見倒好多人話無論係咪拜登當選，美國對華政策唔會有重大改變，所以我會由一單無乜人留意嘅新聞開始講起：
話說美國政府呢輪推動對台軍售又多又急，去到10月甚至試過一星期內通過兩次1400萬美元以上「主要國防裝備」（MDE），夾埋大選日前匆忙批准嘅MQ-9「海上衛士」無人機，本年度軍售名單已包含MK48魚雷（Mod 6 AT）、增程距外陸攻飛彈（SLAM-ER）、遠程精準火力打擊系統（HIMARS）、F-16新式偵照莢艙（MS110）同魚叉海岸防禦系統（HCDS）。
呢批美國建議台灣購買嘅武器實在太多，以至台灣國防預算出現排擠情況，部份原訂軍購項目如MH-60R反潛直升機需要暫緩，甚至陸基魚叉可能只夠錢先買發射車，飛彈留番遲D再買嘅詭異情況出現。
響呢度我會問兩個香港一眾照讀國際新聞嘅「黃標KOL」都唔會問嘅問題：
1. 點解軍售案要咁急響大選日之前通過？
2. 對台軍售要經國會批准，點解作為在野嘅民主黨成員都一樣全力配合急速通過議案，連些少質疑都無？
一般人諗倒嘅表面答案當然係「民主共和兩黨對中共同仇敵愾」、「對台軍售分歧細，無必要響國會阻攔」，然而咁都解釋唔倒點解愈近大選，推得愈急。
企響共和黨角度，可能都仲有少少「打中國牌」推動選情嘅考慮，但民主黨呢？駛唔駛夾硬推動一個連台灣國防預算都食唔哂嘅武器清單？──唯一一個解釋就係，民主黨（甚至共和黨）一眾政客已有共識，就係佢地預期萬一拜登當選，對中共政策將會急速轉彎，所以對台軍售呢啲咁敏感嘅議案，最好都係響特朗普落任前過哂佢，避免萬一拜登上任後，就以「停止對台軍售」作為中美關係正常化嘅示好。
再講一次，唔好同我講乜嘢拜登上台後對華政策唔會大變：我係由克林頓參選總統開始留意美國政治，由克林頓去到小布殊再去到奧巴馬，每一個響宣傳自己政綱時都必然提到會對中國強硬，但結果一上到台之後呢，立場卻係軟過軟腳蟹──小布殊我都仲可以原諒佢因為911要將注意力集中響中東而被迫響反恐上面同中共合作，但克林頓邀請中國加入世貿；奧巴馬響任內強調協助中共經濟發展幫助中國民主發展嘅「接觸策略」，根本反映咗民主黨將中美合作帶黎嘅經濟利益，放於美國國家利益、同埋世界民主人權利益之上。
當然，以美國政客嘅高超手腕，當然唔會響拜登當選第一日就立刻跪低咁樣衰，尤其係提供香港難民身份、協助在囚香港著名人物「保外就醫」，制裁特定中共地方官員、響聯合國增加提及中國人權問題議案並作出嚴厲譴責呢啲，更加係會做足──問題卻在於真正對中國有傷害嘅關稅制裁，卻係必然係會逐步鬆綁，以回報全力支持拜登嘅華爾街大鱷。
同時「北韓、俄國優先」、顧及歐盟於中國利益、重新建構環保同國際協作架構等等嘅民主黨固有外交戰略目標，無一樣唔係需要中共嘅配合或者協助──記唔記得當日習近平響G20峰會點樣羞辱奧巴馬？特登響落機位唔舖紅地毯、中共官員話「呢度係我地機場，唔比得你地隨便影相」，之後就比習近平睇穿咗奧巴馬政策將會比中國食住；
2018年特朗普訪華時，中共曾經同樣試探特朗普，派解放軍搶奪時任幕僚長凱利嘅核武認證系統「核子足球」，結果立刻被凱利同美國特工制服，自此之後習近平立即收皮，唔敢亂作挑釁；
但你估拜登上場之後面對習近平嘅文攻武嚇，會係堅持國家尊嚴嘅特朗普，定係為其利益不惜縮骨嘅奧巴馬？
