//本Page Patreon經已開通，請訂閱支持本Page運作，謝謝！ 連結： https://bit.ly/2TvzIaF //
有好多人話其實動畫版只係小說版嘅一部份剪輯出黎，所以唔睇小說版根本領略唔倒作者神髓，的確，三套作品都有啲嘢係唔太完整，尤其係《屍者的帝國》係完全唔知佢講乜9，真係要睇番劇情補完先得，個感覺就好似當年睇緊「Harry Potter電影版」咁……
不過動畫係有動畫嘅好，因為映象化始終比文字帶黎嘅衝擊更大：尤其係《屍者的帝國》，啲畫面真係做得好靚仔、直頭係有當年《Steamboy》水平，同埋我真係唔夠時間睇埋小說版，6個鐘貨仔咪睇住呢三部曲當頂住先囉。
唔夠時間睇小說版，但單單講動畫版，其實已充份感受到伊藤計劃思想嘅宏大：《屍者的帝國》就係一套《科學怪人》嘅Steampunk版再造，就算你話動畫劇情點垃圾都好，至少都比起同樣背景嘅《甲鐵城》有深度10倍先，即係剩係講因為科學怪人嘅啟發之下發展出用死屍做工人奴隸、然後社會由最初完全抗拒，到大量女性挺身而出支持軍隊死屍化替代佢從軍嘅老公，再去到周街都係死屍行黎行去大家習以為常，個場面經已非三流移科幻作品可以想像出黎。
但要講到作品深度，當然係以《虐殺器官》同《和諧》排一二。兩個作品就好似《Black Mirror》嘅複雜版，將未來科技點樣同剝奪人生自由嘅監控配合，營造一個新世界。當然《Black Mirror》都有類似嘅設定，但前兩者經已唔係再糾纏於周街監察鏡頭、所有你嘅行蹤、消費都追尋得到，又或者社會信用點樣將每個人數字化點樣恐怖，而係呢個世界嘅人點樣樂於接受呢個結果，而且點樣成為一個新生活嘅共識，反而蓄意想去打破呢個監控制度嘅人，先係真正嘅恐怖份子。
《虐殺器官》同《和諧》都有好多深奧嘅哲學同理念想表達出黎：例如《和諧》想表達嘅，唔係由上而下果種高壓式監察體制，因為連統治者都知道咁做必然會有強大反抗，反而係透過群眾口中所講嘅「關懷」、「團結」，向同儕之間施予壓力，令佢地接受放棄自由、為集體社會貢獻呢個選擇。至於《虐殺器官》則係講，響一個徹底監控嘅社會之下，反而真係達成根除咗將所有恐怖活動威脅呢個理想結果，所有嘅動亂都轉移哂去啲第三世界國家……
呢種集體主義所塑造嘅烏托邦，其實響現實我地都見怪不怪──個分別只在於我地仲未去到實現嘅階段，而只係聽班政棍9吹而已：例如特區政府會同你講，一個同心協力建設香港嘅社會係會幾咁幾咁美好；而飯民則會同你講，一個35+成功咗嘅立法會係會幾咁幾咁美好……但佢地唔會同你講嘅卻係，如果你唔肯「享受」呢種團結，就會受到組織嘅全力排擠同追殺。
有關伊藤計劃三部曲要講嘅嘢實在好多，但不知不覺都寫咗成千字，為咗唔係搞到太冗長，只係講多三點就算。一點係《虐殺器官》提到語法嘅編排可以促成人類殺意嘅醒覺（受影響果部份嘅腦組織，就係虐殺器官），當然我對語言學嘅認識係有限公司，然而透過語言去鼓動人民情緒甚至放棄思考，如今卻係歷歷在目。
例如「反中亂港」呢四個字，其實已再無實質意義，但藍屍一聽到，就會自然產生一種防衛機制，對所有反政府嘅意見展現仇視態度；然後「不分化」自從被飯民大台轉化成洗腦咒語之後，每當黃屍之間一講起、聽倒呢句說話，亦會好自然產生一種仇恨情緒，認為所有對飯民提出質疑同異議嘅人，都係搞散場運動嘅「鬼」，因此無論佢地嘅指控幾合理都好都唔需要討論。
所以究竟係思考透過語言展現，定係語言刺激、影響思考嘅方向，睇完《虐殺器官》之後我都唔係好搞得清。
其次，就係我其實唔係幾鍾意果種不停拋書包展現自己睇過好多書、識好多歷史、識好多作家嘅寫作方法，但由押井守去到涼宮作者谷川流再去到伊藤劃都係樂此不疲轟炸堆經典Term出黎，咁我就只能接受呢種係日本作家嘅風格啦。
最後不得不提，《虐殺器官》個結局真係好正，如果你睇完之後一定要上網睇番啲補完資料，確認下自己係咪真係明個結局，我好彩估得中最尾個男主角想點，沾沾自喜之餘不禁回味再三；至於《和諧》個結局雖然係另一種終結，但將所有特權階段終結「河蟹」其實亦係真心正。不過兩套作品都有一個共通點就係，只有攬炒，先可以真正改變倒個世界，任何改革嘅嘗試，最尾都只會淹沒於集體主義社會之中。
