最近各位姊妹成日留言問我點喺apps溝仔，趁住愚人節，作為一個玩apps玩到結婚仲移埋民嘅人，第二樣野我唔敢認，但講到溝仔，你真係要信我。今次我就半開玩笑半認真地過兩招俾大家，先旨講明，溝仔真係講緊拍拖或者比較有深入的認識的那種，如果你純粹想搵狗公，你都係去搵愛協罷啦，我幫唔到你架啦。
首先，請換走你嗰張唔著衫嘅profile pic，冇錯，唔該換走佢。咩話？你練左好耐、練得好辛苦？我理得你，總之同我換走佢。原因好簡單，種瓜得瓜，種豆得豆，你張相仲搏過啲男技師，仲同我講你搵真愛？別太小看我們的智商啊！同啲中國人拎住外國護照話自己好愛國有咩分別？當然，如果你有「扮純情玩一夜情」的角色扮演癖好則不在此限，大家返埋位玩得開心啲呀下。
我明白大家都好想露，唔緊要，著返件Tee先，緊身少少唔緊要，最緊要加一條吊咀頸鍊，不過唔好收喺件衫入面而係要擺出黎，咁就好自然咁有一個「壓線」效果，你唔駛除，人地隔住件衫都知道你條事業線有料到。啲荀盤就係咁矯情，個個都希望自己另一半，如同愛情動作片演員十八般武藝樣樣皆精，但真係俾佢地揀，總是會虛偽地迴避戰鬥格的對象。很不幸地，他們這種心態會很容易被綠茶婊捕獲（呃… 說遠了，有關「如何扮演綠茶婊捕獲好男人」這課題，我地出年愚人節再講呀下）總的來說，當你著返件衫後，你會發現會hi你的男人少了，但質素會提升的。
然後就是「自我介紹」，請唔好喺title大大隻字講明招男友，你當自己係咩？咁猴急不如索性寫「禮金十萬」啦好冇？呢啲嘢一講出面就cheap架啦，就算你幾恨有男人都好，你同我吞返呢句落肚。十個男人，十一個都唔想負責任，荀盤做慣自由人兼鑽石黃老五，招呼都未打你已經話想搵男友，係人都俾你嚇走啦。自我介紹簡單一點，幾句勾勒自己工作的行業、興趣，真誠唔好講大話，相信我，大把荀盤鍾意「遊龍戲鳳」、「與龍共舞」的戲碼，如果你誠實大方地介紹自己，已經贏在起跑線。但真誠不等同沉悶，不要把簡介弄得像見工的，加一點幽默感，輕快一點，起碼讓人大致了解到你的性格如何。好吧，你地應該會好奇我的簡介是怎樣吧？我把部份截給大家參考：Working in banking industry, I am looking for a nice chat during my coffee break. Decent and well-travelled guy here. Be brave, I don’t bite (generally).
什麼？想要完整版？！傻架你？到時人人都咁用，我食西北風呀？自己幸福要自己爭取，自己介紹要自己寫哦！
好，講完相同自介，就介紹荀盤的特性和出現形式。無錯，你以為緣份嘅野好難講嗎？錯了，其實荀盤係好易捉的，只要你懂他們的心態，基本上要在茫茫人海裡打撈荀盤，還真的非常簡單。
咦？！夠一千字啦？哎呀，真係唔好意思，今日夠鐘，作為一個好老師，準時落堂好重要，今次我地講到呢度，餘下的，我地下一堂再講，Stand up class, goodbye class!
#愚人節快樂
#人妻先生的惡作劇
#俾仔溝的必殺技
#意猶未盡
#在斷與不斷之間徘徊
#咪話我唔示範啦
