我今日去咗譚仔見工。
話說呢排搵工搵到有少少心灰意冷，有晚肚餓想食譚仔，諗諗下不如in譚仔啦，話哂我都想進軍飲食業。就係咁復活節前夕嘅晚上，一路諗住碗墨演懶肉山小辣，一路打咗呢封求職信。
收到電話約見工果刻真係好興奮，前一晚做定功課，背哂餐牌、睇譚仔歷史背景、睇哂近一個月譚仔Facebook嘅post同comment、甚至練定幾句譚仔話。
我坐喺會客室等見分區經理，佢哋係兩個帶少少口音，成熟老練嘅譚仔姐姐，結果佢哋無問過我關於譚仔嘅嘢，即使我分享過往做飲食業嘅經驗，似乎佢哋都唔太在意。約十分鐘面談主要講人工、福利、返邊間分店等等。
佢哋話全線員工都係時薪制，兩個月試用期後每個鐘加$1，返十一個鐘，四日例假，有勤工獎、營業獎金等，每日包兩餐，由廚房姐姐買餸煮家常小菜，返工第一餐食20分鐘，傍晚食第二餐25分鐘。
失業半個月我send咗七十幾份工，見過兩三份，有份見Customer Relationship Executive，去到先知係保險Sales；另一份見教育中心Customer Service Officer，四日例假，老細話呢個位預咗收工放假要繼續覆客，最後佢嫌我要求人工高唔請。
漸漸地我明白到呢條線唔可以放太高，要求人工由20k降到18k再降到16k，一樣係零回音，學歷高工作經驗多一樣會失業，呢個時勢即使得11k相信都大罷人爭住做。搵工煩，見工仲煩，譚仔比上份工賺少一萬，但今時今日有份工包兩餐已經好好，亦相信呢度會係一個好好嘅學習機會。
唔知到最後會唔會連譚仔都嫌棄我，但至少努力過，肯試肯做一定有出路。希望有日譚仔見！
風雨不會沒了期 終會等到夢寐
全城在變遷 不減你是你
#香港人加油
