很多人說法國的高中哲學考試怎樣啟迪人心、甚麼香港、台灣的教育制度理應全加進哲學課甚麼的，本著毛澤東講過「沒有調查就沒有發言權」，所以在發表任何意見前，決定先買本教科書的中譯本來看看究竟葫蘆賣些甚麼藥。
呢本《政府是人民的主人還是僕人？探討政治的哲學之路》，其實只係哲學教科書五本之中嘅一本，成套夾夾埋埋有成600幾頁，其實都幾得人驚。由頭到尾睇完第一冊（即五份一內容）個感想就係，雖然教科書入面都係一啲法學、社會學、政治學、哲學同經濟學基本概念，但由於當中涉及好多唔同學者、思想家嘅理念比較同埋原典閱讀，所以先唔好講學生，就算係老師都一定要接受一段唔少嘅培訓時間先可以Handle倒。
呢度拉開少少講，見倒有好多人讚法國高中哲學科嘅其中一個原因係「有得讀原典」，但讀原典對高中生黎講又係咪真係咁重要呢？響我角度黎講，除非你做學術嘢，否則作為入門黎講睇一般二手史料同評論經已好足夠；當你對某一樣嘢愈來愈有興趣，希望直接去了解原作者嘅諗法或者更完整嘅相關內容嘅時候，自然就會有睇原典嘅慾望。掉番轉夾硬去睇一段無頭無尾、而且內容艱澀嘅段落，除咗日後同人Show OFF以外其實無乜作用。以我為例，雖然聽倒好多人話自己中學已讀完錢穆嘅《國史大綱》，但其實中學我係完全睇唔明本書，直到大學開始觸及一啲相關評論文章，對佢重新產生興趣後再睇一次，先總算明白佢嘅吸引之處。
透過呢本書我亦可以睇倒佢唔係介紹基本概念咁簡單，而似乎真係將好多課程設計者（亦即係法國教育部）嘅概念融入響課程之中：例如好強調公民同社會之間嘅契約、相比起商業交易帶黎嘅利潤，公平更加重要、透過公民辯論限制國家權力、正義唔等於合法等等；但如此同時，你又會發覺佢地對於不同立場嘅講法，例如無政府主義、愛國是否必要、國家權力如何受到限制、法律如何容忍合理的不平等，都有充份嘅介紹，亦唔會用任何道德框架去限制討論嘅可能性：因為佢地對自己信奉嘅理念同價值觀有絕對信心，所以亦唔怕學生會被「教壞」。其實相比起原典同教授，教科書更強調嘅係師生之間一定要持續不斷咁進行討論，從中搵倒彼此嘅共識。
所以如果你問我香港要搞類似嘅哲學課程，一要有頭腦精晰、有充份訓練嘅老師、二要有完整理念嘅課程設計、三要有容許各種思想相互討論、交流以至衝擊嘅空間。但好可惜嘅係，比起法國高中哲學課程低層次好多嘅通識，而家仍然係搵好多科目老師兼教，我甚至質疑佢地有乜資格去評審一啲對於某題目比佢地認識更多嘅學生，更唔好講要將課程難度提升去法律、哲學、社會學、政治學呢啲層面；至於課程設計理念，從來係香港教育界嘅弱項，呢個亦係點解課程教革咁多年，好多科目例如中史會愈搞愈禍嘅原因。至於第三點，比中學生一個相對中立嘅空間探討學術？我諗大家都知咩事。
