好彩呢排仲有得行山,否則真係情緒病復發。我咁講一啲都無誇張。
今次疫症第四波爆發,唔知點解心情都幾受影響。日復日都要接觸到惡劣荒謬嘅新聞已是平常事。但明明大家都有盡責抗疫,反而要承受呢個無能政府抗疫白痴嘅後果,限聚令禁堂食沒完沒了,身邊做餐飲業嘅朋友嗌晒救命,演藝界嘅朋友亦唔好得好多。2021嘅來臨暫時好似無俾人一種重新開始嘅感覺,仲好似將去年嘅負面氣氛延續落去兼格加倍。
患過情緒病嘅我,總算幸運地學識點樣快速令自己身體同心情舒服啲。而大自然同運動係真係一個最快最可靠嘅緩衝。
我知,疫情期間係份外挑戰性嘅。無得打波無得做gym,好似我呢啲之前成日去操塘嘅人又冇得游水。已經日日work from home仲要困喺屋企做HIIT都唔係辦法。所以行山呢個活動彷彿變咗呢陣子所有情緒寶寶所剩無幾嘅option。
確實,大自然一草一木係真係可以幫助人體排出負能量。我一行山就會一嚿嚿胃氣係咁urt出嚟,之後成個人會醒返啲、諗野正面返啲。(同樣地,2019夏天,每當有「大件事」發生完之後我都要去沙灘踩吓沙游吓海水先可以「散功」。)上到山,自然曬到太陽,吸取到人體需要用嚟製造開心因子嘅維他命D,同時會因為訊號差而可以暫時放低電話幾個鐘唔睇社交平台同新聞,俾腦袋同神經系統冷靜一吓。呢啲好基本嘅人體同精神層面所需,好似呢排行返山先真真正正記得返。
同埋行一啲較挑戰性山路嘅時候,起初望上去會心諗行唔掂,行行吓會隨時仆街咁,但當你咩都唔諗淨係專注一步一步咁行好佢,最後咪又係行到過去。
好老土都要講:這豈不是人生嗎?關關難過關關過,逐步逐步用心走,最後咪又冇仆到街,一條好漢咁走出嚟。
好似我之前都講過,呢陣子真係要看管好自己身體同情緒。 2021剛開始,應該仲有好多都幾吃力嘅路要行。得閒就自己儲定多啲正能量,否則真係會唔夠用。
最後,唔該大家,去行山唔好亂拋垃圾,自己垃圾自己帶走,尤其是口罩,我真係唔想上到山再見到通度都係用過嘅口罩呀。感謝。
#hikinghk
#呢排山上同我打過招呼嘅人多謝你哋
#我行到氣羅氣喘俾唔到太熱情嘅反應
#大家都要加油
Search