之前已唔止一次咁表達過，我對所謂「本土電影」近乎露骨嘅反感：本土個賣點從來應該只係拍出一啲外國電影睇唔倒嘅內容，而唔係作為「個個去哂睇西片」而賣小強嘅藉口：更加唔會因為一套電影嘅所謂本土元素重唔重，而影響一套戲好唔好睇。
點解我好不齒於《十年》一堆咁粗糙嘅作品竟然可以攞倒香港金像獎最佳電影、《逆流大叔》明明作為電影有大量缺憾竟然被人捧到上天，就係因為「本土」兩個字係完全扭曲咗作為電影嘅評鑑標準。所以當坊間有好多人都猛烈吹捧《幻愛》之時，本身我係非常抗拒入場的；奈何武肺之下幾乎無戲可揀，《天能》又要去到9月10日先有得睇，唯有冒險試下啦。
點知係出乎意料地好睇喎。下面感想有劇透，唔想知到結局唔好睇最後一段。
先從缺點開始講起。同《一念無明》一樣，《幻愛》都係以精神病作為成套戲嘅主題，所以令我難免會將兩者作比較。如果單純講製作水平，個人覺得《一念無明》始終高出一線：唔單止劏房佈局係好有心思，《一念無明》教會講余文樂前妻信教上身果幕亦係表達得非常自然。
相反《幻愛》類似一幕場景，最初講思覺失調病人圍埋分享，然後阿玲中途闖入一幕，就拍得好舞台劇Feel：正常你傾傾下計中途有個識得嘅人撞咗入黎，點會突然全場靜哂、個個定哂格咁望住條友架？點都係竊竊私語、各自有唔同反應架啦。另外曾志偉同余文樂呢對組合，演技亦明顯係比劉俊謙蔡思韵高出一班：劉俊謙似乎有啲覺得保持「發呆狀態」就等如演緊一個精神病人，結果覺得就係非常刻意，余文樂響正常同發病之間嘅演繹轉換上面，就明顯做倒收放自如。
不過《幻愛》嘅問題並無損佢嘅可觀性，因為個故仔實在寫得有趣，而且真正將果種本土味融入電影之中。我見倒羅永聰大讚電影入面拍得屯門好靚、好有本土氣息，其實我偏偏就係最怕呢啲嘢：而家就係人人覺得拎住個Cam拍下街景就叫本土，搞到呢兩個字勁廉價。真正嘅本土，應該係拍得出我地日常生活成日觸碰倒嘅嘢。
例如蔡思韵飾演嘅葉嵐，為咗利益不惜出賣色相換取各種好處，放出Signal收兵之餘，又會突然間反面不認人，呢種女仔你點都可能遇上幾個。入面有一幕講佢勾引教授換取RA工作，老實講作為一個教授收入唔低，直接拎筆錢包養佢又有幾難？但同教授維持良好關係可以帶來唔少好處（例如收風、建立人脈）、同埋可以說服自己其實都仲係靠自己勞力換取收入而唔係直接做雞，保持最低限度嘅尊嚴，呢種勢利現實嘅考慮，正正就係香港人嘅特徵。
頭先講到演技無特別批評蔡思韵，點解呢？佢做嘅「心理輔導員」的確係幾矯揉造作，呢個可能真係演技青澀嘅問題；但咁啱得咁橋嘅卻係，我平時因工作關係遇到唔少嘅「心理輔導員」、甚至同輔導相關嘅教授，有唔少都係呢副假樣，所以出奇地同現實吻合。不過要覺得佢同劉俊謙演技發揮最出色果幾幕，當然就係作為情侶交流果幾場戲，完全係表達倒情侶果種甜蜜感覺，後面先知原來佢地響現實真係情侶，咁就唔怪之得啦。
覺得《幻愛》好睇，係因為好多地方都講得好中。好多人成日以為大學學術界班人講幾句英文、開口埋口掛幾個學術名詞就好撚巴閉，其實呢班友同普通人一樣，都會唯利是圖、以權謀取各種好處、死跟規條而唔係真心為咗幫人。唯一超現實嘅地方，就係鮑起靜飾演大學教授實在太Over，其實作為一個輔導相關嘅教授係唔會好似成個鄧碧雲咁架，況且唔係睇化哂個世界，城府深藏喜怒不形於色，點可能響學術權鬥之中屹立不倒呀？潘燦良做果個人渣教授就比較貼近現實勒！
有人話《幻愛》劇情去得太快，兩人戀情唔夠說服力，但既然蔡思韵本身對於愛情感覺都係來得快去得快，所以突然同劉俊謙成為情侶亦唔出奇。不過另一個我唔鍾意嘅Setting就係講女主角蔡思為鍾意咗劉俊謙而變番純愛少女──雖然咁係最切合大眾口味嘅童話式設定，問題現實世界卻係江山易改本性難移，無乜可能因為一段感情就可以扭轉哂一個人根深蒂固幾十年嘅愛情觀……
但始終《幻愛》個主體係精神病嘅愛情，而呢一點係寫得最到肉嘅地方。好多人有個誤解係，同有情緒病／精神病嘅人相處、拍拖，最重要係付出無比耐性同愛，但現實卻係，無論係付出幾多都好，一樣可以等同於倒入大海，無影無蹤。個問題唔單止在愛情付出唔一定有所回報，更加係因為情緒病／精神病患者有時根本唔能夠用理性角度同你溝通，所以男女主角響圖書館嘅一幕寫得真係好：
女主角話：「你知道我係鍾意你，而你又係鍾意我架，係咪？」
然後只換黎男主角不可理喻一句：「你唔好呃自己啦，我地以後唔會再見」
愛情唔理性，但響精神病／情緒病嘅陰影之下更係極端唔理性。
最後我係非常意外，有觀眾竟然會走去問究竟個結局係真定假：我先唔好講個導演其實係想詮釋，但如果個結局係真，我會感到極端失望。因為成套電影係由女主角出於自私拯救男主角嘅病作開端，最後卻因為無私犧牲得唔倒回報而崩潰，結果連自己都成為患者之一──再無結局寫得比呢個Setting更完美了，唔撚通套套戲都要睇tvb式跳起Yeah你先接受得到咩。
基本上全片我會比7.5分，甚至比《一念無明》7分更高，原因有1分就係比咗個結局。
劉聰達前妻 在 黃雨欣嫁劉聰達嗆楊淑君「打輸我」--蘋果日報20150812 的推薦與評價
【陳幼英、體育中心╱台北報導】35歲黃雨欣從跆拳道選手轉為本土劇演員，今年5月22日與跆拳道漂亮寶貝楊淑君（現改名楊宜蓁）的舊愛 劉聰達 壁咚定情， ... ... <看更多>