【英國打工真係好慘】
人工低，稅又高，亦要供National Insurance，唔知有乜好？
...不過...但係...大家嘅Take Home Pay有幾大分別先？
耐唔耐有啲好得意嘅留言，話英國啲咁嘅沒落國家都好去住。亦有人講英國搵錢少稅又高，唔知點解要去。英國沒落與否，我都唔想討論啲咁低質嘅話題。不過講英國打工搵錢慘，我又真係可以同大家討論下。打工嘅嘢不外乎係講Take Home Pay，其實英國打工嘅慘啲，還是香港嘅陰公啲呢？
唔好講到太複雜，假設同一份中產嘅工作香港搵多英國一倍（兩萬同四萬嘅分別好未？）。英國減咗免稅額（一萬鎊到啦）之後，最少都要比20%稅。諗住交完稅就無，大家太天真了。重有12% National Insurance（假如老細衰到一啲都唔幫你供的話），即係份人工分分鐘無咗三四成。咁係未夠嘅，重有出街買乜食乜都有20%消費稅。睇到厘度，大家係咪覺得英國真係一個唔係人住嘅國家呢？
免費中小學教育同醫療嗰啲，香港都有嘅無謂講（質素唔評論）。六點正收工，一年差唔多三十日假咁又點計呢？退休每個月有成千鎊攞到死（以我退休嘅年紀計），唔洗供乜乜物物退休保險同呃錢強積金厘條係唔係數？
其實計落香港最要命嘅就係居住成本，加上大家唔覺但係超貴地產商收嘅「租金稅」。英國最新嘅調查，一個中等入息嘅英國人，每個月儲15%淨收入。要响全英國最貴嘅倫敦上車比首期（20%）加埋政府資助首次置業，就要儲差唔多十年錢。供樓同人工嘅比率，係唔會過四成（全英國都自覺喊晒話好慘㗎）。
香港點呢？只係呼吸同飲水，儲首期上車要幾耐呢？新樓上九成，結果人工無咗多唔多過一半呢？香港出街消費係免稅嘅，不過日用品同食物貴過英國收咗稅之後一倍或有多。儲完錢供完樓交完租埋單，又剩多過搵少香港人一半嘅英國人幾多呢？
可能有啲已經有樓嘅香港朋友會沾沾自喜，覺得自己層樓升值能力冠絕全球。但係無邊個有膽放咗自己自住嗰層樓套現，結果咪又係一個自己呃自己嘅數字遊戲。其實全世界都印銀紙，英國嘅樓咪一樣係升（唔同嘅係人地啲人工係有跟隨嘅）。而最實際嘅係，英國嘅租金回報係一定夠供樓加有錢袋喎。
其實現今世界，响邊個國家做中產都唔會特別幸福嘅。不過我想講嘅，就係唔好只係睇表面嘅收入就自覺搵多咗。一切都係要睇真正埋單嗰條數，加上整體嘅生活同環境質素嘅。
Photo: Daily Mail
#適唔適合自己唔好拗
#係蜜糖同砒霜嘅問題
#世上無完全幸福中產
#香港有層樓唔係叻晒
#英國收租都唔太失禮
