兩段零碎的文字
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
香港的某些政派就好似一間西式裝修卻賣中菜的餐廳，以為自己係食神的廚師煮飯聞起上黎已經唔開胃，但你餓起上黎永遠都係要含淚去食。侍應？佢會問你除左等食你有入過廚房幫手咩？你搵經理投訴佢同你講「係咁架啦食就食唔食就過主」。上open rice寫review負評佢仲會啟動連鎖店的全體員工黎反擊你，結果越搞越無客，自己越做越靜就話啲人唔識食、啲人唔配有一間好嘅餐廳。而呢間餐廳嘅食客都係一絕，完全唔理餐桌禮儀，吃子嘅吃子，食相要多難看有多難看；仲有講到明餐廳規則係點，但又死都要帶隻哥基入閘的西客大有人在，而我真心唔明點解要幫襯呢間野貼錢買難受。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
呢期興講Plan B，但我唔講泛民的Plan B，我地講林鄭的Plan B！
等陣先，乜林鄭有Plan B架咩？係呀，有架，正常人做野都有Plan B，不過只有智障或是漫畫裡的主角才會大大聲聲將自己的招式名同計劃講出黎，慌死對手唔知你下一招出咩，唔通林鄭要大大聲聲同你講咩？
出黎做野，例牌交proposal起碼要交兩個計劃，Plan A一定係吹風試水溫，睇下老闆有咩反應，通常都係貴得黎不切實際的Plan，出黎得預左俾人否決的提案。可能你會問：明知提出黎會被人否決，咁提出黎做咩呀？
唔係呢，你聽下我解釋先啦，呢個Plan A係純粹為Plan B而設架，係一種很典型的期望管理技巧，一開始就俾個糟糕的Plan A你，然後你見到普通的Plan B，一比較之下，立刻驚為天人了，就好似由香港搬黎英國第一個星期，望見十里洋腸，不，是十里洋場，一街都係，其實係好普通，但我突然間覺得呢個世界非常美好了。
同樣地，林鄭開頭放個風，話DQ晒兩個，大家係咪覺得好憤怒呢？但依家出到黎，只係DQ左一個，你又係咪即刻覺得冇咁難以接受、甚至隱約覺得「見好就收、唔好激嬲共產黨，到時連另一個都冇埋」？無錯，呢個就係Plan A的價值了。如果一開始就提Plan B，我相信泛民一定會有好大反彈，畢竟大家都未入閘，當然「一個都不能少」，政府要面對的輿論壓力將會很大。但依家政府首先做好公眾的期望管理，再睇準泛民各懷鬼胎過左海就係神仙，當然不會「一方有難、八方支援」，方便輕鬆地無理DQ了一個人。
Plan B呢樣野，識得用，其實好好用。試試把國歌法同23條一齊推，之後再瘋狂吹風「從善如流」暫緩強推其中一條，另一條肯定入硬，政黨們可以同市民講階段勝利，成功爭取，市民又覺得總算不幸中之大幸，正能量正極思考，突然世界又變得很美好了。然後？兩年後將暫緩的惡法和另一條新惡法再推，又入一條，如此類推，很快就可以立晒所有想要立的法。
諗起都覺得過癮。
#呢個係777同689最大的分別
#689做慣老闆梗係乜都強硬
#777係做慣下屬所以好明白點樣玩
#係咪覺得無咁難受呢
#殺死你的溫柔
#拿拿臨拎返個英籍先啦
#選乜鬼
#過黎英國我帶你周圍俾仔溝下仲好啦
