話說，我寫了火燎森大戰吳家順，大家知我同火燎森有幾「老友」，但今次，我要婊揚嘅並唔係火燎森，而係佢嘅死對頭：吳家順嘅加密貨幣計劃。
基本上呢個計劃就係：你出機、出電費，吳生出地方俾你擺部機，同埋吳生決定掘邊一隻幣。但由於要做到「貨源歸邊」的效果，所以俾錢加入前，無人知道佢會買邊隻，而佢係會抽你20%的挖幣成果。
仲癲過火燎森，可以吐糟的地方太多，我都不知從何入手。
首先，既然講投資近一百嘅幣，我就索性拎排第一百嘅Sirin Labs黎講。呢隻幣估算去到五億七千三百萬就會掘完，而呢刻已經有近二億三千萬，即係四成已經出左街。而佢嘅24小時流通量，係一千七百萬美元，即係一億三千五百萬港元。如果大家唔明白一億三千萬在市場上係咩概念，大家可以睇返今日恆生指數嘅三隻藍籌，恆隆收市的全日成交金額係二千七百萬港元，東亞銀行係四千五百萬，聯想集團係七千萬，呢三隻藍籌加埋的成交量，先至多得過Sirin Lab一日的成交量。股市「貨源歸邊」，好似係講緊啲三線蚊型股(拿，我唔係財經界KOL，唔好捉我呢個位)，一隻已經有4成街貨、每日有一億三千萬成交金額的虛擬貨幣，如此矚目，你點靜雞雞吸納、靜雞雞採礦？更遑論你個雞棚，不，I mean 你個礦場有多大的運算力才可以急起直追再跑贏全球已有競爭者？人地掘早左你少少，多你兩億個姐，加油哦！要是跑不贏，又如何能做到「貨源歸邊」？到底依家邊個先係「越來越難追」的後期加入者呀Baby？呢刻我好想用羅文腔大聲唱一句：心裡心裡有個謎~~~~
再者，成個計劃透明度近乎係零，在投資前根本不知道自己正在投資那一隻虛擬貨幣，如果早幾日火燎森係玩北韓式公投，呢個計劃就係日本新春福袋，唔講個運字就係講個信字。這是那門子的投資概念？最正嘅係，無論成功與否，佢都會收你20%的挖礦所得。部機的成本你出、電費你出，而保養（我唔明新機落地有咩咁多保養要做啦下）同場地，仲有揀邊個幣去投資，收20%？！Seriously? Right in front of my salad? 突然間，我又明白點解啲人話火燎森個計劃好抵，原來係低處未算低。
或者我咁講句啦，要是投資呢啲二三線幣，如對方所講，「升幅千倍、打個大折扣都幾百倍」的大有人在，咁點解唔直接依家拎五千蚊出黎，買一隻二三線幣？我當小小地升五百倍，都由五千蚊變二百五十萬，又唔駛砌機又唔駛俾電費，我份人好謙虛，賺二百五十萬就夠架啦，然後可以拎舊錢去搵Dirk Caber做很多人神共憤的事情哦（好孩子不要在辦公室搜尋Dirk Caber）但我又講多句啦，上一轉所謂的狂潮，Sirin Lab其實最盡都係升得８倍，依家已經打回原形，我真係唔知所謂的「升千倍大有人在」在那裡。
火生出名食得盡，竟然有人食得更加盡，難怪早排火生慶過火屎啦…
#唔好將所有蛋擺在同一個籃
#專掘一隻二三線幣係咩玩法
#說好的理財常識呢
#好心明知可以查過去升幅就唔好吹咁大啦
#有幾多隻二三線幣升到千倍呀
#我曼珠莎華就最講道理架啦
#同火生打和啦
#Super
