[節目更新][#白手黨]
「不斷學習，不斷進步」嘅跨國禮品公司創辦人
八十後Danny Wong，王嘉希先生，IGP 創藝禮品創辦人（www.igpglobal.com），專營企業禮品，管理四百家供應商，迄今已衝出香港，立足東南亞，設有八個辦事處及兩間品質檢定中心。Danny中學成績麻麻，勉強考入去香港城巿大學。Danny自少就好想創業，當日就讀大學已經開鋪創業，到今日貴為跨國公司負責人，當中Danny又係點一步步得到今日成就呢？
大學初嚐創業
Danny當年大學一年級，見宿舍附近有間商場，事實上就無咩人流，但勝在租金原來只係一千蚊左右，就諗著租間鋪頭仔買賣精品，反正輸極都係有限數。Danny笑言，其實「Year 1 都無咩讀書」，所以就趁「天地堂」（筆者按：時間表朝早上一堂，傍晚先再上，當日就稱之為「天地堂」）走出去開鋪做生意試下。「當時只係知要交租，入貨，買少少傢俬，連宣傳都唔係太識」，Danny就係咁「求求奇奇」開創事業。如果有客蒞買光顧，就話去倉拎貨，其實就係去後面街入貨——後面街其實做批發，好多精品鋪都係由後面條街買貨，前面個商場賣，連入貨存倉既成本都慳埋。鋪頭營運兩年就結束，Danny覺得唔算好好賺，只算賺返自己付出嘅時間，所以畢業後就無再做。
畢業後返咗兩、三個星期全職，認識到一位識做設計嘅同事，就邀請佢過檔合資五萬租個寫字樓仔。Danny希望由批量精品，慢慢轉做市場較大嘅宣傳產品，例如筆、USB手指等。創業之初，工作好忙，Danny憶述同拍擋特登買張可收摺嘅尼龍床，由朝做到晚，年中無休。而Danny雖然無做舊鋪，但網店累積唔少客源同名聲，所以就嘗試問返曾經想大量訂購嘅顧客。此外，都有係公司附近嘅開源道擺易拉架嘗試吸納新客源。慢慢靠自己既辛努一步一步開始打穩事業基礎。
夙夜在公
創業路途艱辛當然不為外人道。人人見Danny 已經開設第二個辦事處時，都以為佢一帆風順。但因為貨由大陸來港，驗到有問題但就唔可以退貨，最後都要自己「硬食」一批有問題嘅貨，正因為咁試過損失慘重。最後，「焗住」要向深圳增設辦事處，先行核實質素再送到香港，此舉又大大加重成本，不過，正正因為依一步，鞏固好公司基礎。之後，Danny研究過，澳門雖然人少少，但競爭對手相對較少，「食到舊餅比較大」，又開多間辦事處。後來公司基礎日穩，需要針對多d市場，所以就喺臺灣、新加坡等地增設辦事處。Danny都有分享如何管理外地辦事處，其實安排當地人加入，洽談好佣金制度，就可以自行運作，跨國的企業管理果然也難不到Danny。
Danny 直言呢一行最難就係「質量管理」，例如一般普通顧客覺得訂一千枝筆好似好多，但廠就會話要做夠一萬枝先肯出貨。Danny 最終都會同廠傾掂數一千支都出貨，但質量都唔會好得去邊，所以Danny就悟出一個道理：如果想令間廠質素好，畀多d生意就得，所以Danny 最重視依然係搵客戶呢一關。此外，由於呢行利潤低，如果客人因為批貨質量問題而取消訂單，咁就可能要做返十單先填得返條數；Danny坦言以前「每日提心吊膽，都要打返公司問下有無問題」，因為如果個客退貨損失非常巨大。Danny話最難忘有次送貨畀卡拉OK公司「Neway」，點知要送上唐樓（無升降機），同拍擋一人一轉，真係做到辛水辛汗，搞到通宵；又有一次時值年宵，好多客落單，塞到二百幾呎既公司得返一條窄縫，連門外都要擺貨。拼搏多年，Danny已經由事必躬親，到今日現時只係需要製訂公司政策，做下訪問，處理電腦系統上嘅問題已經足夠。
回饋社會
Danny有句格言，「不斷學習，不斷進步」，學成一件事後最重要係持之以恆，先可以繼續進步。佢寄語年青人「唔好怕蝕底，試多啲」——雖然Danny笑言，其實老闆「講呢啲」好似無咩說服力，所以自己平時都唔會對同事講，但如果老闆想畀機會下屬，都想揀位表現理想嘅，唔係老闆都會卻步啦。此外，其實Danny都唔介意同事撞板，但千祈唔好重複同樣錯誤。另外，如果年輕人想創業，只要有強烈夢想就得，就算人脈、資金欠奉，都應該勇敢一試。
Danny現時亦係香港青年創業家協會副會長，該會成立迄今已七年，會員愈四千人，主要舉辦聚會、午餐會，藉此交通人脈，當然唔少得講座，講解創業實務。如果想成為普通會員並無特別條件，亦唔收費，但如果想去午餐會，就要有「BR」，即商業登記。同其他成功既年青「白手黨」一樣，Danny 亦有取諸社會用諸社會，定時都有捐贈物資予慈善機構，希望出分力回饋社會。
Danny 嘅創業故事可謂係典型「獅子山下」拚摶精神嘅縮影，希望Danny可以啟發更多年青人追夢同敢打拚嘅不朽精神。
pt 1 of 3 --- 大學初嚐創業
https://youtu.be/gjHXUUQaNjE
pt 2 of 3 --- 夙夜在公
https://youtu.be/yBzqMPKTWqI
pt 3 of 3 --- 回饋社會
https://youtu.be/LvGJY_cZz6k
