《換季不換衫 之 其實我真係咩都有》
今日係8月26日，要好好記住今日，呢刻起決定自行強逼自己參加「今季不換衫」challenge，自己challenge 返自己！
好耐之前睇妙手仁心，程至美話所有生物中，只有人類先會咁容易有唔開心嘅感覺，佢解釋「所有生物當中，只有人類有『冇』呢個concept，其他動物只會諗自己有咩，人類就會諗自己『冇』咩」。我冇考證過程至美呢番說話嘅真實性，但諗深一層，其實真係冇其他生物好似人類咁，有咁多身外物，依然都咁唔滿足。 (你亦可以話呢份唔滿足同貪婪，成就左人類成為地球嘅最高等生物，控制其他生物嘅生死)
To be honest，其實我同商朝紂王一樣，都係(比較)揮霍無度。我呀媽成日都同我講「你日日返屋企都有野買返來架喎」，而我啲friend 都有同我講「新架呢個又？」
今個summer，我去左歐洲，然後又痴左線咁買左好多冇咩用嘅野，其實今次嘅旅程已經同個friend 約法三章，每行入一間店，諗下個樣野自己有冇？諗下個樣野係抵定係靚？諗下個樣野係想要定需要，最後係一間店唔好買多過一個手袋。我亦唔知購物嘅樂趣係咩，但無論點set rules 比自己，最後都一袋二袋咁離開歐洲。
喺旅途中，其實見到唔少行乞嘅難民，有一日血拼完，去左一間餐廳食左餐食幾個鐘都未食完嘅法國菜。然後突然覺得自己真係好可笑，話說我睇一個歐洲攻略，教人點防止買完名牌手袋之後，避免比人打劫，個攻略就教人首先你買個垃圾環保袋，你買完個名牌袋之後，你就用個垃圾環保袋包住你個名牌袋。我睇完呢個攻略之後，真係覺得一切都好多餘，唔係個攻略多餘，而係買身外物呢個行為好多餘。本身去旅行就好carefree，一身輕咁relax下，但你又要去買個「包袱」，全程提心吊膽，本來無一物，何處惹塵埃。
食食下個餐食極都食唔完嘅法國菜，我話「其實我地真係好有錢」
我朋友大笑起來....
「係喎，你岩岩見到周街都有難民乞緊食，我地有錢到去排隊買手袋同有錢到去旅行喎」
其實，我真係咩都唔缺，雖然我日日掛喺口邊話我欠層樓，但其實依然有一陋室，自己有間房，「何陋之有」。
既然咩都有，就唔好物欲薰心。
#由這一分鐘開始計起都不準買衫
#唔買野唔使煩唔見野
＃你得間陋室點解仲要買咁多野佔用空間呢
＃一齊鬥忍得耐唔買野
