【何麒的生活隨筆】
Hoki the Kongner：11月音樂會節目推介
喺香港地生活，我哋每日少不免都係營營役役，淨係返工放工食飯瞓覺咁樣。不過如果大家細心留意嘅話，其實都好容易就會發現喺唔同場地都有好多好值得睇嘅文藝節目可以俾大家欣賞，有啲仲好抵睇添。今個星期就等我分享下11月本人有咩心水推介啦。
1. 安德拉斯．席夫爵士與安德烈．巴爾卡室樂團
每年康文署文化節目組都會請外國樂團嚟香港表演，今年都唔例外，其中一個就係Sir Andra Schiff 同佢嘅樂團。佢地會喺11月15至16號一連兩日喺文化中心度演出。值得留意嘅係兩日嘅曲目係唔同嘅，而佢哋今次帶嚟嘅曲目主要都係貝多芬嘅鋼琴協奏曲同埋莫札特嘅交響曲，中意聽德國/奧地利嘅古典作品嘅朋友就唔好錯過啦。
2. 馬勒樂團1%慈善音樂會 — 致親愛的許曉暉女士
馬勒樂團係一個由香港指揮家吳懷世所創立嘅本地樂團，呢個樂團近年用新嘅形式將古典音樂推廣比大眾，例如佢哋有一個音樂會系列就叫做「無邊界音樂家」，觀眾同樂手坐得好近，打破左傳統入面台上同台下之間嘅界限。而今次呢個音樂會係為咗紀念佢地嘅永遠榮譽顧問許曉暉女士而舉辦嘅。今次音樂會嘅曲目有舒曼嘅鋼琴協奏曲同埋柴可夫斯基嘅第五交響曲，其中鋼琴獨奏會由鋼琴家羅乃新女士擔任。呢個音樂會就會喺24號星期日下午3點鐘喺荃灣大會堂舉行，啱哂一家人飲完茶入場欣賞下浪漫主義音樂。
3. 彼德與狼
11月19號晚8點鐘喺沙田大會堂會有泛亞交響樂團演出嘅《彼德與狼》。《彼德與狼》係合家觀嘅曲目黎嘅，適合一家大細之餘，都適合啱啱開始聽古典音樂嘅朋友仔。呢個曲目係一隻交響樂嘅童話故事咁樣，一邊有音樂伴奏，一邊有旁白講故事。如果19號晚唔得閒都唔緊要，我睇城市售票網見到12月29號都有一場，不過地點就會移師到屯門大會堂。
4. 香港大學學生會管弦樂團年度音樂會
其實喺現今世代，大學有自己嘅管弦樂團都已經幾普遍，咁所以當然香港大學都唔例外啦。每年嘅四月同十一月佢地都會有演出，而今次佢地會喺21號晚8點喺港大百週年校園李兆基會議中心大會堂度演出。大家千其唔好睇少啲學生樂團，佢地嘅音樂會係真係值回票價。今次佢地會演奏貝多芬嘅第九交響曲，《快樂頌》我諗大家一定耳熟能詳嫁喇，而《快樂頌》就係黎自貝多芬第九交響曲最尾個個樂章嘅一啲旋律。未試過聽完整版嘅話就記得上去佢哋Facebook度預留定張飛啦。
5. 2019 小野麗莎 Unchain My Heart 香港演唱會
呢個音樂會我都係最近聽收音機先知有呢個音樂會。小野麗莎係一位著名嘅Bossa nova 歌手，而Bossa nova 係一種發源自巴西嘅音樂類型，有啲森巴嘅音樂元素，又有點爵士樂嘅元素咁樣。老老實實，我對呢個genre 嘅認識都唔算太深，但我覺得難得有咁出名嘅歌手黎香港演出，大家係應該襯一個咁好嘅機會去認識一下唔同種類嘅音樂，多啲了解呢個世界有幾大啊嘛。
今次介紹左幾個我覺得幾得意嘅節目啦，都係想話比大家知，只要細心留意，喺香港其實都係有好多唔同嘅藝術節目可以俾大家去參與嘅。古典音樂嚟到2019年唔再係貴族嘅玩意，只要肯試下，你就會發現古典音樂係有好多途徑去接觸。再者，我覺得如果我地肯開放啲，肯去試下接觸唔同嘅音樂風格，一嚟可以了解自己嘅口味，二嚟又可以試到新嘅事物，擴闊視野，你哋話係咪先？
（本欄逢周三更新。敬希讀者垂注）
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-
HappyKongner 招稿喇！！！
我哋嚟緊會喺逢星期五加設 【Kongner投稿天地】 ，俾廣大Kongner 弟兄姊妹能夠有發表佢哋意見嘅地方，亦都可以鼓勵大家多啲運用自己嘅闡述能力。
有興趣嘅朋友歡迎直接Facebook Send Message 俾我哋，又或者Email 去 happykongner@gmail.com 同我哋傾都得。
期待收到大家嘅鴻文大作！
納稿標準：合乎邏輯，文句通順，言之成理即可，不過編輯部同事比較嚴謹，大家自己小心。
