【喺女友屋企一瞓醒就變成咁⋯】(1)
鬧鐘如常喺7:00響起，我都如常咁朦朦朧朧唔想起身，想打返公司請病假算數，但一諗起又要嘥二百幾蚊睇醫生拎假紙，就死死氣起身算數，反正我女朋友都要起身返工，都係嘈住晒瞓唔返。
「Nothing gonna change my love for you⋯⋯」呢首歌係我Set嘅鬧鐘，愈響愈大聲。
女朋友間公司比較近屋企，所以佢通常會比我遲半個鐘起身，我要盡快撳熄個鬧鐘，萬一嘈醒佢又會發脾氣鬧我。
我張隻手伸出被竇，唔使望都知個電話就喺床頭附近，日日都係咁，拎起，打橫掃一下，即刻靜晒，有時會再瞓返。
我以為係咁。
但我搵極都搵唔到個電話，隻手伸極都仲喺張被入面，出盡力都好似郁唔到咁⋯⋯好熱，明明開咗冷氣，我都覺得好熱，好似比平時冚多咗好多張被咁⋯⋯You ought to know by now how much I love you⋯⋯The world may change my whole life through⋯⋯But nothing's gonna change my love for you⋯⋯
隻歌都就嚟唱晒，我都係郁都郁唔到，我懷疑係咪「畀鬼壓」。
我之前都試過，成個人有意識好清醒，但係就起唔到身，想嗌救命都嗌唔出，好無助，好驚咁，直至冷靜落嚟，心裡面叫自己起身，快啲起身⋯⋯就會突然好似發咗場夢咁醒咗，郁得返。
於是，我照咁樣做，深呼吸，3，2，1⋯⋯起身！3，2，1⋯⋯起身！結果都係失敗。
但我覺得啲手手腳腳慢慢有返知覺，好似平時腳痺完冇事咁。
再嚟多一次，3，2，1⋯⋯成功喇！我郁得返！但嘭一聲，我成個人連埋張被碌咗落床，個頭仲撞到個櫃，好痛⋯⋯不過，快啲撳熄個鬧鐘先。
當我想抬起頭嘅時候，我發現房入面每件物品、傢俬嘢都變到好巨型，係我體積幾十倍以上。我完全望唔到床上面嘅女朋友，我嘅水平線只係望到床頭櫃最低個格。
我再向下望一望自己嘅⋯⋯手？定係腳？我隱約只係見到啲白色嘅毛，同埋幾隻爪⋯⋯到底發生咩事⋯⋯我全身喺度震，地下唔見我張被，但我仍然覺得好熱⋯⋯
我知喇！只要撞埋去個櫃到就會痛醒，就會乜事都冇回復正常，換衫去樓下坐巴士返工。
但我冇醒到，撞咗幾次，只係覺得好痛，一切都冇改變。
我好想知道發生咩事。
我嘗試大嗌女朋友個名：「嘉敏！嘉敏！」但一粒聲都發唔出。
如骨在喉，唔單止講唔出一隻字，連微弱嘅叫聲都發唔到。
無助之際，我閃過一個念頭，去廁所照鏡！我想知，我只係縮細咗，定係變咗另一種生物。
但我有600度近視，冇咗副眼鏡，所以睇嘢好朦，加上仲未熟悉呢副「新身體」，我只能夠好慢咁移動，甚至可以講成「爬」⋯⋯
間屋其實唔大，只係有百幾二百幾呎，所以我沿住房門爬出去，經過張梳化，飯枱，就已經去到廁所門口。
不過去到門口，感覺上我就好似一隻蟻咁，我諗起電影《蟻俠》嘅男主角，第一次變身縮到好細，手足無措⋯⋯同我依家面對嘅一模一樣。
呢刻你問我係咪好驚，我話畀你知全身都仍然震緊，心跳得好快，如果我仲有心嘅話⋯⋯
但我唔理咁多，只係想快啲照到掛喺牆上嗰塊鏡。
不過依家呢個連馬筒邊都望唔到嘅身體，要照到鏡，只有一個方法。
就係跳。
先跳上去馬桶，再跳上洗手盆。
我用盡全身嘅力嘗試企喺身，但仍然適應唔到，手軟腳軟，好似啱啱學行嘅BB仔咁，行幾步又跌低，行幾步又跌⋯⋯
仆咗大約50次後，我終於可以企喺度，兩隻手，捉住廁所邊，兩隻腳再借力一彈，成個人企咗上馬桶。
呢一刻，我竟然有莫名奇妙嘅成功感。
企穩後，我要再發力跳去洗手盆，如果失敗咗，我就會跌落地，以咁嘅高度，我可能會暈低。
對於平時畏高嘅我，真係有少少淆，不過為咗真相，畀啲勇氣自己啦！啊傑！
係，我個名好平凡，既然講開就自我介紹一下，我叫李俊傑，25歲，同女朋友嘉敏一齊咗兩年，一個禮拜都會去佢屋過夜，唔⋯過夜會做啲乜應該唔使多解釋啦。
返返嚟現場。
就算我跳唔到去洗手盆，我都要跳到去一個高度，足以望到塊鏡，就算係一秒都好，起碼知道自己變咗做啲咩，或者仍然係嗰個毒毒哋，一瞓醒成個頭會豎起晒嘅四眼仔。
我將隻腳曲到最低，希望以最大嘅爆發力彈過去。
好緊張，好似參加緊中學跳遠比賽咁，我已經犯咗兩次犯規，得返最後呢次機會。
死就死啦！
果然！
我跳唔中，仲整跌晒啲牙刷同杯⋯⋯但就係電光火石嘅一秒，我望到鏡入面嘅自己⋯⋯我竟然變咗做⋯⋯
「喂！做乜你咁曳走咗嚟廁所，仲整跌晒啲嘢！」未望到個樣，但係係嘉敏嘅聲線，佢應該畀我呢下失敗嘅起跳嘈醒咗。
「你仲搞到成身濕晒！你係唔係跌咗落廁所！曳呀你！Dolly！」
Dolly！？邊個Dolly？唔通呢度仲有其他人？冇呀！
我唔係Dolly呀！我係你男朋友啊傑呀！我好想解釋，但我只係發出到一啲嗚嗚聲⋯⋯
「次次鬧你，就扮慘，唔好以為你得意我就心軟呀！」
嘉敏鳥低身抱起咗我，我終於可以好清楚咁望到鏡入面嘅自己，頭先我真係冇睇錯，頭上面兩隻耳仔，淺啡色嘅毛⋯一個好大嘅黑色鼻，手手腳腳都好短，我⋯⋯變咗做一隻狗⋯⋯一隻哥基狗⋯⋯
明明噚晚我放工仲同嘉敏食飯，返到屋企就親熱，睇咗陣電視就瞓覺，完全好正常，點解今日起身就變咗做一隻哥基？我哋冇養任何寵物，連一隻叫Dolly嘅毛公仔都冇。
點解變成咁，我幾時叫Dolly？心情未平伏嘅我暫時未搵到原因，但我發現跟住落嚟發生嘅事，對變咗做哥基嘅我，可能真係⋯做隻寵物至少可愛迷人⋯⋯
（待續）
------------------------------------------------
好耐冇寫過故仔，突然想寫一個比較另類嘅愛情故事，有冇幻想過男朋友會變咗隻狗？依家就變畀你睇。呢個係愛情故事嚟，會感動到你喊！追落去就知。如果有興趣追嘅，唔多講喇，放低個Share，留個言畀啲動力嚟支持先啦！不過冇人睇，冇人Like，我都會預備嘔心瀝血，不眠不休，謝謝！
FB: 莎比亞
*** 八卦先好ADD嘅私人FB AC: sapeiar ***
Follow IG睇獨家sweet相: sapeiar
著作：《原來比單戀更寂寞》、《鬼叫我唔識拍拖》
網上試閱：http://on.fb.me/1PKxJnS
