【如果有得打三國無雙，蘇東坡一定會用周瑜：陪你讀《念奴嬌·赤壁懷古》】
#詞三首
#晚安宋詞
#DSE雞精
#DSE範文
繼上篇講完辛棄疾嘅《青玉案•元夕》之後，今日繼續同大家討論下《詞三首》其中之二，蘇軾嘅《念奴嬌•赤壁懷古》啦。
▍首詞主旨想講乜？
《念奴嬌•赤壁懷古》主要講述蘇軾遊覽赤壁古戰場期間，想像當年三國時代三大戰役之一，赤壁之戰嘅情景。前段主要描述長江一帶大江大浪、波濤洶湧嘅景色，後段則係重點描寫三國時代吳國都督周瑜年紀輕輕就建功立業，大破曹軍嘅成就。
赤壁之戰大概係史上最出名嘅一場以少勝多既戰役，佢亦奠定左三國時代，魏蜀吳鼎立嘅局勢。講起周瑜，好多人都會聯想起「既生瑜，何生亮」；而提起赤壁之戰，大家都會諗起諸葛亮嘅「火燒連環船」。有人可能會問，咁點解蘇軾去到赤壁，會諗起周瑜而非諸葛亮？
其實，從來主導赤壁之戰嘅人都係周瑜，靠佢全權指揮孫權、劉備聯軍，先可以大破曹操軍。諸葛亮係赤壁之戰中嘅參與程度其實好低，只不過係《三國演義》要抬舉諸葛亮，先至會刻意貶低周瑜——係《三國演義》出現之前，周瑜一向都係好多人眼中嘅蓋世英雄，連大文豪蘇軾都唔例外。
當然，唔通蘇軾寫《念奴嬌•赤壁懷古》，又只係想講遊山玩水嘅感覺，或者純粹表達對周瑜嘅羨慕之情？同好多文人嘅詩詞歌賦一樣，都係因為比人貶官所以先至咁有mood寫野——當時嘅蘇軾，因為文字獄而被貶官，雖然唔駛死已經偷笑，但佢就因而鬱鬱不得志。蘇軾老邁年高，一心想報國，但又唔被重用，相當 #可憐 ，於是先要寫出《念奴嬌•赤壁懷古》嚟感嘆自己懷才不遇嘅慘況。
當然，蘇軾其實都係一個 #BasedBoy ，《念奴嬌•赤壁懷古》雖然看似負面，但結論竟然係「人間如夢，一尊還酹江月」——姐係人生在世，就好似發左場夢咁，諗咁多做乜呢？不如同江水、月亮飲返杯酒算啦！人生苦短，及時行樂嘅道理，蘇軾算係明白了。
▍時代背景係乜？
無啦啦，蘇軾點解會去左赤壁咁遠？講到尾，《念奴嬌•赤壁懷古》咪又係想講自己比人貶官好慘。之所以被眨官，全因為宋神宗元豐年間發生嘅「烏臺詩案」。
蘇軾係朝廷工作期間，正值王安石變法，受宋神宗重用嘅宰相王安石推行左一系列改革，但因為蘇軾唔完全認同新法，所以比新黨官員彈劾，認為佢寫嘅詩句有譏諷新政策、朝廷，甚至皇帝嘅含意，結果就比人拉左去坐監。因為呢個文字獄，蘇軾罪大至死，但因為得到太皇太后（宋神宗阿媽）、王安石本人求情，而免於一死，但就要貶官到左黃州。
值得一提既係，宋代以前甚少「以言入罪」的文字獄，過去嘅文人都相當敢言，唐朝嘅文人甚至可以話係乜都講得。而烏臺詩案算係歷史上最早期嘅文字獄事件。當然，明清打後嘅文字獄就遍地開花，發生無數了。
▍蘇軾係邊個？
蘇軾嘅詩、詞、賦、書、畫都有莫大成就，可以話係文藝界通才，乜都識灑，其中同《念奴嬌·赤壁懷古》同期寫成的前後《赤壁賦》，更係佢既最大傑作。
蘇軾叫自己做蘇東坡，當然唔係因為佢鍾意食東坡肉，而係同比人貶官以及白居易有關。蘇軾相當喜歡白居易，而白居易經常提起東坡，例如佢既詩作《步東坡》寫到：「朝上東坡步，夕上東坡步。東坡何所愛，愛此新成樹。」令蘇軾對東坡呢個字情有獨鍾。
蘇軾貶官黃州期間極之失落，又好窮，當時佢嘅朋友比左一塊田佢耕，於是佢就叫左塊田做「東坡」，再順理成章地自稱為蘇東坡。某程度上，係蘇軾同偶像白居易嘅超時空交流。
▍重要句子（具背誦價值）：
咁短，成首背曬都輕鬆啦：
「大江東去，浪淘盡、千古風流人物。故壘西邊，人道是、三國周郎赤壁。亂石穿空，驚濤拍岸，捲起千堆雪。江山如畫，一時多少豪傑！
遙想公瑾當年，小喬初嫁了，雄姿英發。羽扇綸巾，談笑間、檣櫓灰飛煙滅。 故國神遊，多情應笑我，早生華髮。人間如夢，一尊還酹江月。」
▍小知識：
赤壁究竟實際係邊，一直都未有定論。蘇軾當年去果度係咪赤壁？無人知，可能得天知地知。蘇軾寫道：「人道是、三國周郎赤壁」，意思都只係「人地話，嗰度係當年三國時代周瑜打仗果個赤壁wor～」所以，可能蘇軾本身都知嗰度唔係真赤壁？Anywaysss，都唔緊要，因為蘇軾影響因子太大，佢當年去嘅赤壁今時今日已被視為黃州赤壁，甚至係「東坡赤壁」。反正文學都係唯心嘅世界，只要你信果度係赤壁，嗰度就係赤壁了。
============================
"Oh Readly?" - Flip a page everyday.
#一班鐘意睇書又想荼毒大家睇書嘅90後
#多多指教
============================
有文學野想分享？
歡迎各位Reader Inbox我地🐱
