Nj：《#無聲絕境II》好睇過前作，係少有難得嘅一件事，兩套根本係唔同嘅戲。第一集無諗過咁大賣，用條有潛力嘅橋講下日常生活，耕下田聽下收音機周圍行下，成件事比較relax，只係設計好一堆陷阱（e.g.影住粒釘成個鐘）去嚇你，實際唔算好豐富，仲覺得咁都要生仔、咁都可以容許粒釘喺條樓梯咁低能有啲嬲，唔係好高手。
.
今鋪唔同喎，玩到侏羅紀咁，當啲怪獸係速龍咁拍，三四日嘅冒險濃縮豐富緊湊，仲出現返一大堆前作標誌性信物。導演識玩，自己角色死咗都加返段前傳自肥，又拍得鬼咁緊張好睇，即使只係怪獸肆虐小鎮都覺得精彩。回去第一集嘅時間點，好似劇集咁即時接返上次個尾，加咗好多元素（e.g. 限時缺氧、探索新區），keep住有嘢睇有刺激。嘈過第一集好多，少咗嗰種唔敢抖氣發出聲音嘅感覺，多咗逃跑解困反攻嘅動作同計策。
.
所有戲有樣野我都好怕… 就係分幾條線做任務。從來都覺得這只係方便拍戲慳錢嘅技倆，經常迷失於唔同隊伍各自不清晰嘅目標。但呢套竟然可以將三條線連結得咁好，有實時進行嘅感覺，交叉剪接得精準。結局唔係咩大場面，但個情緒塑造得非常高漲，代入老母視覺感受呢場同步KO簡直覺得老懷安慰… 興奮唔係死裡逃生，而是睇到仔女終於長大，唔需要再時刻憂心…
.
加入狂友fb群組【 #狂氏電影綜合症候群 】
*// http://bit.ly/32xJWLp //
直接交流 × 傾講電影有你起頭！
