//支持本Page請Click入內文比Clap，謝謝！//
本身已積埋好多話題想講，包括三毛攻勢檢閱、再論冷氣軍師、私了就係要打頭、連登假聲明真割席、「懲罰」抗爭食店、分化與妥協嘅辯論……但最尾我都係揀咗612基金黎講：因為最新已發展到「國難五金」都忍唔住出黎屌，最終仲變成躁底老闆同黃屍網民嘅罵戰添。
簡單總結下612基金其實犯咗邊七宗罪，搞到咁乞人憎：
1. 其實早響大半個月前當612雞金出咗一份去到8月24日嘅財政報告，已比人批評點解籌咗成七八千萬，最尾只係拎咗唔夠兩百萬出黎；
2. 然而去到近呢幾日，就再有人發現果200萬入面，竟然有廿幾萬拎咗出黎作為民陣遊行示威嘅音響開支；
3. 但最古惑嘅卻係，響佢地啲宣傳圖入面，只係不停列舉自己幫咗幾多個人，而完全唔提原來開支係包括贊助民陣遊行、又或者籌辦其他活動嘅廢用，等大家以為果百九幾萬全數都用黎支援義士；
4. 響資助項目方面，無啦啦又會包括咗「調查研究、舉辦活動開支或出席國際會議等。」：喂，你612雞金先頭至話可能官司費都唔夠，果頭竟然又可以贊助人舉辦活動同出席國際會議？然後當網民查詢究竟有幾多錢用咗響參與國際會議及舉辦活動時，612雞金個Page Admin卻九唔搭八地re一句：「你好，雞金信託人不能接受雞金的資助。」喂大佬，而家人地問題洗咗幾多呀，九唔搭七！
5. 響支出項目入面，又有一項叫「 項目資助申請」，去到而家支出已達80萬，但612雞金負責人當然係唔會解釋項目資助究竟有無走去咗資助啲同被捕人士無關嘅嘢；
6. 至於有關各種開支嘅數額，例如流亡海外嘅義士、經濟有困難嘅小朋友，大概可以從612雞金申領倒幾多資助，負責人一律拒絕公佈；結果只能夠係靠某啲願意透露嘅受益人口中先大概得知情況（而且多數都係唔夠駛）；
7. 即使有唔少被捕人士因為得到資助，而以過來人身份大力為612雞金辯護。但老實講，響身邊經已唔係得幾個，而係有十幾廿個Case，都係響申請保釋金或者其他援助時，遭到612雞金拖延甚至以各種手續留難，最終都係要靠朋友、甚至其他陌生人撲水先稍解燃眉之急。
根本呢啲不能受助Case已多到唔駛Fact Check，唔係都唔會令「612雞金」個名響義士之間惡名昭彰。
呢度客觀少少講，我係唔相信612雞金係會比人落格，始終好多所謂「信託人」就算點樣自己人圍威喂，萬一出咗事自己都要上身，照理就唔會明目張貼地偷；問題卻係響搞612雞金嘅本身就係飯民大台啲人，所以當然就係會有齊飯民各種積落嘅陋習：
一、守財奴性格：佢地永遠覺得啲錢係唔用好過用，因為好怕到緊急關頭無錢用，但亦因為咁，慢慢好多飯民籌番黎嘅各式各樣雞金，往往都會剩番一大笨，然後就會再以「慈善名義」將用剩筆錢捐去其他地方──當然受益人好多時都係另一個飯民雞金啦。
本來捐錢比飯民係願者上釣，比佢地左袋交右袋都係「容忍限度內的腐化」，然而問題卻在於而家呢筆聲援義士嘅錢係刻不容緩，偏偏你就響筆錢仲有七八千萬嘅時候驚佢駛哂，大佬呀，救命錢，駛哂咪籌過囉！
二、音響抗共：必須要講，飯民真係好鬼鍾意音響，下下搞運動都係音響行先，直頭可以幫佢地改個名叫「音響抗爭」。事實上當日佔中起咗個大台點解可以將其他參與者邊緣化同隸屬化？就係因為佢地擺咗套音響響台上面，然後好串咁同其他人講：唔鍾意你可以去第度起大台；佔中之後佢地曾經想監生夾死佔旺，用嘅方法就係沒收旺角果套音響。
即使去到612，民陣班搞手當日仲周圍同人講，佢地搭起咗個大台套音響值成一百萬架！（但應該係租番黎），不過當日防暴一衝成個大台即刻作鳥獸散之嘛……所以可以完全理解，點解佢地會花咁多錢響音響上面。
但問題係而家問你申請資助就又呢又路；申請音響呢就鬼咁疏爽，點可能唔開炮屌七你？
三、權責不分：民陣費高陳出Post解釋點解遊行要搵612雞金贊助，原因係民陣當初打算響遊行唔籌款，全力支持612籌款，點知自己又大駛，結果到最後唔夠錢，所以先要問番612雞金扣番「行政成本」。呢啲又係典型嘅大台文化：你民陣唔撚夠錢，一係就削減開支用少啲音響人手，一係就清清楚楚分開兩條籌款Line民陣還民陣、612還612。
但佢地就係慣咗黑箱作業，所有錢都可以撈埋一齊駛，所以平時冚得埋就唔會出聲，到出事先發覺原來撈咁攪。即係好難相信飯民作為一個咁龐大嘅組織，有大量專業人士都可以搞成咁，只可以講呢個大台唔單止理念腐化，連個結構都腐化埋。
四、官僚主義：點解義士有啲人申請援助咁順利，有啲就連借保釋金都會被拖一大輪？因為612雞金班友只會按章工作，遇著申請嘅係同開大台Friend（例如民陣律師團），熟哂門路打通哂關節，咪容易批囉；一般外人唔知頭唔知路，咪比啲程序玩到殘囉！
都係果句，平時啲錢都係你地自己友圍威喂梗係無問題啦，但而家係講緊幫全香港嘅抗爭者，所以人地先捐錢比你地架！仲用呢套官僚思維離唔離譜啲呀？
五、專益自己友：官僚主義嘅害處尚不止於效率低。當因為有班友特別識得點樣向大台「立」資源，就會提供好多機會比佢地鑽空子：講真，一個普通外人點會諗倒申請612雞金去開國際會議、去搞啲乜撚研究計劃？除咗自己友呢啲錢仲有邊個識搵？
而最諷刺嘅就係，基於申請呢呢路路無關痛癢嘅自己人因為熟門路而好快批錢；正正經經要幫手嘅外人反而係等極都無，專益自己友，亦係意料之中嘅結果。
除咗以上五點，612雞金去到今日有如過街老鼠，自然仲因為有班「係又撐唔係又撐」嘅黃屍，下下都將外人對612雞金嘅質疑當成係「搞分化」、「不安好心」，完全拒絕相信雞金本身經已沾染咗大台腐壞文化嘅事實。今舖國難五金咁撚慶，嬲到要取消「學生優惠」，呢班黃屍走去人地個Page搞事挑機當然係罪魁禍首。
即係連批評同分化、縱容護短同團結都分唔清嘅時候，612雞金都係難逃一邊繼續比人誤解、另一邊卻繼續腐化落去嘅命運。
