立法會財委會今天下午開兩節共四小時會議，審議多個撥款申請項目，首項審議是一百二十八億的「基本工程儲備基金整體撥款」。財經事務及庫務局長陳家強重申，有關項目有逼切性，如果委員會在四月一日前無法通過，政府無法支付項目費用。多名泛民議員關注當中古洞北發展的工程，其中新民主同盟范國威就指項目涉及新界東北發展，矛盾重重，要求將項目抽出，分開表決。
今次基本工程儲備基金整體撥款之下，有關重置石仔嶺安老院的撥款申請，其實就係關於「古洞北新發展區第29區特建安老院舍綜合大樓地盤平整和相關基礎設施工程」，這幢特建安老院舍綜合大樓就係用黎安置因為政府收地發展，而要被迫搬遷的石仔嶺安老院的長者。涉及的撥款有兩項，包括總目701分目1100CA的收地賠償和特惠津貼的申請，涉及金額6億2千萬；以及總目707分目7100CX相關研究及勘察的撥款申請，涉及2800萬的撥款。
位於新界東北發展區內的石仔嶺安老院，一批長者院友一直要求不遷不拆，希望可以留返喺石仔嶺安老院安享晚年，但係政府一意孤行，堅持清拆石仔嶺安老院，而家仲喺新界東北工程撥款尚未通過、亦未與長者院友達成共識的情況下，要偷步開展新安老院舍的前期工程，既係無視公眾反對聲音，更加係不尊重一批要求不遷不拆的長者院友。
有關要提早開展新安老院舍工程的原因，政府就解釋話係想做到新舊院舍無縫交接，但係早已經有民間團體質疑，政府係要為左令鄰近石仔嶺安老院的私有土地可以盡早「原址換地」，益發展商。雖然政府解釋石仔嶺安老院係官地，要申請「原址換地」的位置無重疊，但係根據政府提交的補充文件的附圖一，石仔嶺安老院的官地，同申請左「原址換地」的土地係有部分相連，而且將來係會置於同一個商住項目入面。
政府同地產商係擔心，一旦石仔嶺安老院不遷不拆，就會拉倒呢個商住項目，令地產商失去「原址換地」發展物業賺錢的機會，呢個先至係政府急於收回石仔嶺安老院，甚至不惜提早開展新安老院舍前期工程的真正原因。如今政府更加為左避開爭議，將新安老院舍前期工程的撥款，暗渡陳倉，攝喺基本工程儲備基金整體撥款之下，綑綁埋其他民生工程一齊表決，迫議員通過撥款，為左發展新界東北、同埋維護地產商的利益，無所不用其極。所以范國威要求財委會主席，將關於「古洞北新發展區第29區特建安老院舍綜合大樓地盤平整和相關基礎設施工程」的兩項撥款，抽出來獨立表決。
