英國嘅天氣响呢十幾年變咗好多。以前嘅夏天得幾日叫做係咁意熱下，依家分分鐘熱足個幾兩個月。就好似今年咁，由六月到今日年落咗半日雨咁大把。每日嘅溫度，至少廿八度以上，有幾日直頭係三十幾度。
早兩個星期，响今年最熱嗰一日，我地一家人就去咗英國其中一個夏天旅遊勝地Brighton Palace Pier。去一個地方玩，我唔會再好似以前咁，盡務求一日去十幾個境點。Brighton緊係有好多地方值得去，而且夏天去亦都最開心。做人嘅嘢，休息同玩都應該慢慢嘆，趕頭趕命何必呢。而且呢個天氣去，係多人到好似淺水灣一樣。再加埋世界杯，個海灘有直播就更加唔係講笑（夜晚九點幾先開始天黑）。
Brighton Palace Pier係一個成百年歷史，响海灘中間碼頭起嘅遊樂場。玩嘅食嘅都係嗰啲大家想象到嘅嘢，唔會有乜驚世刺激機動遊戲或者美食。一切都係氣氛同風格，英國就係一個咁嘅地方，就算係夏天旅遊熱點，都唔會賣弄什麼。亦唔會起啲無敵大海景嘅豪宅，或者六七八星酒店。價錢又係普通收費，玩嘅亦係幾十年唔變。原因可以話係窮，又可以話係保守，但偏偏我就係鐘意咁，如果乜都係係新同埋豪華，真係相都唔想影多張。
#夏天無帶來雨水
#但係有好多腹肌
#仲有唔少三點式
#最多嘅係大肚腩
Photos by me!
Fujifilm X-H1 with FUJINON XF10-24mmF4 R OIS
