工作不能忽略Time Value
財務分析常常講 Present Value，因為任何資產或負債，其價值都會隨時間變化，兩項時點不同的資產無法直接比較，要先把它們轉換成今天的價值（現值）才能比較。例如我今天有一萬元，做定期一年後有10,200元，我有無賺？答案係無：因為這10,200元是「一年後的錢」，當轉換成現值時，連一萬元都無，我作為零售客戶又要低風險，係會蝕少少。
Present Value 以利率為基礎，較難廣泛應用。因此，請容我不太嚴謹，改用 Time Value 來演繹，把上述例子的200元利息視為這一年的 Time Value。
Time Value 這概念連小學生都明白，因爲他們懂 time’s up, pens down。一場考試12點夠鐘，你放低筆，份卷可能值80分，但如果你太博，過了鐘30秒都唔肯放低筆，因而被取消資格，份卷就係零分。這30秒的 time value 負值極高，所以正常人唔會博！
但很奇怪，學生時懂的事，入職場後卻忽略了！老闆出外開會，會前30分鐘急 call office，要攞幾粒數開會用。同事唔記得老闆都係人，要時間消化啲數，又要諗下點講，又可能有其他問題，仲未計開會前交換名片和吹水時間。同事真係當正考試咁，以為有30分鐘時間，慢慢整靚個表、揀啱 font size (老闆通常老花）、覆核幾次數，好盡責咁搞足30分鐘先交貨，其實已經 pens down 咗好耐，只是老闆心裏爆粗無話你知！
有些人醒過龍，老闆叫當天交貨，佢 check 到老闆第二日下午開會用，但唔記得老闆都要時間過目、跟進、整理、修改，於是又好盡責咁做份文件，搞到當晚凌晨或第二天一早才交貨。如果老闆唔炳，真係見過夠膽死第二天中午才交！老闆被吹漲之餘，唯有以後把 deadline 定得再早些，做成惡性循環。
必需強調，多年來我見過好多以上的例子，但九成以上，同事都絕非懶惰或能力不足。他們錯在忽略 time value，錯在愛完美，覺得仲有時間就盡量把工作再做好啲，結果浪費寶貴光陰，把已經是80分的工作做到90分。他們當中，有些人真的沒有注意 time value 的重要性，誤以為老闆只看工作的質量，根本不知道已經 pens down。都過晒廟，老闆嬲咗你，仲邊有興趣睇你份90分的工作？有些人明白 time value 的重要性，但被心魔所惑，不到最後關頭都不願交功課（姑且稱它為考試病，打死都唔肯提早交卷），但職場跟試場不同，無人會通知你 time’s up, pens down。
我建議三項原則：
老闆畀幾多時間你做嘢，就預咗你交乜嘢質量嘅貨畀佢，輸時間肯定大鑊過輸質量；
斷捨離：好多人都喜歡把自己找到的資料全數寫進報告，時間花光了，老闆要的資料卻被其他資料埋葬了。要記住資料如衣服，唔啱身的話，無着過都要丟掉。
目的、時限不能變，只能在其他地方遷就。我有兩個常用方法：大膽假設（假設了就不需要花時間找答案）；改目標唔改目的 （好多時目的只是要射中把，但老闆唔覺意定下目標要射中紅心，我射中把就照交貨，通常都OK）
最後分享一個實例，二十年前參加培訓活動有個遊戲，給每組一把尺，一卷膠紙，和我已忘記的其他材料。目的是要在三分鐘時內，利用這些材料保護一隻蛋，讓它從高處跌落地都不會爛。我認為有時間想到一個優美方法都無時間落實，所以我唔諗，馬上用把尺墊住隻蛋，然後用晒成卷膠紙包咗隻蛋幾十層，好肉酸、但成功！其他組別苦思如何用盡所有提供的材料靚靚地保護隻蛋，三分鐘後，佢哋諗嘢個樣好有型、但失敗！
(按：這是我在蘋果日報登的最後一篇貼文。）
鄭發
歡迎轉載，請註明出處 #貼地風管
利率交換實例 在 利率交換 - 兆豐銀行 的相關結果
利率交換 （Interest Rate Swap或IRS）為交換利息流量的一種遠期契約，交易雙方以不同的利率指標（含浮動、固定利率）作為交換標的，定期交換利息，利息收付頻率依雙方 ... ... <看更多>