香港本地遊系列：吊鐘洲 ＋ 滘西灣
景觀⭐️⭐️⭐️⭐️⭐️／5
難度⭐️⭐️⭐️／5
又係划獨木舟扮去旅行系列，由相思灣出發，風平浪靜一個鐘左右就划到吊鐘洲。
呢個IG爆紅嘅打卡位，閒日去都好多人，路程唔算遙遠，最難就係泊位。一穿洞就勁大浪將架艇撞黎撞去，呢個時候要小心控制。我完全唔識喺冇沙灘嘅情況泊艇，不過唔緊要，岸上面大把人，好快就有幾個專家將我架艇泊到安全位置。
有唔少人會喺吊鐘洲行山，聽講要着適合嘅鞋同埋都幾遠路程，上到山頂可以見到金魚擺尾。不過我同朋友都係踢拖就無謂使試啦，點知原來游水都有驚喜！圖中我坐喺度嗰舊大石下面原來有勁多魚，有間條嗰啲Nemo啲friend，又有幾隻蟹，都幾多嘢睇。啲石係滑嘅所以唔着鞋都唔會整損腳，游水都OK。
順帶一提呢幾日都係狂風雷暴，但係西貢嘅天氣一向唔受影響，我哋打去問過租船嗰邊證實呢幾日附近海域天氣好就決定出發。結果嗰日市區不停落雨，但係出海落咗一陣雨之後就藍天白雲。
喺吊鐘州影咗無限張相之後，見仲有時間就再划半個鐘去附近嘅隠世沙灘。後來發現個沙灘原來叫做滘西灣，要用獨木舟或者租遊艇先去到。水清沙幼，有識郁嘅珊瑚，都幾多魚，同埋勁勁勁多海星，真係估唔到自己仲喺香港。
另外一個驚喜就係滘西灣上面嘅小瀑布，我哋爬上去之後發現有個小水池可以影吓相，瀑布來講呢個真係完全唔危險，當然唔好單獨去啦，有一兩個朋友照應慢慢行係OK嘅。我哋影咗啲好似做緊Spa嘅相，好嘆咁款，不過留意番現實中啲水係超級勁凍，我哋係為咗影相先會浸落去，影完就會即刻跳返出嚟。
由坑口地鐵站搭綠色的士來回相思灣每程＄50-70
相思灣租艇有兩間，一間叫「綿羊仔」一間叫「大灰熊」，打對台咁款。我哋喺綿羊仔度租，平日單人艇＄150
開多左IG post 下畫畫以外嘅生活照：
www.instagram.com/hyatt.hkg
