［消費券買呢啲！］都有人問我，邊度買到我本書。咁實情好多人係經HomeBlogger買，最簡單。亦都有少量係在書展三聯檔攤買，我都估唔到佢地會擺出嚟，應該係大倉都冇入過直接出爐放去書展。因為我在三聯網都搵唔到呢本書。
（8月3日 update：HKTV Mall已賣晒
另外有人話銅鑼灣誠品有得賣）
1. 咁，而家有多啲渠道啦。講明先，我唔endorse以下任何平台，即係佢收咗你錢執咗笠呀，唔出貨呀，創辧人四十年前非禮過人呀，一概同我無關。你自己去同佢理論。對，包括HKTV Mall，你去買完有問題，梗係搵王維基啦。我特別提HKTV Mall係引你入嚟啫。
2. 仲有，我連link都貼埋畀你，就唔好留言問我「灣仔間城邦在邊」之類。
3. 同埋，如果網上或者去門市搵嘅，慎防你係十年都冇買過書嘅人。用個ISBN最簡單：9789887842989。當然你用我個名「李聲揚」都可以，目測冇乜其他作家同名，我又只係出過呢一本書。就千萬唔好用個書名，因為有啲人當個書名係「事先張揚」，有啲當「一書保平安」，會有點亂。
4. 實體店嘅：以下係讀者報料，除咗書展三聯個檔，我自己從冇在實體店見過自己本書。
5. 有讀者話 沙田 同 將軍澳嘅商務有成棟（如圖）
6. 至於之前書展攤檔有嘅三聯，實體店好似未見（我日日落去樓下望）
7. 誠品，都係冇嘅（我亦都係日日去望）
8. 其實我就Don’t care，但你堅持唔想幫襯大集團嘅，去灣仔城邦都有（扯！咪又係李嘉誠！），或者銅鑼灣樂民，「不過樂文好似得一本」（如圖）。
9. 至於網上嘅，頭先講咗HKTV Mall，仲有其他地方：
Home Blogger （https://bityl.co/890q） — 可以加廿蚊順豐，或者你自己上尖咀拎
HKTV Mall（https://bityl.co/891B）—講咗
一本（https://bityl.co/891J）— 咪又係商務
天地（https://bityl.co/891i） —好似有紀錄但冇貨
香港書城（https://bityl.co/891F）— N年前幫襯過！原來仲未死
博勢力（https://bityl.co/891a）— 唔知係乜，純粹見到。有問題唔好搵我
10. 海外讀者嘅，試下YesAsia（https://bityl.co/891U）—但好似好多地方都唔送，英國歐洲都多數冇，可能台灣澳門美國加拿大澳洲紐西蘭得。再講一次，唔好問我。當然貴一截了。
11. 本書嘅銷量，係暫時不錯嘅。當然我估之後就咁放在書店，就冇乜人買架啦，我又唔係陸東，又冇著套西裝繞個手托下眼鏡咁影封面（至憎，但人在江湖柏木由紀）
12. 睇下有冇機會賣得晒再版，或者有機會出多本。「之前又話唔出？」，咁都係睇情況，賣得好嘅之後牙力咪大啲。
13. 讀者畀我嘅評價，都好正面。但當然呢啲唔係事實之全部。首先買得書嗰啲本身已經係支持者，另外，講得垃圾嘅又一般唔會PM我知嘅
14. 我自評？好簡單，永遠最好係下一本。呢本書肯定唔係完美，唔少缺憾。但真係似生仔咁，個仔雖則有啲甩皮甩骨，但始終都係我個仔。
15. 最後想講嘅係，大家真係支持下啲出書嘅人。唔止係我。當然呢個亦係我嘅私心，但真係唔係我as a content creator/作者 之類嘅私心，而係我作為愛書人嘅私心。
16. 我唔係史提芬京林行止，但我有資格講，寫書個過程真係十分痛苦的。我打字咁快寫文咁快，靈感咁多，都話好痛苦。你可以想像到啲冇乜靈感打字又慢嘅人，要搞幾耐先嘔到本書出嚟。
17. 都唔係講咩「付出咗努力你要尊重」（我覺得唔係，好多人都好努力，但啲嘢好唔掂）。就退一萬步講，絶大多數作者出本書嘅收入，除返開寫本書嘅時間，應該最低工資都搵唔到。（我就唔止最低工資，唔係賣得特別好，係因為我寫得快！）。
18. 你自己計，一本普通嘅書，作者落袋應該兩皮嘢都唔知有冇，但好多人都寫幾個月，對不？
19. 錢銀事少，仲要係畀人講「阿豬阿狗都出書」，就真係你行你上。我畀你計埋自資出版都好，香港有幾多人出到本書？。你再垃圾都好，都要嘔幾萬字出嚟（除非搵搶手），即係等於你爬都要爬完個馬拉松。
20. 當然我係唔怕呢啲侮辱嘅，畀人講咗廿幾三十年垃圾啦，咁見唔見你出到本書？見唔見你開個Patreon多人過我？但有啲面皮薄嘅作者就聽到覺得好難聽。
21. 是真的，之前有個唔熟親戚叫我送書。我係叫佢：仆街，自己去買啦。
22. 真係，千萬唔好叫作者送書畀你。呢個世界上係冇免費蝦條的。作者自己話送畀你就另一回事。即係你去一樓一，人地見你靚仔主動送多你一Q就係恩典，但你唔好第二日走去叫人免費畀你。
23. 辛苦錢嚟架！唔信你去做一次丫。
＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝
台灣 自資出版 在 華文自資出版平台 - Facebook 的推薦與評價
此次書展，B402展位也有特別規劃華文自費出版平台專區，讓更多人看到作者們的心血！現場也有專員提供自費出版的諮詢服務喔～想出書就來找華文自資出版平台吧！ ... <看更多>