［情人節趙完唱系列］拿，有圖有真相，絶冇走數。高流灣戰記。天花亂墜
1. 交代返。真係情人節同囡囡去打邊爐架。到步時大約十點半，目測都有四五枱客，還好（邊爐舖呢期真係無妄之災）。
2. 其實高流灣在山林道舊舖時（＊），好多時都冇位，亦都因為咁，我近幾年係少去咗（少去咗係講緊幾個月去一次，高峰期係一個星期一次）。咁你話，可以訂位嘛。梗係可以，但我呢啲好多時都臨時先知幾點到，有時又會忽然唔去（主要係就睇戲），就無謂阻住人張枱。
3. 係喎，本人，一度，就係所謂嘅，嘻嘻，「熟客」。記住，熟客就係香港特有，地球上最西嘅生物（＊＊）。咩係熟客？原來有啲人覺得一個月去一次就熟客。咁你見到我好似兩個月食咗四十次「金色不如歸」，去到坐低姐姐已經知我食乜嘅地步，就唔知叫乜。正如2002至2003年間，我日日在灣仔嘅「大胃王」（而家好似係Feathers and Bones，波士頓隔隔），差不多同一個時間到（因為坐村巴），每次坐同一個位，叫同一個餐，飲同一樣嘢。阿姐都係問句「係咪照舊」。
4. 個重點唔係你去幾耐，而係「熟客」，不能自稱，只能人地當你係。一自稱就好low．而我等古老石山，都係係好慣人地同我講「你叫我陳先生得啦」甚至「我係陳生」。正如我亦唔係好接受到你留言叫人地做「小編」。
5. 講返，在高流灣，全盛時我係個個星期至少去一次。咁當然係有貴賓卡，有折。後來我有次冇帶張卡，同返佢講（哈，好low），呀老細直頭話「你唔使呢啲」。咁未算，有一期，佢地係免我汽水醬料錢嘅—記住，係人地主動waive你，你開口就太cheap了。所以後來佢地冇再畀呢啲優惠我，我亦唔會出聲亦唔會去少咗。人地畀你就係人情，唔畀你係道理，唔好當自己巴撚閉（更何況，雖則我去得多，但小叫海鮮，又唔開酒，其實單價唔係最高）（都唔記得講，其實高流灣都唔少高端大陸人去）
6. 以上都係舊事。後來嘅事，講過了，因為幾樣嘢少咗去。首先佢太好生意，好難訂，同埋好嘈，而我唔知點解香港人打邊爐咁撚嘈。第二，因為我成日最後一刻先決定到，咁就唔好訂枱阻住地球轉。第三，以前山林道嗰個位，星期五晚呢，係好撚難截的士嘅。咁但我有期係鍾意打半夜邊爐，十二點先去打嗰種，甚至在嗰度睇波（自己ipad啦），打完實冇車。第四，有年半囡囡不在香港，而我仲未癲到會一條友去高灣打邊爐（雖然係試過的）
7. 聽聞打邊爐會播毒，我冒住成為疫苗撚嘅風險，都要講句，係咪架？到底元兇係打邊爐，定圍埋一齊？你坐到咁近，我估你食乜都會中招。但而家去打邊爐，唔好話六個階磚，真係十六個階磚內都冇人。
8. 昨晚目測，十分開心，吾道不孤，都話四五枱客，而全部都係情侶。坐房嘅未睇（我未神經到去逐間房踢門睇，英雄本色咩）。證明係真係好多人情人節打邊爐嘅。
9. 而其實我對上一次去高流灣，已經係舊年（咁都係幾個月前啫）。所以當諗去邊食情人節大餐時（其實都係嗰幾檔邊爐），就決定咗去高流灣。亦都講真，知道生意唔好。方榮記係我近一兩年新寵，星期一先去過，生意少咗但還好，況且自己舖，其實真係改嚟打乒乓波都仲得。但高流灣啦喎，真係要去關心下。
10. 雖然呢，都講過，我呢啲，海鮮又唔叫，酒又唔開，單價分分鐘唔及平均（其實應該有嘅）。亦都唔好天真到以為自己幫到啲乜。但一來自我感覺良好，唔好有乜事發現自己留憾。二來，都真係精神支持。今日再見到老細，直頭大家拍拍膊頭，真係又一股暖流傳遍全身。
11. 生意，就梗係唔好架啦。但又現實講句，高流灣玩咗咁多年，照計之前都賺唔少，做生意梗有順流逆流，應該冇事嘅。當然大家如果可以，就去支持下。我就冇佣分的，但都話識咗老闆多年。
12. 另外仲有樣嘢想講，其實嗰度啲員工，好多都認得我，亦都真係做咗好耐。你諗下，飲食業喎，其實唔容易。所以相信老細對員工係唔錯嘅。
13. 順手講返，你見到了，男子漢大丈夫，言出必行，答應過女人嘅嘢要做得到！真係見情人節，醒條魚畀囡囡呀！好似坐監過節加個橙咁！五舊水架大佬！
14. 講開橙，隻公仔，戴銀鏡嗰個就叫阿橙。原因係佢個label寫住orange．另外，亦係特登肺炎帶佢出嚟。點解？因為佢嚟自立陶宛—你有冇見立陶宛有人中招？（同樣道理，之前我去方榮記，就帶咗隻羅馬尼亞嘅公仔，同埋一隻烏克蘭嘅公仔）
15. 呀，講埋條魚。食完，仲可以去椒鹽炸骨。唔知啲米芝蓮廚抄到未？只係呢樣嘢，國民（？）都唔好妄自菲薄。啲鬼佬邊識食！
16. 當然唔係廣告post．我幫襯呀飛哥時，都真係未有 Facebook呀！無數人可以作證。女我都換咗幾條，但幫襯邊爐就都係嗰幾間（好似有啲唔妥）。
17. I mean，講真的，打邊爐對我嚟講好神聖，同我打過邊爐嘅女仔，真係十隻手指數得晒，一定少過同我上過床嘅女仔。上床呢啲普通嘢可以求其，打邊爐咁神聖嘅就要真係有愛先可以架嘛。
18. 即係你諗下，遇著個叫碟腸仔嘅女，係幾咁冇癮呢。
19. 不過都係lover conquers all．未識囡囡之前，我其實話過打邊爐叫午餐肉嘅人係落地獄的，但同咗佢一齊後，我唔止冇阻住佢，仲會有時食埋一份。邊爐雖然緊要，但愛更高呀！
20. 唔好意思啲思路同時序有啲跳，話晒都寫咗好多篇文，又半夜兩點半。其實我都係因為打完邊爐唔好即刻訓，先寫呢篇文。
21. Btw，唔使話我知打邊爐唔文明之類。一日仲有日本人，一日打邊爐都係文明。正如食鯨食肉都一樣（食過一次，認真怕怕）（其實挪威都食過）。
22. 見飲大兩杯（可樂），你又肯睇到呢度，爆多單嘢。其實當年有段時間呢，我係一腳踏兩船嘅（請掟石）。咁你知，呢啲大時大節，就最考功夫（＊＊＊）。而囡囡（當年仲未坐正）居然早早幫我解決呢個問題，主動話「不如12號或者13號食」，真係呢（放心，佢係冇第二個的）。不過我老母知道呢個故事後，就覺得囡囡呢啲好有機心，云云。
23. 我諗，我應該收聲
（＊）山林道舊舖仲有做，而寶勒巷新舖只係開咗幾個月，唔知係逆市擴張定咁啱遇著社運啦。而家整多單肺炎，堅係大檸樂。
（＊＊）關於熟客，寫過兩篇文。
我們痛恨的是特權 還是特權不在自己手中？（http://bit.ly/2vxgrNS）．
17蚊食Ruby Tuesday的「不公義」（http://bit.ly/2tZgGkn）
（＊＊＊）請睇舊文，【情人節攻略】三個人的晚餐：三角戀情人節如何自處？（http://bit.ly/33kTU2K）
