[冠瑤卡占卜]記得當天我罹患流感,喺鵝頸橋散播愛與病菌:)
有左第一次的經驗,我第二次的街頭表演比上次smart好多smooth好多,今次我決定化身「占卜師」亂入鵝頸橋用*冠瑤卡為大家占卜今年運程,(*冠瑤卡係來自偉大插畫家劉冠瑤畢生所繪製之數萬張插畫卡,每一張也獨一無二,層出不窮,成為我們窺看命運之門的鎖匙,有求必應,心誠失靈。)而我估上次大家唔嚟可能係因為我太過可遠觀而不可褻玩了,所以今次我將自己隱身係一個命運之口入面做個secret angel用secret angle為大家卜上一卦。但時不予我天意弄人,我不幸係新徵頭罹患流感,仲要匿喺個焗死人嘅booth入面仲有三隻小飛蟲係咁撩我,但都無阻我將愛與病菌透過冠瑤卡傳染世人普渡眾生。
然而呢舊野實在太大,我兩度受人白眼兼俾人趕走,搞咗一輪先搵到個位,SET好晒位後我係箱入面既期待又怕受傷害心跳卜卜我想痛哭,但等左好耐都無人問津那年18舞校母會站著如嘍囉,偷望出去見到不時有人係我箱前影相打卡,有啲仲伸入嚟偷影我本體好似影緊寵物店籠入邊嘅動物,一對又一對的情侶喺到投閃光彈對我造成10000點光屬性傷害。
我等到天荒地老榴槤都生喺摩天輪,終於皇天不負苦有心人,守得雲開見月明,柳暗花明又一城,有位少女向我翩翩走來,對面的女孩看過來!㩒咗個個愛情掣啊!係初戀啊!我爽歪歪~See me fly~
所謂好事成雙接二連三,漸漸地我眼前既再唔係龍友們,而係嚟搵我占卜嘅人龍!人中之龍呀!我爽歪歪到西洋菜街!個刻,我好想大嗌:
「阿媽我得咗啦!」
可能係我入面既聲音太澎湃驚動到其他人,正當我卜完最後一支卦,我再次俾人趕走,原因係我個「命運之口」太大舊好阻街喎,於是我好狼狽咁帶住我個「命運之口」返屋企封印咗佢。
好多人都話:「畫畫喺香港搵唔到食㗎!」,我都相當之認同,好似我咁有才華又靚仔嘅畫壇氣質男,點解一路都喺人海中浮沉,一路都難以脫貧?公平咩?我喺香港做創作只能維持生命不能維持生計,可憐冠瑤已經好多年冇出街睇過戲唱過K買過衫啦!做人真係好痛苦。
#新搞作 #創業做占卜師
Search