#一地兩檢同你計錢 #租呀嘛交租啦
官：「聖旨到！各位鄉親父老、叔伯兄弟，廣深港高鐵即將面世。當今聖上天縱英明，深知香港人秒秒鐘幾百萬上落，特別為破例開恩，頒下『一地兩檢』方案，好等百姓省時北上。」
蟻民：「嘩！真係謝主隆恩，吾皇萬歲萬歲萬歲。百姓省時，當然好著數，咁話時話啦，咁聖上要檢，都要有地方去檢。聖上之前金口已開，根據基本法乜乜七七，內地執法部門不可來港執法呢？」
官：「斗膽！竟然質疑聖上！『一地兩檢』此豐高偉業，豈容受其他條文阻撓。奉天承運皇帝詔曰，龍門任我搬飄移『境界』。西九總站內出入境樓層部份地方，以及月台範圍會劃作『內地口岸區』。香港係以租賃方式租畀內地，記住，係租！有你著數呀。」
蟻民：「Well！中國果然毋忘國恥，更以史為例，活學活用，重新復興『租界』呢個概念！想當年《南京條約》、《北京條約》割地賠款，真係諗起都令人痛心疾首。喂！話時話，聖上話『租賃』，正所謂數還數，路還路，租，幾錢租先？」
官：「大膽刁民！你慌聖上會走你數？」
蟻民：「即係咁，割讓去『內地口岸區』嘅面積，有成10.5萬平方米，即係113萬平方呎！你商業問題就商業解決，總站個位，喺正西九地王，左邊Grand Austin；右邊係凱旋門。ICC依家Office呎租95蚊，屈指十算，呢度月租成億！如果計個折頭，冇8000萬都有7000萬啩……嘩！發達啦！中國走資新出路，香港地牢仲唔變金庫，謝主隆恩！」
官：「且慢，當年英國都係『租借』九龍新界，你翻查史書，《展拓香港界址專條》有提過租金？有交收紀錄？當然沒有。不然，那就不會叫『不平等條約』！還有，千萬別在香高鐵站我個地頭犯法，別忘中國還有死刑，講完，欽此！」
完
by千頌C@堆填區
http://fb.com/winbigwok
