讀者投稿《我的產後抑鬱日記五大長老篇》
我面對既唔係四大長老咁簡單🌚
係五大長老！老公阿爺阿嫲姑姐老豆老母
文章極度長 慎入🙇🏻♀️
是咁的，小妹交待下自己故事背景先
我係嫁咗過台灣既，原本有輕至中度產前抑鬱
bb因為腹裂(腸飄浮喺羊水)做手術，入咗NICU
順產出院前同坐月第一二日係好地地冇事🌚
出院99話喺我自己屋企冇人幫我坐月
叫我返佢到坐月⋯⋯
因此小妹已經比人用雞脾打軟個牙骹😑
根本唔敢駁五大長老嘴😂所以唔好怪小妹唔駁嘴🙇🏻♀️
亦唔敢喺台灣投稿，怕有三姑六婆睇背景估到我係邊個😅
第一單：6299好迷信，女女5月尾出咗世。6299禮拜六走去攞我地成家人八字去算命，算命都冇咩問題啦⋯⋯但攞我地成家人八字去算，居然淨係比我老公同個女八字比個算命佬算⋯⋯乜唔係要夾全家人既咩😅
算咗出嚟係個阿嬸年代既名，佢地堅持要用。但我已經一早改好咗名，結果長老們一齊轟炸我；話算命佬講我個女原本我個女唔肯嚟投胎，唔叫呢個名會保唔住條命。😑(佢地迷信程度係去到，我生完b坐月期間見到太陽要擔遮，話唔擔遮係對個天不敬= 😊
第二單：算命佬改完個名之後就叫6299攞我b啲衫仔去做法事，於是半夜12點，喺我泵完人奶瞓緊覺抖既時候打電話比我，走嚟問我攞阿b啲衫仔⋯⋯
揸車去醫院途中不停重複講個b改名既事，唔叫呢個名會冇命點點點，繼續講點解我兩公婆要搬走搞到佢麻煩要揸車兩邊走😑當下小妹係好想串佢，但最後忍一忍口，同佢講佢個仔返工唔方便兩邊走，我有事要開緊急刀既話冇人簽紙。
到醫院佢地冇同我講過佢地要入去搞法事先😑我入去着無菌衣嗰陣62一支箭衝入嚟搶我件無菌衣，話佢地要入去先，全個加護病房探b啲人望住我，極度丟架⋯⋯好彩姑娘都知我無奈🤦🏻♀️
第三單：99會帶三姑六婆(佢啲朋友)入我房
除曬衫泵緊奶叫佢地等等，着完衫開門比佢地，入到嚟即刻話咩大家都係女人有咩所謂⋯⋯
三姑入到嚟問冷氣做乜對住我張床？六婆入到嚟問做咩唔着長袖？就算泵完奶可以瞓陣佢地都會拍門嘈醒我，我有講過飯餸唔洗送上嚟比我，我泵奶時間未穩定，成日晏就先瞓到⋯⋯🤦🏻♀️嘈醒我發覺我瞓緊覺之後反問我：乜你喺醫院未瞓夠咩？仲叫我唔好鎖門方便佢地入嚟🤦🏻♀️博物館咩家下？
極品五長老仲有講過好多野否定我，
泵人奶寄冷凍宅配比姑娘代收又話唔得，要叫我老公來回坐400公里車(台中-高雄)送去醫院= =
陀b嗰陣話我肚細個b冇營養等等⋯⋯
我根本感覺唔到自己係做人阿媽，反而更加似佢屋企個奶媽。乜都要比佢地控制，五個長老一個控制我女衣著，一個直接買埋b床b車冇諗過我地屋企要點擺。一個加把口，一個講60年前點生我老公大姑媽，一個翻譯方言⋯⋯
我知佢地係好意但我想好好地做個阿媽會做既野⋯⋯佢地咁做只會令我覺得我完全冇能力做好媽媽，好似乜都要靠佢地咁。
我老公有同佢地講過，用品我兩公婆自己買，名唔洗去算命我兩公婆已經改好咗⋯⋯
我好多謝佢地百忙之中都幫我坐月，所以我我由頭到尾都冇駁嘴，自己屈埋屈埋變到而家咁🤦🏻♀️
隊友唔喺奶奶住呢邊返工，佢返工嗰邊要坐三個鐘車，淨係得連放兩日咁佢先會坐高鐵嚟陪我。另一邊屋企仲有隻寵物要理要餵，你地唔好怪隊友唔出聲🙇🏻♀️隊友有反抗過佢地🤦🏻♀️🤦🏻♀️🤦🏻♀️
經過呢幾單之後我眼淚開始收唔住，泵奶可以泵到一直喊，覺得自己好冇用。
同咗隊友講，寧願唔坐月都要返去自己屋企，再留喺到真係會自殺😫
隊友話有假放就會即刻接我返去，佢知我已經到極限。
希望返到自己屋企去睇精神科會好啲🤦🏻♀️
生完bb真係好玻璃心⋯⋯
＃我的極品四大長老
