上兩個weekend約個friend行街都食檸檬，今個weekend終於約到喇，因為佢send CV出去有feedback，下星期有工見。
我個friend連續兩個weekend都埋首喺屋企send搵工，不過send咗50幾封都冇回音，簡單問咗佢搵咩工作？send CV去邊啲公司同埋apply咩職位？以我知道佢嘅工作同埋學歷背景，見完真人嫌樣衰唔出奇，但如果連interview機會都冇，咁就有啲唔make sense，冇理由睇CV都feel到佢係西人架嘛，西味咁濃郁？
當時我問佢：「50幾封求職信全部都係星期六日send？」
「係呀！」
戴定頭盔先，習慣呢樣嘢人人唔同，我自己星期一返到公司就肯定順序check email，由星期一朝早一直碌返去星期日、星期六，同埋星期五晚，當中肯定唔會順利碌晒，因為碌碌下間中一封半封要覆，甚至走咗去做其他嘢，變相星期五晚同星期六嘅電郵反而最後先睇返，坐我側邊啲同事都差唔多。
曾經試過同另一位同事共同幫一個客搵人，我同事星期五放工前send咗幾份CV比個客，我就懶啲，星期一朝早返公司先send，結果阿客打嚟要約見我介紹嘅幾個求職者，然後我口痕問咗句：「我同事都有幾份CV畀咗你喎，唔啱咩？」
「幾時？」
「上星期五臨放工前。」
「哦，未睇到，一開就見到你個email，約咗先啦，你嗰幾個唔啱先約佢嗰啲。」
我同事嘅眼神好絕望，好似控訴緊呢個世界唔公平，遲嚟先上岸，冷手執個熱Horlicks。
同一類事件，已經唔係第一次發生，就算係做辦公室日報嘅廣告，都試過星期五send份稿畀Marketing......奇怪喇，已經係星期一下晝，仲未覆既？唔滿意段稿呀？打去問問，原來Marketing姐姐未睇，正確嚟講係唔知我星期五send咗嚟，要search先搵得返，因為佢已經淹沒喺返工當日嘅電郵大海中。
再戴多次頭盔，梗有人係會由舊睇返到新，可能係我自己、同事、獵頭公司嘅客，同埋辦公室日報啲客先鍾意由新睇返去舊，真係要向盡責又有時序嘅人致敬，最弊社會上盡責嘅人唔多......
所以我send CV一定唔揀星期五晚或者星期六，收CV條友都係打份工，Friday臨收工得鬼閒睬你，星期六check email睇CV就更加唔好玩啦！撇除閒日，如果星期五或六見到有好工，我個人例牌會星期日晚或者星期一朝早先send，費事石沉大海。
呢個理論其實冇數據支持，純粹代入角色，不喜勿插，而咁啱得咁橋，我個friend聽完我講選擇喺星期一朝早先send，又真係有人約佢見工喎，可能真係巧合，無論如何，希望佢下星期見得成，否則就唔係時間性問題，係樣嘅問題喇~~
