第五本書籌備中。
第五本書書名叫《傭仔膠流日記》最終章，係上兩本膠流日記嘅第三集，亦都係最後一集。
嚟到第五本書，過去短短呢一年，整個香港同我都經歷咗好大嘅轉變，我由全職空少，變咗做一個全職網絡創作人。其實好多作者朋友，都未必會考慮今年出書。雖然而家書展話就話如期舉行，但一個唔覺意疫症再爆發（雖然機會好微），你本書就玩完。就算搞得成，到底有冇人會夠膽嚟迫書展呢？又係另一問題。今年出書，有冇人買㗎？
好多人都知，喺香港靠賣書為生，係一件好難嘅事，書局執得就執。咩嘢都可以做，但出書可能係花費最多時間預備，但金錢回報係最少嘅。加上而家我冇咗空少份糧，應該做更多「有錢途」嘅嘢。有人叫我不如skip一年，唔好出，等下年個市好啲先啦！
堅持今年繼續出書嘅原因係，第一我想維記呢段膠流嘅日子有個完滿嘅結束，無理由上一本《膠流日記2》講到一半就唔講埋落去。而呢本書，亦都係我最後一次以空少身份出嘅航空主題繪本了。同埋另外，我想藉著呢本書提醒自己，雖然我而家好渴望好多人搵我有商業合作，好渴望我可以靠做KOL謀到生，但我唔想自己忘記嘅係，我做嘅所有嘢初心，都係源於鍾意創意呢個passion。而書，就係證明我有堅持去創作嘅證明。
呢本書講唔到咩大道理，會round up返過去三年喺維記澳洲航空嘅經歷，講返香港線臨執嗰陣究竟發生咗咩事，同埋回顧返頭二年喺茄子航空未被收錄過嘅經典故事。
呢本書應該會喺今個月接受網上預購，由於書展好似危危乎，而家都要視乎情況會唔會出席簽書會，所以應該會將多啲數量擺上網上預購。
希望大家可以多多支持☺️☺️☺️
#冇咩事我返返去閉關先
