《無異之地》惡夢島（序）
離開「極樂園」嘅嗰一晚。身心俱疲嘅我雖然一早就撻上床，但結果輾轉咗大半晚都係瞓唔著。
開著手機螢幕，原來時間已經係凌晨兩點半。本來想望下如初有冇留低新訊息，卻正好見到佢嘅狀態係「在線上」。
【仲未瞓？】─我
【啱啱趕完份JOB，而家準備去刷牙啦。】－如初
【我可唔可以打畀妳？】－我
照計呢個時間如初都肯定好攰，但呢刻我都係選擇順從自己內心嘅欲望──我好想聽到如初把聲。
望見訊息變成藍剔（已讀）後，我一直盯住螢幕諗住等佢嘅回覆，但結果如初佢居然直接打電話嚟。
「你係唔係瞓唔著？」如初第一句就問。
「嗯，明明已經攰到涼都唔記得沖，但就係點都瞓唔到……感覺，就好似合埋眼就一定會發惡夢咁。」我無奈咁一笑，「妳呢？係咪終於趕完Dexter介紹嗰份廣告？」
「係吖，真係冇諗過今次呢個客咁多要求……好彩最後佢都滿意。」
簡單解釋返，Dexter係如初中學時期嘅同班同學。大學畢業後就一直喺一間媒體公司做嘢。自從六月佢哋喺中學聚會相認返後，Dexter就一直介紹唔同嘅廣告同Freelance job俾如初。
「聰，其實呢……你會唔會介意我成日同Dexter聯絡？」
「吓？」我當然估唔到如初會突然咁問：「咁搵食啫，都冇辦法……」
「真係嘅？」睇嚟如初唔係好信。
「呃……呢層……老實講，如果唔係知道佢已經有未婚妻下年就準備結婚嘅話，我可能真係會有少少擔心……」所以只可以實話實說。
「嘻嘻，果然真係咁……」
「就算擔心都好正常啫？佢又靚仔又識打扮，明明年紀一樣但又搵多好多錢……」
「聰，就算其他男仔再有錢再靚仔，都唔會吸引到我……因為我哋之間最寶貴嘅係共同經歷。」如初認真咁講：「而之後嘅路，我都只係想同你一個走落去。」
聽到呢度，我突然感觸起嚟。或者，我嗰陣之所以可以抵禦極樂園嘅誘惑，就係因為我有一段咁好嘅關係。
而為咗繼續守護呢段關係，有啲說話係應該要講了。
「如初，我想同妳講一件事。」
＝＝＝＝＝＝＝＝＝
《極樂謊園》全集：
https://www.facebook.com/pg/Echo.of.Heart/photos/?tab=album&album_id=1736011713197304
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
＝＝＝＝＝＝＝＝＝
「如果我冇估錯……應該係上次話題嘅延續？」如初問：「關於『講大話』嘅。」
「妳……」我有啲愕然，「點解會估到？」
「因為我上次已經聽得出你有嘢想講，只係咁啱小Ｉ打過嚟……咁你諗住畀我估埋落去，定係由你講出嚟？」
呢個回應，唔通如初佢已經知道係咩事？
「等我講……如初，對唔住。」我決定先道歉：「自從尾東樓嗰件事之後，我就辭咗本來份工，喺無二公司度做助手。」
之後，係一段頗長時間嘅沉默，有一刻我真係以為自己搞彎咗……完美咁激嬲咗如初。
「所以，呢個就係你嘅『大話』。」終於，如初語氣平淡咁講：「咁我都有一個『大話』想同你坦白。就係我一早就知道呢個真相，但我都冇同你講。」
「吓？係幾時嘅事？」
「你仲記唔記得五月中我上過嚟你屋企做清潔？嗰陣喺你房執衫，無意中俾我見到有張卡片……」
「啊。」我恍然大悟，「我落咗樓下買外賣，所以完全注意唔到……」
「所以，其實我都一直有嘢瞞住你……今次就當打平啦。」如初笑住講：「反正，我冇估錯嘅話，你都係驚我擔心先選擇唔講……」
「但我喺無二度做嘢，其實人工係少咗……」
「最重要係你嘅安全，安全比所有嘢都重要。」
事實證明我當初嘅諗法係冇錯，如初果然係會明白我嘅苦衷。
「但再有下次我真係會嬲架……然後，你仲要應承多我一件事！」
「好好好，妳要咩我都應承妳……」呢刻我當然係鬆一口氣。
「就係搵日要帶我上去無二辦公室。」如初接住講落去：「佢照顧咗你咁耐，我都未正正式式咁多謝佢。」
「事實上，佢今日都救咗我一次。」
「吓？到底發生咩事？」
我就係咁，借住呢個機會將喺「極樂園」發生嘅事一五一十講畀如初聽，結果足足講到天光先完。雖然收線嗰刻已經攰到連起身飲啖水都做唔到，但內心嗰份鬱悶確實係舒緩咗好多。
慶幸如初喺我最失落嘅時候選擇咗體諒；慶幸我人生有一個咁好嘅避風港。
諗到呢度，我開始感到眼皮好重……好彩謝無二放咗我一日假（雖然係無薪假），唔係要起身返工嘅話肯定係好痛苦。
*
時間一轉去到星期二（十月一日）。
今日雖然係紅日，但實際上我係冇假放。呢個朝早我先同如初食個早餐，然後就一齊上去無二辦公室，然而，等緊我哋嘅係一個意料之外嘅結果……
【離港數天，勿念 ❤️】
「呢張紙……」如初望住貼喺大門前嘅嗰張紙，「係無二先生寫嘅？」
「應該唔係，記憶中無二寫字冇咁靚，而且……」我盯住訊息最後嘅心形圖案，如果真係無二畫嘅話，就未免太嘔心了，「佢唔似係會畫心心嘅人。」
「嗯，的確唔似。」如初點頭同意，「咁我哋而家應該點做？」
「等我試下打畀佢。」
但結果，打咗幾次都係直飛去留言信箱。而佢Whatsapp最後嘅上線時間就停喺尋日朝早十點……
到底……發生咗咩事？
*
*
*
【無二視角】
此時此刻嘅我，正躺喺一艘遊艇嘅甲板上面。
各位千祈唔好誤會，我並唔係拋低阿聰去開船P或者釣墨魚……如果可以嘅話我都想，最好係可以飲到半醉不起，但唉……現實總係不盡人意。
呢刻，遊艇正駛緊去一個叫做「惡夢島」嘅地方。
而我身旁，就企咗幾位「白色秩序」嘅「清理人員」。佢哋都著住全身裝備，握住特製槍械，半個鐘之前已經整裝待發。
「仲有十分鐘到達結界外圍！」其中一位叫Match嘅男人突然喊道，佢係呢個五人小隊嘅隊長。
聽到呢度，你應該明白今次唔係乜嘢愉快旅程啦？唔單止唔愉快，只要稍為鬆懈就隨時可以同自己嘅生命講拜拜。而船上面嘅所有人，都已經做好晒心理準備。
再直接啲講，呢次並唔係平時嗰種一般人「遇到怪事驚到喊、撞到怪物死得慘」嘅老套故事。而係等我呢位「經驗人士」帶你哋見識下呢個「世界」嘅陰暗面。
正如我之前講過──怪異並唔可怕，最可怕嘅從來都係人心。
但要由邊度開始講呢？
諗到了，一於由前晚（九月廿九日），我見完陳以樂之後講起。
（待續）
初二／三正式連載。各位拜年記住帶口罩呀！
睇完又鍾意呢個故事嘅朋友，不妨分享出去同埋留句 #留言派嬲 。
＝＝＝＝＝＝＝＝＝＝＝＝＝＝＝＝＝＝＝
【非呃嬲植入式廣告時間】《無異之初》《時間守衡者》《絕命上映》《絕望走廊》《絕無轉機》《無限次告白》《醉後的藍》已經登錄各大書局。
IG: echoofheart
勿念tab 在 限時放送《勿念》岑寧兒Fingerstyle Tabs 完整版指彈結他譜 的推薦與評價
限時放送《 勿念 》岑寧兒Fingerstyle Tabs 完整版指彈結他譜，今日起至12/11/2021 限時免費放送！ 求譜攻略： 1. Like this post 2. ... <看更多>