呢一刻最大，最值錢嘅金融公司，係邊間？估下。
1. 首先定義清楚，咩叫最大。有啲行業有時講媽劇些牙，而媽劇些牙又有時有不同定義。但好多時計收入。有啲公司又可能係計資產值，銀行有時亦都計所謂嘅「一級股本」（＊），保險公司計保金收入，基金計AUM（有幾多錢畀我玩）等等。但不如化繁為簡，就計市值啦，人人都上市（＊＊）
2. 聰明嘅你，見到百幾兩百蚊股價，就估到唔係中資公司，唔係幾蚊嘅工行建行甚麼，甚至唔係中人壽平安中信證券港交所。匯豐？nice try。固然得幾廿蚊，但，可能呢個圖係倫敦呢？便士咪有幾百。不過唔係。高盛？爭幾條街，十份一市值咋下。
3. 可能有人記得，JP Morgan Chase．近磅了。之前一度都係，但最新唔係了。
4. 開估，隻嘢係我耐唔耐寫嘅，VISA。Economist原文呢度（https://econ.st/3aeLr4K），特登唔用佢張相，否則就唔使估
5. 的確，以前，我有記億之中，一路以嚟最大市值嘅金融公司，就係銀行。所以有時都費事講「最大金融公司」。但呢一刻，唔係銀行嘅VISA，成為咗最大市值嘅金融公司
6. 如圖，VISA股價當然都大插，驚消費者唔消費啦，收少啲錢咁。但其實同美股同步，高位跌三成左右。唔使跑得快過隻熊，跑得快過你朋友就得了，JP Morgan Chase及其他跌得仲甘，所以VISA上咗第一。
7. 其實，相當奇怪，呢間公司何德何能？原文話頭mere cog in the system，齒輪嚟咋喎。當然VISA老細會講自己公司科技點先進，marketing 點勁。但實際上答案好簡單亦好悶，公司就係處於一個悶聲發大財，而寡頭壟斷嘅支付行業
8. 其實有啲行外人連VISA做乜都可能未知，有人以為係呢間公司借錢畀你。錯。實際上佢就係平台，中介人。發卡嘅唔係佢，佢係超級連繫人（！），將商人，顧客，同銀行拉埋一齊。6000萬間商戶，34億張卡（即係地球每兩個人一張，而仲要其實未正式入中國）。每單交易佢舔些少，加埋就不得了。呢個交易量往年講緊係90000億美金，全球GDP十份一，舊年VISA嘅收入係230億美金，數下有幾多個零
9. 呢度要講一單VISA不為人知嘅歷史。公司當然你同我都細細個聽過，但其實上市歷史好短，係2008年先上市的。之前？就類似香港甚麼銀聯咁，成1萬間銀行共同持有VISA，然後2008年先拆出嚟上市—呢個，堪稱係全球銀行界近十幾年最錯嘅決定—完全係殺雞取卵。原本係銀行自己舔晒呢啲交易費的
10. 留意VISA上市時仲要係金融海嘯前，所以上市冇耐就大插。金融海嘯都差不多廿蚊跌到十蚊—但而家係百幾蚊。打後十年，VISA盈利升咗15倍，股價都升十倍。情況可能同港交所$3.88（跟返上市編號）上市差不多，最初啲經紀行人人有份，但升幾倍乜都沽晒啦。
11. 好大程度，係多得全球化。而因為量太大太大，個economies of scale 好驚人。後生仔唔好以為搞咩電話叫賓妹平台先和味先士基拿步。VISA嘅operating margin，由43%升到而家65%，真係好過賣白粉。全球一百大公司，得兩間高過佢。第一間係茅台，第二間係沙特阿美。至於咩蘋果 Google 之類嘅20-25%，同VISA畀真係濕碎
12. 公司嘅margin cost極低，開多廿間二百間商戶，成本都唔會爭幾多，但收入就係咁上。股東當然和味，2008年以嚟，每年平均回報24%，股王級數了，每年喎大佬。而隻嘢根本冇平過，而家高位插咗三成，仲係近30倍PE，而JP Morgan之類係七八倍，工行之類五六倍（計歷史啦，在家唔得閒睇預期）
13. 當然公司唔係冇對手，美國人仲係鍾意寫支票（唔講唔知），日本人就鍾意現水（傳說中嘅落後國家先用電子支付嘛），但其實兩者都在沒落中，等啲老嘢死晒就得。唯一嘅對手就真係Master Card，因為其他公司由零開始打入市場極難。咁兩間玩晒，應該有默契唔會割喉爭生意
14. 但，當然都提返，唔係完全冇威脅嘅。當然政府已經唔係好高興，有啲就扶持本地公司，最大威脅當然係中國嘅銀聯（但中國亦好似打算對外開放信用卡市場），另外其他國家當然都希望用種種嘅法例去削弱呢種兩家獨大仲要兩間美國公司嘅領域。大量嘅反壟斷法都出嚟罰錢，亦都限制佢地收幾錢。
15. 第二樣嘢當然係手機，好多即時誇行轉帳，而家用電話一做就得（但聽聞美國相當落後），例如好似PAYME咁？商用都可以，就繞過VISA了—問題係，變咗要畀現錢喎。而且同國家就得，跨境仲係好難做。當然而家睇下美國搞成點了，聽聞進展好慢
16. 第三都係科技，FINTECH，暫時其實都走唔出個框，甚至Square Stripe之類咪又係返返去兩大公司，Apple Pay Google Pay 三叔Pay都不過係飛起咗張卡，但背後仲係VISA Master。但留意啲科網巨頭本身咁多客源，係有機會由零開始打入呢個市場的。大陸固然有騰訊阿里巴巴，亞馬遜亦都想做差不多嘅嘢
17. 其實肺炎雖然打擊消費，但on relative terms VISA係贏家。網上購物總好過去迫超市搶廁紙數銀紙，亦其實銀行都有誘因繼續合作，因為每單VISA交易，由商戶收嘅錢，VISA舔少少啫（但舔晒所有銀行），銀行收大半嘅。
（＊）題外講，因為銀行要倍大資產其實好易，主要係受制於監管，所以唔同監管水平下比較銀行資產唔太公平，所以計股本
（＊＊）金融業仲有少量冇上市公司，但唔會大的。嗰啲乜乜私人銀行，冇你想像中咁大影響力。
半磅幾兩 在 半磅幾公克2022-在Mobile01/PTT/Yahoo上的房地產討論內容 ... 的推薦與評價
市場上認為：1公斤= 1000克= 2市斤。市斤為內地常用的重量單位，跟香港... 0.375 斤, 6 兩, 0.2268 kg, 226.8 g, 半磅.. ... <看更多>