《Eternally》
「１秒後的事情，誰也無法承諾到
但若是能和你在一起的話，我就能承諾100年後的未來
我想一直守護住這份不變的愛
你的夢想，變成我的夢想
和你互相凝視，我才能正常呼吸
我會在往後的日子不斷告訴你
從心底裡跟你説 I LOVE YOU
相遇是一種非常奇妙的時光禮物呢
有時我也會有這種感覺，永遠近在身旁」
自己寫咗無數咁多文，但係去到寫結婚誓詞嘅時候真係唔知道點樣寫，唔係個腦一片空白，而係腦裏面充斥住無數嘅甜蜜回憶。
想要用一首歌代表我的心情，所以選擇了一對自己鍾意咗20年嘅樂隊GLAY嘅一首情歌，我們第一首一齊聽嘅歌：Eternally
細個嘅時候成日幻想住將來嘅老婆係咩樣，會係眼大大氣質型、勁抽身材索女型、會唔會係長頭髮又識得玩音樂？又會唔會係一個比我更加叻嘅女仔？人生中經歷咗無數嘅愛情，好多人成日話：「同你結婚嘅未必係你最愛嘅人」，搞到我一路都好恐懼婚姻，但慶幸遇到你才令我知道原來同自己最愛嘅人每一日就算幾漫無目的咁樣生活都係咁有趣，每日放工就係最想快啲返屋企見到你。
大家好有緣份咁樣識，都多謝你當初唔嫌我煩，同我出第一次街。我只需要一次機會，因為我知道當自己得到一個機會同你見面，我嘅魅力同埋樣貌可以好快吸引到你。作為一個獵頭，職業病嚟講，只要將個求職者送去客戶嘅面前就有一半嘅機會。第一次電影、第一次食飯、第一次送你返屋企......好多好多第一次，喺2019年啱啱認識你嘅時候其實我過得唔係咁好，始終唔係含住金鎖匙出世，又啱啱創業，加上要父債子還；我賣咗層樓、身上有債務、當時公司戶口剩返三位數字，係你同我相識冇耐就拎住個木製錢甖，叫我打爛佢攞晒入邊啲錢應急，差在未除低手上嘅勞力士俾我變賣。創業真係又孤獨又寂寞，要搵一個知音人懂得我理念嘅真係少之又少，係你當時不停聽我講我嘅理想同埋我嘅抱負。我自問係一個比較內向嘅人，好多時都唔係好識得表達自己嘅情感，多謝你做我嘅樹窿。
聽網上嘅獵頭Haters講我係一個仆街，其實某程度上唔識得同人相處，都會俾人覺得我係一個仆街，我有幾個前老闆都係我辭職之後突然間變得好唔鍾意我，我估都係佢哋平時忍得太耐：我真係一個幾難相處嘅人，甚至有種孤芳自賞嘅仆街性格。多謝你嘅包容同埋忍耐，不過可能你都搵唔到一個同你有百幾樣嘢相似嘅人。有時望住你都諗：其實眼前嘅你會唔會係我幻想出嚟？點會有人係呢個世界上同我咁相似？生活習慣、興趣、嗜好甚至食嘢方面都係接近一樣。所以好啦，見你份人冇乜點，俾你跟我啦！
人嘅一生好短暫，生老病死係必然，過去嘅經歷令我覺得珍惜眼前人、活在當下好緊要。過去了就是過去了，無法改變；未來的事情，你也無法控制；你只能把握的，就是現在。作為你老公，我當然希望大家都係健健康康、開開心心、肥肥白白咁樣去過每一日，我唔希望有意外或者疾病降臨係你身上，雖然大家總會有一個先行一步，另外一個點都會喺老人院入面孤零零咁過，我唔貪心，我希望由今日開始未來18,000日都係我同你一齊，帶俾你甜蜜回憶同埋片段，我要你老咗嘅時候都會記得有一個咁正嘅人陪了你一輩子。
我冇乜知心朋友，但係我好高興我搵到一個最好的朋友。雖然未來嘅我會越嚟越型、越嚟越出名，肯定會有唔少狂蜂浪蝶但係我想話俾你知我唔會孔雀開屏，無論世界點轉變、將來點變，我都會係一個會永遠守護住你、照顧你嘅最好朋友。
真心多謝你成為我生命中的摯愛，成為我的唯一，你成就了我；請你由今日開始，同我一齊分享我所有嘅夢想同冒險。
