「歧視」
最近，喺美國發生多宗針對亞裔/華人嘅襲擊事件，令人震驚，同時捲起世界各地Anti Asian Hate嘅活動。喺荷蘭阿姆斯特丹，剛剛嘅週末亦都有一大班華裔喺 Museumplein 進行和平示威 (真係好和平，大家仲好乖緊隔開晒，每個人中間真係有1.5米距離）。
其實好耐之前，都不時會有讀者問，住喺荷蘭嘅華人會唔會遭受歧視？
之前提過，荷蘭呢個國家，特別係一啲大城市（如阿姆斯特丹），本身係住咗好多來自世界各地嘅人，所以有非常多元嘅文化背景。只不過，多元還多元，如果同你講完全冇任何歧視成份，就真係擘大眼講大話。
最近因為接受過幾個學術訪問，亦都好認真地思考過呢一個問題。
亞裔/華人喺西方國家遭受歧視唔係一朝一夕嘅事。但本身「歧視」呢個字亦都有好多重意義。我覺得如果因為我嘅膚色或者文化背景，而失去工作上嘅機會/受到不公平對待/被人出言侮辱等等，呢一種係活生生嘅種族歧視。
但係亦都有好多情況，係一啲西方國家對亞洲根深蒂固嘅偏見，未必好明顯，不過有時待人接物當中可以顯露出來。
俾個例子，「亞洲人數學好叻」到底係一個好嘅偏見定係一個壞嘅偏見呢？真係好難講。如果有雇主因為見到你喺亞洲人，覺得你數學應該會好過其他人而請咗你，係好事定壞事呢？
亦都見過一啲情況，對方唔係有心要講一啲歧視嘅言語，只不過係有時候唔係好識得表達，造成左一個「對文化唔敏感」(culturally insensitive)嘅假象。其實只要你肯去解釋，對方都好樂意去多了解同多學習。
簡單來講，有時候條線真係好難畫。
個人而言，我覺得最困難嘅，係有時候你唔知對方嘅行為係因為你屬於黃皮膚，定係因為其他原因（例如你係女性）。喺工作上，我試過俾一啲年紀較大嘅「白男下屬」表露明顯嘅唔尊重；但到底係因為我係華人，定係因為我係一個年輕女性，呢個真係不得而知。
亞洲女性喺國外，相比男性生活更加困難；因為西方國家對呢一個群體實在有太多偏見，甚至係「不必要嘅幻想」。呢一方面，我就唔詳細多講；有興趣嘅朋友不妨自己做吓資料蒐集。
講返荷蘭，其實肺炎一役亦都將有啲「知識分子」隱藏已久對亞洲嘅不屑一次過浮現晒出嚟。有個別荷蘭人，平日就如何喜歡亞洲文化，又或者想去亞洲旅行，肺炎一出現就即刻對亞洲破口大罵。亦有荷蘭人會對華裔講一啲racial slur。不過呢一類人為數不多，大部份人其實都非常之包容，而且好努力去嘗試同唔同文化嘅人有深入嘅交流。而且，喺荷蘭住咗咁耐，真係冇咩點聽過有華人因為種族問題俾人襲擊（如果有人聽過相關消息不妨話我知），反而喺英法德等地就時有聽聞。喺荷蘭生活，即使係來自亞洲，目前來講都非常安全。
牽涉到種族嘅問題，有時真係非常之複雜。之但係，不時會見到有人話「最衰都係因為肺炎」。如果單純地覺得，所有針對亞裔/華人嘅歧視或憎恨問題純粹源於肺炎，呢個諗法就實在太天真。肺炎極其量只能夠係一種催化劑(catalyst)，加上個別西方政客或主流媒體不斷地加鹽加醋，將歧視問題急速惡化。但長時間喺外國嘅人就會知道，歧視真係唔係一日半日嘅事，亦唔係一個肺炎就可以造成咁大嘅問題。
其實作為海外華人，可以做嘅就係做好自己，同埋如果身邊有人對於自己嘅文化背景感到好奇嘅時候，不妨慢慢解釋比對方聽。但如果租受到不公平對待嘅時候，唔好啞忍，要開聲指證。好多嘢唔能夠一時三刻可以改變，但只要大家都願意踏出一步，慢慢地大家就可以見到更好嘅一面。
#歐洲 #移民 #海外生活 #荷蘭 #香港人在荷蘭 #香港女孩
