我嘅職業係：扮賊（上）
好多時，一個人搵到終身職業，開端只係一件微不足道嘅小事。
當年，我仲係一個內向嘅小男孩，奈何身材高大，滿臉橫肉，所以話「相由心生」係呃鬼嘅。
讀中學果陣，我參加咗話劇團，識咗個老友叫阿輝，佢追緊女仔，出盡法寶，都久攻不下，
於是佢就叫我扮賊，畀機會佢英雄救美。
我口都窒埋：「下，做......做賊？仲要拎刀？我唔識。」
阿輝拎出一把刀，反手就捅落自己心口，我嚇到面無人色，先發現佢無流血。
阿輝得意揚揚：「伸縮刀嚟架，根本唔利，就算唔小心捅到人，刀刃都會縮。」
我半信半疑咁接過把刀，同阿輝排練好台詞，「此路是我開，此樹是我栽」之類。
最後我忍唔住問：「萬一我穿咗煲，搞到你追唔到女仔，咁......點算啊？」
阿輝答得輕描淡寫：「你令我無咗個女朋友，咁咪你做我女朋友囉。」
喺呢種「不成功便成仁」嘅威脅下，我好努力演出。
應該話，我一拎把刀出嚟，個女仔就嚇到花容失色。
阿輝就擋喺佢面前：「你要殺就殺我啦。」
我望吓我手上果把小刀，如果要殺人，我諗都要千刀萬剮先得。
然後我同阿輝就開始搏鬥，拳來腳往，虎虎生風，
但係個女仔已經捂住對眼，蹲喺地下尖叫，所以呢場精彩嘅武俠片，居然係無觀眾嘅。
結果阿輝一招「黑虎偷心」，成功打退咗我，個女仔好感動，阿輝抱得美人歸。
跟住落嚟果三個月，我嘅中午飯都係阿輝請，都算係創造咗一筆收入。
畢業之後，我搵咗幾份工都唔岩心水。
呢個時候，又有朋友向我抱怨，話追唔到女仔。
我嘅做「賊」事業，就咁樣開始咗。
其實都要感謝愛情小說、浪漫韓劇，總係講男主角要不顧生死，拯救女主角，先夠浪漫。
但係現實邊有咁多生死關頭，最多係打緊機果陣，不顧全隊生死，去聽你電話，已經好難得架啦。
我嘅責任，就係創造一個生死關頭。
工作過程都算順利，除咗我「敗走」之後，有啲女仔話要報警，要個客千勸萬勸先放棄。
我一直以為，我做嘅嘢係岩嘅，女人鍾意浪漫，咪製造浪漫囉。
反正浪漫本身就帶住幾分虛偽，唔通對住支蠟燭，晚餐會好食啲咩。
直到有一次，我接到一單生意。
個客同女友拍咗幾年拖，女友平時都對佢好好，但一講起結婚就支吾以對。
所以，個客想整一場轟烈啲嘅戲，去打動女朋友，然後求婚。
我嘅伸縮刀，亦應佢要求換成真刀。
劇情嘅設計係，我拎住刀衝過去佢女友度，個客就大叫：「唔好傷害佢！」
然後個客會幫女朋友擋一刀，當然係用手臂擋啦。
我做咗咁耐賊，連雞都無殺過。
依加仲要我見血，我真係好緊張，不過做服務業，顧客就是上帝，都要照做嘅。
但跟住落嚟嘅劇情，我同個客都估計唔到。
我照拎住刀，衝向佢女友，個客亦移近兩步，準備幫女友擋刀。
但話未講出口，佢女友突然伸手一拉，將個客推向我刀口，然後轉身就跑！
好彩我閃避得及，差啲成把刀插咗落個客身上。
我望一望，佢女友已經消失咗，影都無埋。
「佢好似......賣隊友喎。」我望向個客，見到佢已經蹲喺地下喊緊。
我拍吓佢肩膀：「呢次失敗咗啫，我地諗個新劇情，下次我免費補番畀你。」
「你覺得我仲應該娶佢咩？」
個客抬起頭苦笑：「點解拍拖，由追求到求婚，都一定係男人討好女人？」
咁哲學嘅問題，我只係一個賊，我答唔到。
但果一刻，我心中充滿咗共鳴。
自此之後，除咗英雄救美之外，我開多咗一項新業務：試探。
工作內容差唔多，都係製造恐懼。
呢項服務，比英雄救美更受顧客歡迎。
原來無論男女，都會好奇，生死關頭，果個話「愛你愛到海枯石爛」嘅人，到底會唔會賣隊友。
我飾演一個變態嘅賊，追住個客嚟斬，再睇吓佢另一半咩反應。
呢場戲比英雄救美大陣仗，所以我請咗個助手，係我鄰居小芳。
下集：https://goo.gl/mUye8K
長生不死之後：https://goo.gl/EMHtc4
我隻狗係特務：https://goo.gl/ziMBgK
#短故 #短篇 #小說 #陳美濤 #廣東話 #粵語 #tomatochan #我嘅職業係扮賊
