玩咩Game學打字就知係咪自己友
利申：跑Online 😂
《如果唔係Online Game，我一定唔識打字》
某一日，阿強無拿拿問我：「你覺得你今日得到嘅嘢，全靠做咗邊件事？」
我一聽，心諗佢個問題咁「畢加索」嘅，即係咁抽象嘅。
首先，我好似冇得到啲咩...除咗大學時期學費造成嘅欠債之外...
不過佢既然問到，我就盡力諗下...
人生到當下嘅「得到」，似乎都係可以「打下字寫下嘢」...
咁打字就要用速成...
而我係點學速成呢？
靈光一閃，我就答佢：
「全靠我中學玩Online Game。」
答案出乎意料之外，令佢半柱香時間都一言未發。
但我嘅年代，到小學末期認識到電腦世界有「輸入法」，
當時冇特別學，因為預計唔到廿年後嘅今日，竟然係「不能唔識輸入法」。
人生轉捩點就係中二，因為打Online Game，
嗰種想同人溝通嘅慾望，喺我身上完全爆發。
於是，我行咗人生最重要嘅一步，撳咗「Ctrl+Shift」，將「EN」變成「速」。
一開始，只係簡單嘅單字-「好」、「去」、「不」，
進展到「明天見」、「一齊打」等等組合字句。
當時冇語音又冇Google Search，唔識打一隻字，就要查「倉頡字典」。
或者諗爆頭，諗一啲識打嘅同義詞、同靠提示字。
有時覆人一句，用咗半粒鐘。
初學打字嘅痛苦，因為遊戲嘅樂趣；人與人間溝通嘅互動，而減低咗9成。
一個暑假之後，發現自己已經接近「咩字都識打」，甚至記得鍵盤位置，唔使睇住Keyboard「慢慢篤」。
由於「記Keyboard位」早有大成，往後日子打中英文都快，慳返好多時間。
喺公司Interview，都無懼任何嘅「打字測試」。
由於經常諗同義詞，作文變化都較大，寫文章都多啲選擇。
而家回望，最慶幸係用「打機」練成咗「打字」。
如果唔係，就咁逼自己硬學，可能到中五都仲係「流流哋」，而且過程痛苦萬分。
感覺就係一項投資，最後賺咗大錢。
當時畀老師同父母「日哦夜哦」，
曾經都驚「打Online Game」係超級浪費時間。
但過咗咁多年就發現一個小道理：
全心全意做一件事，必有體會；
件事唔係流水作業，必有回響。
簡單如打機，嗰種「體會」，
可以係「打字」、可能係「人際關係」、甚至係「組織管理能力」，
無論咩事都一樣，
全情投入，瞓身落去，自有所得。
並唔係讀死書先有用。
至少打機畀到我嘅，遠超自己所能想像。
Ig:cheungson88
*會慢慢Up嘢上去
PS. 呢排寫咗叫《不存在的職業》嘅小系列故事，冇嘢做時可以望下：https://goo.gl/xh4bbt
