［好腰好腎好男人］唏，我看見好男人喎！能屈能伸，劉邦都係咁咋！
1. 聽聞有條問題係，「你會唔會幫女朋友買M巾？」。對我嚟講根本唔係問題，why not？但聽聞好多人話會惹人側目，有損男性尊嚴云云，奇怪。不過實務上，好似咁耐以嚟得一條女試過叫我幫佢買，我亦照做。男子漢大丈夫，有何不可？又唔係要你舔痰罐聞M巾。你叫我咩接新娘要玩嗰啲遊戲就真係有失尊嚴啦—所以我結婚冇搞呢啲嘢—但我啲朋友有！咁我為朋友就冇所謂啦—不過總不忘口頭（口頭啫）輕薄返啲姐妹伴娘之類。
2. 但又不過，尊嚴呢啲嘢又可以好個人。掉轉頭，「我就唔會幫女挽手袋」。咁你話，車，M巾同手袋有乜分別？真係要解，好似拎手袋易過拎M巾喎。至少女仔都未必會午飯時間，眾目睽睽拎毛M巾（唔好問我點解，社會風俗嘅嘢）返公司迫電梯。但拎手袋唔怕嘛。只能講，perception 嘅嘢
3. 仲有，本人不能接受女人畀錢開房。真的，天地良心，一個男人窮到咁嘅，真係返屋企打飛機算啦。埃汾都窮過，雙失過，女伴請埋我食飯都試過（但做金融後已經冇）。但真係接受唔到女人畀錢爆房—陶傑話齋，門房阿嬸嘅眼神足以掃到你不舉。你條仔窮到咁嘅，真係飛咗佢。唔係窮人冇權扑嘢（事實窮人先最鍾意，因為機會成本低，中產先忙到冇時間），而係，斷估你請條仔食飯，條仔出錢爆房都得掛。本人真係接受唔到女人畀錢爆房，話知你爆Ritz Carlton．
4. 還有其他，可以問下女讀者（如有），會唔會幫男朋友／老公買condom？我就唔知，但目測好似未結婚嘅有啲遲疑，結咗婚嘅可能冇所謂。亦可能只係因為年紀，少女就會矜持（雖然見到洋腸就冇晒），啲師奶就著豹紋底褲（＊）唔蹺腳中門大開，在公眾場所粗口過男人，或者同枱食飯講啲仲賤過男人講得出嘅鹹濕笑話。
5. 咁當然啦，有啲結咗婚嘅根本唔使幫老公買，首先可能根本唔用。「聽聞結婚係終極一個唔用套嘅理由」。有啲係中門大開造人，亦有啲根本女仔食藥，有乜所謂。
6. 又，正如上篇文講過（http://bit.ly/2vcspML），你理得啲大媽收經都未用完啦，你又知佢係自用？幫女買唔得？幫心抱買唔得？幫個仔買唔得？人地鍾意聞M巾你吹咩？品味嘅嘢唔好傷害到人就得（＊＊），好似係
7. 好記得當年大學讀易乾，正係有點爭議嘅Joe Chan教（明顯我只係上咗幾堂）。但佢話畀我知，拿，現代社會嚟講呢，你諗真啲，你唔係買咗樣嘢，或買咗樣服務，好多時你係買咗個使用權。有乜分別？obligation嘅分別。你買咗張九點半睇戲，你可以讓畀人—OK，你話有啲實名制—但你可以掉咗佢，唔係一定要睇的。男人買M巾一樣，我可以幫女朋友買，我可以拎去炒，甚至我只係行為藝術搏有人影放上網，又或者我係虐待狂鍾意掃晒啲巾等人冇得用，一般都係得嘅
8. 但又記住，尊嚴何價，pride何價。堅持原則當然係好事，但又有時有冇諗過，你嘅 ego 你嘅pride，正係扯你後腿嘅嘢？呢個真係唔識扮智者，我都一定係。真心的，唔係咩「屌當年高盛肯請我呀不過佢粗聲粗氣之嘛如果唔係而家我發咗達啦」，或者咩「呀乜乜公子當年都溝我呀不過我揀我老公之嘛如果唔係而家少奶奶唔使做啦」嘅自我吹捧，真的，每個都有缺點，埃汾其中一個缺點就係面皮薄。再講一次，唔係以退為進，面皮厚真係好多時係優點，特別係職場上，或者投資上都係。
9. 你睇呢，如果真係冇M巾，呀男主角就係末世霸王，好似北斗之拳嘅惡霸咁了，有M巾有女。你就因為你嘅尊嚴搞到女伴冇得用。或者如果有得炒嘅，男主角就咁賺一筆了。如果冇？咁我估都係分啲畀條女用畀啲女同事用啫，使幾錢丫。又係上次講嘅，不對稱回報嘛（http://bit.ly/2vcspML）
10. 最後睇下，唔知有意定無意，但中國呢，歷史上呢，有pride嗰啲，都係死得慘。項羽，關公，呂布，唔好打咩？但大贏家係劉邦，曹操。人無恥則無敵嘛。
11. Oh btw，叫我幫女伴綁鞋帶，我都係拒絶嘅。主要係肚腩頂住。呀同埋，「其實女人綁乜鬼鞋帶」？都話埃汾鍾意高踭鞋。運動？埃汾唔同女運動的（除非做愛都係運動啦），實情埃汾自己都唔運動。行山？巫山下話？唔使著運動鞋的。
12. （講笑啫，去旅行總唔會著高踭鞋，但鞋帶都係女仔自己綁，因為埃汾可以捉女去旅行時，個肚腩已經頂住唔多屈到身）
（＊）According to some，一個女性開始著豹紋底褲，就係已經成為師奶／大媽，已經完全放棄自己。當然你亦可以理解做豁達，唔理他人目光，活出自我，其實睇你點演繹，事實如果人人唔理他人目光，賣化妝品賣時裝賣內衣嘅品牌會死晒。同樣地，一個十五歲打後嘅男性，開始戴腰包（一說係保溫杯）嘅，就係佬化，成為油膩中年。
（＊＊）埃汾當然係認為品味有高層，甚至廿年前已經同人網上拗到七彩。不一定係涘汾鍾意嘅就係有品味（例如葉念琛），但品味肯定係有高低的。否則莫扎特就同陳偉霆一樣好，巴利殊哥夫同大媽舞一樣好。但凡有人話我知，品味冇高低嘅，我例牌必回「係咯，品味嘅嘢，有人鍾意食噢媽卡些，有人鍾意食屎，有人鍾意睇人食屎，都係品味嚟啫，冇高低嘅，唔好judge人地」
