【我和理非．我不安．又係冇理論．純個人情感分享】
一，一直以來，我都唔係最前線；甚至乎過去幾年，我都叫身邊朋友：「有能力移民，就唔好留低；香港曾經係一個好易搵食嘅地方，有能力嘅人，只要肯捱肯搏，點都可以過舒適嘅生活。不過，我哋嘅下一代，就好難講。」
二，唔信？你睇下財團權貴，只要北京吹雞，即刻跪低。富可敵國尚且如此，一般平民百姓，食得屎啦。
三，今日我想講，今年夏天好長。記得六月十一號晚，剛好中環有飯局。記得個晚我仲同主人家問，係咪要改期；佢哋係政府中人，話唔駛，照去。當晚，我響金鐘港鐵已經見到警察搜查班小朋友，態度好兇；直覺係，做乜氣氛咁緊張？要記住，當晚連 612 都未發生。
四，食完飯，由中信海都行去港鐵，沿途聽到 Sing Hallelujah to the Lord，當時感覺其實有少少好笑。今日諗返，都覺得自己好衰。餘下的，都是歷史。
五，有人話，唔係班靚仔靚妹衝，政府都唔會暫緩。但我都好記得，616 我行完都已經同人打賭政府一定縮，仲贏咗幾餐飯添。不過我冇諗過，政府會縮得咁肉酸。
六，撒，咪撒得乾乾淨淨囉。香港人已經唔信呢個政府，你仲要鬼鬼祟祟；兩個月以來，政府一個大話又一個大話，你話太陽東邊升起，都會畀人話一定係「毛主席東方紅」啦。你話係咪自己攞嚟吖？
七，本來，616 都只係要為 612 一次衝突，同埋一位犧牲嘅後生仔討回公道。結果又立法會又遍地開花又元朗黑夜又荃灣北角斬人，日光日白都好似死城一樣。無錯，議題已經由送中條例變成「香港人 vs 政權」。之前好理性咁寫過好多篇，話香港會變警察城市，點知北京好似嫌香港人唔夠勇武，連深圳解放軍十分鐘去到香港呢招都出埋。
八，政府除左威迫，就係利誘。對唔住，道義唔係個幾千蚊收買到。你用市民大眾嘅財產去換取個人政治本錢，已經夠晒賤格。不顧後果咁去證明特區政府嘅存在價值，只係反映呢班人真係無藥可救。
九，坦白講，香港人嘅對手，唔係林鄭月娥，而係背後更龐大更遙遠嘅中南海。又，香港人唔係要撼動中共對深圳河以北嘅和諧穩定。Leave us Alone 好難明咩？當年係邊個話河水不犯井水？如果唔係承諾一國兩制五十年不變，當年香港走得嘅走，係咪？
十，當然，香港仲有其他嘅問題，但錢解決到嘅，好多人都唔當問題，例如學業住屋之類。所以大家一直都係觀望咁話：「過幾年先啦。」我認，呢個係非常離地中產嘅思維，但我哋就係一班咁嘅人。
十一，「其實我一早都計劃要移民，但係無諗過咁快就要走。」我有朋友咁同我講。佢好瘋狂咁想搵錢，然後走，佢依家就更加瘋狂。不過，我呢位做 IT 嘅朋友，唔靠父蔭亦無咩關係，一切都係靠個人實力，佢背地裡都有供應物資畀前線，甚至諗點樣幫佢哋搵工搵出路。我呢位朋友，係一個都幾純情天真嘅人，亦係好多中產寫照。
十二，另外，好多人就算已經有著落，佢哋都會話：「咁依家點收科？」讀過歷史都知，掌權者往往比我哋想像中非理性。更正確啲咁講，應該話佢地嘅「局限理性」好取決於佢哋所掌握嘅資訊，以及佢哋處身嘅環境點樣影響佢哋對資訊嘅解讀。所以我更加對近來嘅陰謀論同各種假資訊恨之入骨；另外就係個啲死都要講到係有外國勢力，但又冇證冇據嘅人，呢種人唯恐天下不亂，唔係魔鬼，就係魔鬼附身。
十三，換句話講，我諗好多人都同我有一樣嘅感覺，就係香港已經走上不歸路，甚至諗返轉頭，一早就已經返唔到轉頭。我自己好痛恨呢種宿命論，但又無可奈何咁要認自己都有呢種念頭。好多人話今次唔行出來，以後就冇機會。又或者，今次香港人已經冇退路。
十四，但我亦都不斷提醒自己，歷史往往都有叫人意想不到嘅奇蹟出現；而奇蹟之前，又往往係毫無先兆。要對未來有希望，我哋可以做嘅，就係堅持最基本嘅道德原則。
十五，忠恕，唔係叫人忠君愛國，亦唔係叫你寬恕惡人。仁愛，其實亦唔係無差別咁去愛你嘅敵人。所有關於道德嘅哲學，殊途同歸，都係講人點樣自我制約。有人甚至將道德視為弱者制約強者嘅工具。點演繹唔緊要，重點在於利用道德感召：首先，我哋唔好令自己變成自己最厭惡嘅人。
十七，對人有同理心，任何時候都盡量提醒自己，每個人都有阿媽生。我知道，咁講會好多人會覺得難以接受：「你試下畀差佬打之後同佢講我明你都有阿媽生。」我明白呢個時候咁講會有好多人覺得難以接受，又或者好虛偽。但背棄同理心，我哋漸漸變成魔鬼，淪為周街打人嘅黑幫，變成自己最厭惡嘅人。
十八，再講多次，我並唔係大愛左膠，我覺得警察唔應該濫權，唔應該畀黑幫打平民，唔應該講大話，林鄭亦唔應該留低。但正如之前所講，問題出在制度上面，而要改個制度，就首先要有個「善良」嘅社會。
十九，我哋唔可以祈求換個人，以後就天下太平。甚至制度變更過程，亦唔會完美，所以一個社會嘅唯一嘅希望，就係「善良」。假如問我最不安嘅係乜，就係我覺得「善良」離我哋越來越遠，而「惡」就近在身邊。
二十，當然，響黑暗之中，光明就越顯得耀眼，甚至會有人覺得刺眼。不過，呢個就係一個社會仲願唔願意走向光明嘅指標；只要大多數人仍然嚮往光明，我哋仍然有希望。香港近來最黑暗但又最光明，並唔係矛盾，而只係我哋未習慣咁大嘅落差。
廿一，最後，假如你有宗教信仰，以上所講嘅唔難明白。請大家為自己，為香港祈禱；Sing Hallelujah to the Lord 又好，喃嘸阿彌陀佛又好，目的都係化解戾氣。先解救自己心靈，再去普渡眾生；做唔成人，又點做菩薩？ #好人一生平安
