話說今日睇到劣食教母向美食節商戶的合作邀請，拍一條美食博覽精華片，介紹多種場內美食，兩款食物的「真心推介」費用索價兩千，歡場無真愛，但收錢試食有真心，群眾嘩然。喂，佢上次推介人去泥頭山上面「高質BBQ」都係咁啦，你仲可以有咩期望？
但你又唔好理，佢就係企硬十幾萬個like嘅大page，你可以恥笑佢專推介垃圾，但慘得過佢又有班讀者，肯次次都信佢味蕾踩地雷？我早前同一個朋友討論過呢個現象，我那位朋友話「無架，你要明白呢個世界，真係有啲人係唔識食，總之你拍條片靚、吸引，大大隻字話俾人知抵、平、大件，就會衝過去架啦。」
我苦笑不語。
香港地，大把劣食，我返香港時去過一間九龍塘商場裡的酒樓，都未點完菜已經有一隻小強，我旁邊的牆上爬。我只好拜託店員把牠處理好，仲要唔該前唔該後，大佬我一碟菜都未上，我唔想你切碎小強幫我加料。留意返，佢係一碟咕嚕肉都收一舊水，同倫敦唐人街餐廳一個價錢，但難食過唐人街文興好多嘅酒樓（唔好誤會，唐人街我首推文興，呢間野ok架）。我有冇出聲？冇。而今個月有朋友在同一間酒樓食到食物中毒，但依然唔敢出聲。廢事啦，依家網上大家鍾意睇拍片影相好睇嘅垃圾餐廳，你唔讚人散播正能量係你唔岩，上網鬧人地間無良酒樓，你迫害小店、你想搞到人無左份工！哈，小店？開在一線大商場裡的小店，你少個錢都唔掂呀。
早幾個月睇雜誌介紹一間在法國沒有分店的連鎖法式餅店，介紹蛋糕時搖下搖下，件餅動L咁款，喂大佬，你留意返慕絲唔係啫喱，唔係「震騰騰、開心心」，如果你浪到好似呀六師弟奔跑時嘅脂肪咁，係唔合格架，喺法國一早俾人扔左落垃圾桶啦（放心，唔會餵狗，法國人很愛狗，不會虐待動物）。不過唔緊要，條片拍得靚又自然過關。香港無野多，「環保人士」最多，仲要排隊俾錢食垃圾，如果多點附庸風雅之仕，又或者多點會拍靚片的媒體，香港堆填區問題一早解決左啦。
但我有冇婊揚？冇。
因為要是我指住一件疑似高級「美食」，話人地啲野係垃圾，縱使對方心入面很清楚知道，其實一點也不好吃，礙於面子還是要跟你反檯的。與其承認自己排隊食左一件垃圾，不如話你唔識貨，人人都話好食，個個食家(?)都讚好，點會唔好食？我見大家咁開心，又反正無食物中毒，就不必枉作小人，反正又唔係我食，我俾個like你又有咩所謂？反正，你排咁耐都係為左呢個like之嘛...
#留名等睇對號入座
#準備掃玻璃
#哇那雞腸雞肚痛
#哇那雞心面又紅
#國皇的新菜
#現實係班群眾會拎石頭掟死個細路
#然後稱聲自己站在雞蛋的一方
#係個細路態度唔好囉
#好一班矯情的小賤人
#所以我依家學會了欣賞睇人食垃圾
#仲會俾個like對方
#世界幾咁和平
#但你啲野始終都係垃圾
