冰封三尺非一日之寒
院爆Double非一日之癲
近排流感高峰期，公立醫院日日都爆到七彩，新聞媒體都鋪天蓋地甘報導醫療體系內內外外既事。本來見都多人可憐同情下我地呢D做到嘔電既公立醫院醫護人員，點知近排發生左單野，真係激到一肚火。
話說我地有個係專科門診覆緊診既病人，因為病情相對簡單，我地轉介左佢返普通科門診覆診。結果，普通科唔肯睇佢，而原因竟然係因為佢地唔肯係普通科門診開超過16週既藥，佢地認為16週都無覆診而繼續俾病人食藥，係超級極度危險既事，佢地係唔容許既。
係呢個moment，要爆啦之前，等我解釋下狀況。平時係我地內科專科門診覆診既病人，通常都係有D複雜既病情需要專科醫生既診治，例如食緊D專科藥，或者病情仲係診斷階段，未有明確病因。如果病人情況非常穩定，例如只係普通高血壓糖尿病，食緊D簡單藥物，控制理想既話，我地通常都會轉介佢返普通科門診，一來可以紓緩專科門診無限期等待既問題，二來普通科門診一區有幾間，病人覆診都就腳D。
好啦，係呢個moment，真係要爆啦。喂！大佬！咩叫16個禮拜食住藥無睇過醫生就叫危險？你知唔知我地內科門診routine期(姐係順序排，唔插隊)book到32個禮拜？大把病人食緊十隻藥都係焗住要超過半年先有得見醫生，如果16週覆診先叫安全，甘地球真係太危險，你地全部返火星啦。
作為醫者，如果每個病人都可以16個禮拜內返黎見一次醫生，對我地黎講係更加理想同安心。甘典解我地唔甘做？咪就係因為個門診爆到九彩囉！醫管局既內部資料顯示，專科門診平均一個舊症要睇12分鐘，一個新症要睇24分鐘，但平時我地既內科門診，一個4個鐘既門診時段，平均一個醫生就要睇到30，32，甚至34個病人！換句話講，即係撇除醫生要柯尿，飲水，同抖氣既時間，每個病人只有7分半鐘！即使係甘，我地既病人都係要等32週先可以再見醫生！姐係話，即使係每個門診D醫生都係做緊double，但我地都係要double病人應有既waiting time！
甘究竟典解公立醫院爆得甘勁？醫管局前主席胡定旭話，記得當日數據，150個單程證非大問題，用公立醫院既人數唔多。喂！大佬！你有冇落過黎睇過先！成個門診大把身份證R字頭M字頭，連廣東話都未講得正，甚至一開波問你點解唔講普通話既新移民黎睇啦！仲要未計果D係邊境過關就即刻call白車入院，你估下有咩人？插住喉既，有！等洗腎既，有！仲有埋做完手術有併發症，傷口都未閂既添！唔通你以為真係flu搞到醫院full晒？少年你太年輕啦！
好，你死都話日日150個單程證唔關事呀嘛，就同你計第二樣。過去十幾年間，香港公立醫院既床位數量，增加左幾乎係單位數既百分比，而公立醫院既醫生數量雖然增加左超過五成，但大部分都唔係前線醫生；而係同一時間入面，出現人口老化，病症變得越黎越複雜，而且醫療科技越黎越先進，同樣既病係十幾年前可能得一個醫法，但到依家可能有幾種治療，連檢查方法都多左好多。醫管局就從來無address過呢個問題，只係係過去十幾年間，將醫管局總部既人手增加左差唔多一倍甘多！睇住D病人等死先等到睇醫生，又睇住D醫生做死都搞唔掂，究竟係醫管局癲左呀？政府癲左呀？定係成個社會都癲左？
時至今日，當公院醫生仲係人類，而唔係微生物甘識binary fission，公立醫院都只會繼續爆煲，害了病人，苦了醫生。公營醫療體制，需要既唔係得閒又擺幾億落去，爆起煲上黎又買返幾個蓋，而係結構性甘重整成個架構，挽留人才。正如威院吳家晴醫生係電視訪問話齋，香港唔係唔夠醫生，而係唔夠公立醫院醫生。公立醫院唔係麥當勞，唔會double左好味D嫁！
內科專科門診 在 內科專科- Explore 的推薦與評價
即日起，配合政府防疫政策，來院門診全程戴口罩，並協助量體溫及完成實聯制。… See more. No photo description available. ... <看更多>