//支持本page請Click入內文比Clap，謝謝！//
//即係我開口屌咗兩句譚仔都比成廿幾人Unlike，可想而知香港人有幾鍾意譚仔…//
無諗過繼華星同譚詠麟割席跪低聲明之後，第二日咁快就立刻出現譚仔藍屍紙事件。事緣響10月26日晏晝，突然有大量網民同時發現響觀塘、油麻地兩間譚仔分店出現一告示指「不招待曱甴及不文明人士」，然後網上立刻引起哄動：除咗有大量網民呼籲罷食之外，更加有人張貼「裝修告示」於門口，暗示將其列入抗爭裝修名單之內。
對於呢件事，我一開始係抱住存疑態度──唔係懷疑佢係假，而係懷疑佢係真：雖然有人話作為一間店舖，係無可能弱智到稱呼潛在客戶為「曱甴」兼趕人走，但呢幾個月耳濡目染太多藍屍式邏輯思維，卻係充份感覺到無乜嘢係無可能發生。當然只有兩間分店有呢張告示，反映出唔會係由總公司發出，但卻唔能夠完全否定某位店長真係癲到出張咁嘢宣洩政見。
響過程之中除咗質疑事件真假之外，連帶亦有好多旁支討論湧現，例如有人質疑收購譚仔嘅丸龜製麵本身經已淪為紅底（但後尾又澄清咗，其實譚仔目前係100%日資，反而香港嘅丸龜製麵有63%係中資）、又有人話譚仔米線不嬲難食、係虛假嘅香港集體回憶云云。
之但係好快，譚仔經已透過閉路電視片段證實，該張告示係有可疑人士惡意張貼，所以坊間所有質疑同裝修恐嚇立刻化為烏有。「藍屍紙疑雲」亦算係「圓滿解決」。
但當有人因為呢張告示向譚仔炮轟之際，卻係有一班黃絲立刻撲出黎護航，個個都充當「冷氣偵探」要為譚仔洗擦冤情；而當響譚仔提出合理證據洗脫嫌疑後，又吹風話「大家怪錯咗佢，一定要好好幫襯懲罰番譚仔作為賠罪」。呢個情況令我覺得非常奇怪：
1. 要知道譚仔唔同必須隱姓埋名嘅義士，佢唔單止擁有足夠嘅傳播訊息渠道，同時亦掌握閉路電視等證據，又何須要你班「冷氣偵探」操心？
2. 又同一班「冷氣偵探」，平時最鍾意就係網上捉鬼冤枉抗爭者，點解今次反而咁落力幫譚仔辯護？
3. 譚仔由抗爭開始以來，從來都無就抗爭運動表達過任何立場，即使今次「藍屍紙」佢地只係被屈，咁最多都只係非黃非藍嘅白店，點解只係因為佢地作出咗澄清，成班黃絲就將佢吹到變成黃店代表？
反而華星冰室直頭都出埋公開聲明，話支持香港民主自由同成立獨立調查委員會，卻係仍然比大量黃絲堅持永不錄用？唯一一個解釋，就係因為香港人真係好鍾意食譚仔因而產生移情作用。
對於好多香港人黎講，萬一譚仔真係列入罷食名單，係會令佢地非常困擾：而家經已唔可以搭地鐵、食美心元氣同飲Starbucks，點可以無埋譚仔？所以好多黃絲譚仔支持者由一開始就希望佢係清白，當洗刷嫌疑後舒一口氣之餘，潛意識認為需要更加支持佢──即使佢係連黃店都唔係。
響度要利伸，我自己近乎完全唔食譚仔，純粹就係因為唔鍾意食米線而唔係因為佢難食；咸魚清菜各有所好，亦覺得無必要因為有人好鍾意食譚仔而嘲弄佢地。甚至乎即使譚仔比好多人拒絕認可為「香港人集體回憶」之一，事實上就係對於好多香港人而言，譚仔經響佢地心目中嘅地位經已不可撼動──我身邊就唔止一個識得嘅朋友，響呢日下晝為以後仲可以食譚仔而表示慶幸。
呢種「偏心」係人皆有之，即使勇武派都難以避免。目前香港麥當勞已有8成股權被中資收購，係名符其實嘅紅底；當日警察闖入油麻地麥當勞毆打市民，麥當勞以「保護顧客私隱」為由，拒絕公開閉路電視作為證據，基本上已符合哂作為藍店裝修名單。但大家有無發覺除咗響又一城比人破壞過一次點餐機以外，好似就再無其他同麥當勞有關嘅裝修事件發生？
事實上就係呢幾個月黎，麥當勞從來都與抗爭者息息相關：早期抗爭就有大量市民響前線派麥記包──無他，無論係以價錢、方便同質素黎講，都要數老麥最方便。此外對於經濟有問題嘅年輕抗爭者黎講，24小時開放嘅麥當勞亦係最好嘅聚腳棲息之地。更加唔好講某啲麥當勞例如金鐘分店，唔止一次響警察鎮壓時充當暫避之地。
即係當勇武派同麥當勞嘅關係係咁難捨難離，響進行裝修之時就唔算唔係刻意，亦好可能響潛意識之下留手。響抗爭入面，有時呢啲界線就係好難好清晰咁劃分，見倒連登有人嘲弄勇武派表裡不一，我只會講：「相信前線指揮」同埋「不要為前線抗爭者設限」兩大原則（例如果啲乜撚黑裝修紅裝飾藍罷食真係垃撚圾，藍店照裝修咁又點？係咪想割席？），你唔滿意，就唔該落場親身成為裝修師傅，最多我到時堅持不篤灰不譴責不割席又點話。
